കുവൈത്തിൽ വിലക്കയറ്റം നിയന്ത്രിക്കുന്നതിന്‌ വാണിജ്യ മന്ത്രിയുടെ നേരിട്ടുള്ള ഇടപെടൽ

കുവൈത്ത് സിറ്റി | കുവൈത്തിൽ വില വർദ്ധനവ് നിയന്ത്രിക്കുന്നതിന്‌ ആവശ്യമായ നടപടികൾ നടപ്പാക്കുവാനായി വാണിജ്യ വ്യവസായ മന്ത്രി മുഹമ്മദ്‌ അൽ ഐബാൻ വിവിധ സർക്കാർ ഏജൻസികൾക്ക് പ്രത്യേക നിർദേശം നൽകി. ജംഇയ്യകൾ, കസ്റ്റംസ്, കാർഷിക മന്ത്രാലയം, മാനവ ശേഷി പൊതു സമിതി മുതലായ ഏജൻസികളുമായുള്ള ഏകോപനത്തിലൂടെയാണ് വിലക്കയറ്റം തടയുവാനുള്ള പദ്ധതി തയ്യാറാക്കുന്നത്.

അടിസ്ഥാന സാധനങ്ങൾക്ക് രണ്ട് വർഷത്തേക്ക് ലാഭവിഹിതം ഈടാക്കാതിരിക്കുക, സൗജന്യ ഓഫറുകൾ നിർത്തലാക്കുകയും പകരം അവയുടെ മൂല്യം സാധനത്തിന്റെ വിലയിൽ കുറക്കുകയും ചെയ്യുക, സപ്ലയർമാരുടെ കുടിശിക അടയ്ക്കുന്നതിനുള്ള കാലയളവ് 15 ദിവസമായി പരിമിതിതപ്പെടുത്തുക, ഭരണപരമായ ചെലവുകൾ നിയന്ത്രിക്കുക, സിവിൽ സർവീസ് കമ്മീഷനുമായി ഏകോപിപ്പിച്ച് സഹകരണ സംഘങ്ങളിലെ അഡ്മിനിസ്ട്രേറ്റീവ് തസ്തികകളിലേക്കുള്ള നിയമനം നിർത്തുക, ഇവ സ്വദേശികൾക്ക് മാത്രമായി പരിമിതപ്പെടുത്തുക തുടങ്ങിയ പത്തു നിർദേശങ്ങളും ജംഇയ്യകൾക്ക് മന്ത്രി സമർപ്പിച്ചു.

ഇതിനു പുറമെ ഭക്ഷ്യസുരക്ഷ നിലനിർത്തുന്നതിന് കൂടുതൽ പൊതു സംഭരണശാലകൾ തുറക്കുവാനും മാംസം ഇറക്കുമതി ചെയ്യുന്നതിനായി അതിർത്തി ചെക്ക് പോസ്റ്റുകൾ തുറക്കുന്നത് വിപുലീകരിക്കുവാനും കൃഷി മന്ത്രാലയത്തിനും മന്ത്രി നിർദേശം നൽകി.

അടിസ്ഥാന ഭക്ഷ്യവസ്തുക്കളുടെ കസ്റ്റംസ് തീരുവയും സേവന ഫീസും രണ്ട് വർഷത്തേക്ക് താൽക്കാലികമായി നിർത്തുവാനും കസ്റ്റംസ് അധികൃതർക്ക് മന്ത്രി നിർദേശം നൽകിട്ടുണ്ട്.കൂടാതെ ഭക്ഷ്യ ഉപഭോഗം യുക്തിസഹമാക്കുന്നതിനുള്ള ബോധവൽക്കരണ പ്രചരണം ശക്തിപ്പെടുത്തുന്നതി നുള്ള ഉത്തരവാദിത്തം വിവര മന്ത്രാലയത്തിനായിരിക്കുമെന്നും മന്ത്രി പറഞ്ഞു

റിപ്പോർട്ട്| ഇബ്രാഹിം വെണ്ണിയോട്