Kerala
നവകേരള യാത്രയില് നടക്കുന്നത് പരാതി സ്വീകരിക്കല്മാത്രം , പരിഹാരമില്ല; സര്ക്കാറിനെതിരെ വീണ്ടും ഗവര്ണര്
സാമ്പത്തിക പ്രതിസന്ധിക്ക് കാരണം സര്ക്കാരിന്റെ നയങ്ങളാണെന്നും ഡല്ഹിയില് മാധ്യമ പ്രവര്ത്തകരോട് സംസാരിക്കവെ അദ്ദേഹം പറഞ്ഞു
ന്യൂഡല്ഹി | സംസ്ഥാന സര്ക്കാരിനെതിരായ വിമര്ശനം തുടര്ന്ന് ഗവര്ണര് ആരിഫ് മുഹമ്മദ് ഖാന്. നവകേരള യാത്രയില് പരാതി സ്വീകരിക്കല് മാത്രമാണ് നടക്കുന്നതെന്നും പരാതിയില് ഒന്ന് പോലും നേരിട്ട് പരിഹരിക്കുന്നില്ലെന്നും ഗവര്ണര് ആരോപിച്ചു. സാമ്പത്തിക പ്രതിസന്ധിക്ക് കാരണം സര്ക്കാരിന്റെ നയങ്ങളാണെന്നും ഡല്ഹിയില് മാധ്യമ പ്രവര്ത്തകരോട് സംസാരിക്കവെ അദ്ദേഹം പറഞ്ഞു
ഭരണഘടനാപരമായ കര്ത്തവ്യം നിര്വഹിക്കാന് സര്ക്കാര് തയ്യാറാകുന്നില്ല. സാമ്പത്തിക പ്രതിസന്ധി പറയുമ്പോഴും മറുഭാഗത്ത് വലിയ രീതിയില് ആഘോഷങ്ങള് നടത്തുന്നതും ലക്ഷങ്ങള് ചെലവഴിച്ച് സ്വിമ്മിങ് പൂളടക്കം നവീകരിക്കുന്നതും നാം കണ്ടതാണ്. 35 വര്ഷത്തോളം സേവനം ചെയ്തവര്ക്ക് പെന്ഷന് നല്കാന് പണമില്ല. രണ്ട് വര്ഷം മന്ത്രിമാരുടെ പേഴ്സണല് സ്റ്റാഫായിരുന്നവര്ക്ക് പെന്ഷന് നല്കുന്നുവെന്നും ഗവര്ണര് കുറ്റപ്പെടുത്തി
നവകേരള യാത്രയില് മൂന്നര ലക്ഷത്തിലധികം പരാതികള് കിട്ടിയെന്ന് സര്ക്കാര് പറയുന്നു. ഇതില് ഒരു പരാതി പോലും നേരിട്ട് പരിഹരിക്കുന്നില്ല. ഇതെല്ലാം കലക്ടറേറ്റുകളിലോ മറ്റു സര്ക്കാര് ഓഫീസുകളിലോ സ്വീകരിക്കാവുന്ന പരാതികളല്ലേയെന്നും ഗവര്ണര് ചോദിച്ചു.കേരളം മികച്ച സംസ്ഥാനമാണ്. കേരളത്തിന്റെ അഭിവൃദ്ധി ലോട്ടറിയിലൂടെയും മദ്യവില്പനയിലൂടെയും ഉണ്ടായതല്ല. ലോകത്തിന്റെ വിവിധ ഭാഗങ്ങളില് ജോലിചെയ്യുന്ന അവിടുത്തെ പ്രവാസികളുടെ സംഭാവനയാണ്. അതാണ് കേരളത്തിന്റെ ശക്തിയെന്നും ഗവര്ണര് പറഞ്ഞു
സെനറ്റിലേക്ക് താന് നാമനിര്ദേശം ചെയ്തവരുടെ ലിസ്റ്റ് മുഴുവന് ഹൈക്കോടതി സ്റ്റേ ചെയ്തിട്ടില്ലെന്നും ഗവര്ണര് പറഞ്ഞു. തന്റെ വിവേചനാധികാരം എങ്ങനെ പ്രയോഗിക്കണമെന്ന് സ്വയം തീരുമാനിക്കും. താന് ആളുകളെ തിരഞ്ഞെടുക്കുന്നതിന്റെ കാരണം ആരെയും ബോധ്യപ്പെടുത്തേണ്ട ചുമതല തനിക്കില്ലെന്നും ഗവര്ണര് പറഞ്ഞു