മുല്ലപ്പെരിയാര്‍ അണക്കെട്ടിന്റെ മൂന്ന്, നാല് ഷട്ടറുകള്‍ തുറന്നു; പുറത്തേക്കൊഴുക്കുന്നത് 772 ഘനയടി വെള്ളം

ഇടുക്കി | മുല്ലപ്പെരിയാര്‍ അണക്കെട്ടിന്റെ സ്പില്‍ വേ ഷട്ടറുകള്‍ തുറന്നു. മൂന്ന്, നാല് ഷട്ടറുകളാണ് തുറന്നത്. 772 ഘനയടി വെള്ളമാണ് പുറത്തേക്കൊഴുക്കുന്നത്. അണക്കെട്ട് തുറക്കുന്നതുമായി ബന്ധപ്പെട്ട് തമിഴ്‌നാട് കേരളത്തിന് മുന്നറിയിപ്പ് നല്‍കിയിട്ടുണ്ട്. ജലനിരപ്പ് 141 അടിയിലെത്തിയതിനെ തുടര്‍ന്നാണ് ഷട്ടറുകള്‍ തുറന്നത്. അണക്കെട്ടിലേക്കുള്ള നീരൊഴുക്ക് ശക്തമായി തുടരുകയാണ്. അണക്കെട്ട് തുറന്ന സാഹചര്യത്തില്‍ പെരിയാറിന്റെ ഇരുകരകളിലും താമസിക്കുന്നവര്‍ ജാഗ്രത പാലിക്കണമെന്ന് ഇടുക്കി ജില്ലാ കലക്ടര്‍ നിര്‍ദേശിച്ചു.

ഇടുക്കി അണക്കെട്ടും ഇന്ന് തുറക്കും. ഡാമിന്റെ ഒരു ഷട്ടര്‍ ആണ് രാവിലെ പത്തിന് ഉയര്‍ത്തുക. ഷട്ടര്‍ 40 മീറ്റര്‍ ഉയര്‍ത്തി 40,000 ലിറ്റര്‍ ജലം പുറത്തേക്കൊഴുക്കും. 2399.38 അടിയാണ് നിലവിലെ ജലനിരപ്പ്. അണക്കെട്ടിന്റെ വൃഷ്ടിപ്രദേശത്ത് കനത്ത മഴ പെയ്യുന്നുണ്ട്.