Kerala
ശമ്പളം പോലും നല്കാനാകാത്തത് മാനേജ്മെന്റിന്റെ കെടുകാര്യസ്ഥത; കെ എസ് ആര് ടി സിയെ മൂന്നായി വിഭജിക്കുമെന്ന് മുഖ്യമന്ത്രി
കോര്പ്പറേഷനെ സ്വയം ഭരണാധികാരമുള്ള മൂന്ന് ലാഭ കേന്ദ്രങ്ങളായി വിഭജിക്കുമെന്നും ഡ്യൂട്ടി പാറ്റേണിലെ മാറ്റങ്ങളില് ഉള്പ്പെടെ ജീവനക്കാര് സഹകരിക്കണമെന്നും മുഖ്യമന്ത്രി
തിരുവനന്തപുരം | കെഎസ്ആര്ടിസി മാനേജ്മെന്റിനെതിരെ മുഖ്യമന്ത്രി പിണറായി വിജയന്. സര്ക്കാര് സഹായിച്ചിട്ടും ജീവനക്കാര്ക്ക് ശമ്പളം പോലും നല്കാനാവാത്തത് കെഎസ്ആര്ടിസി മാനേജ്മെന്റിന്റെ കെടുകാര്യസ്ഥതയാണെന്ന് മുഖ്യമന്ത്രി കുറ്റപ്പെടുത്തി. സത്യങ്ങള് മറച്ചുവച്ചാണ് ചില സംഘടനകളുടെ പ്രചാരണമെന്നും അദ്ദേഹം ചിന്ത വാരികയില് എഴുതിയ ലേഖനത്തില് ആരോപിച്ചു
കെഎസ്ആര്ടിസിയെ സ്വയംഭരണാധികാരമുള്ള മൂന്ന് ലാഭകേന്ദ്രങ്ങളായി വിഭജിക്കുമെന്നും സിംഗിള് ഡ്യൂട്ടിയില് വിട്ടുവീഴ്ചയില്ലെന്നും മുഖ്യമന്ത്രി ലേഖനത്തില് പറയുന്നു. 2011-2022 കാലയളവില് മാത്രം 2076 കോടി രൂപയാണ് കെഎസ്ആര്ടിസിക്ക് സര്ക്കാര് ധനസഹായം നല്കിയത്. എന്നാല്, ജീവനക്കാര്ക്ക് ശമ്പളം പോലും നല്കാനാവാത്തത് കെഎസ്ആര്ടിസി മാനേജ്മെന്റിന്റെ കെടുകാര്യസ്ഥതയെന്ന് മുഖ്യമന്ത്രി കുറ്റപ്പെടുത്തി. കെഎസ്ആര്ടിസിയെ പൊതുമേഖലയില് നിലനിര്ത്തുകയാണ് ലക്ഷ്യം. എന്നാല് ഇത് അത്ര എളുപ്പമല്ലെന്നും മുഖ്യമന്ത്രി പറയുന്നു. കോര്പ്പറേഷനെ സ്വയം ഭരണാധികാരമുള്ള മൂന്ന് ലാഭ കേന്ദ്രങ്ങളായി വിഭജിക്കുമെന്നും ഡ്യൂട്ടി പാറ്റേണിലെ മാറ്റങ്ങളില് ഉള്പ്പെടെ ജീവനക്കാര് സഹകരിക്കണമെന്നും മുഖ്യമന്ത്രി കൂട്ടിച്ചേര്ത്തു.