ഇ എസ് ബിജിമോള്‍ കേരള മഹിളാസംഘം സംസ്ഥാന സെക്രട്ടറി

തിരുവനന്തപുരം |  കേരള മഹിളാസംഘം സംസ്ഥാന സെക്രട്ടറിയായി മുന്‍ എംഎല്‍എ ഇ എസ് ബിജിമോളെ തിരഞ്ഞെടുത്തു. മുന്‍ സംസ്ഥാന സെക്രട്ടറി പി വസന്തമാണ് പുതിയ പ്രസിഡന്റ്. തൃശ്ശൂരില്‍ ചേര്‍ന്ന സംസ്ഥാന സമ്മേളനത്തിലാണ് പുതിയ ഭാരവാഹികളെ തിരഞ്ഞെടുത്തത്്. നിലവില്‍ ബിജിമോള്‍ സിപിഐ സംസ്ഥാന കമ്മറ്റി അംഗമല്ല. സംസ്ഥാന കമ്മിറ്റിയില്‍ ഇല്ലാത്ത ഒരാളെ സംസ്ഥാന സെക്രട്ടറി സ്ഥാനത്തേക്ക് തിരഞ്ഞെടുക്കുന്നത് അപൂര്‍വമാണ്.

കുറച്ചുകാലങ്ങളായി ഇ എസ് ബിജിമോള്‍ക്ക് സംഘടനാ പദവികള്‍ ഒന്നും തന്നെയില്ല. ഇടുക്കി സിപിഐ ജില്ലാ സമ്മേളനത്തില്‍ ജില്ലാ സെക്രട്ടറിയായി ബിജി മോളെ സംസ്ഥാന കമ്മിറ്റി നിര്‍ദേശിച്ചെങ്കിലും ഇസ്മയില്‍ പക്ഷം എതിര്‍ത്തതിനെ തുടര്‍ന്ന് സ്ഥാനം നഷ്ടമായി.

മഹിളാ സംഘത്തിന്റെ സെക്രട്ടറി പദവിയില്‍ എത്തുന്നതോടെ സിപിഐ സംസ്ഥാന കമ്മിറ്റിയില്‍ ബിജിമോളെ ക്ഷണിതാവാക്കിയേക്കും. കാനം പക്ഷത്തെ അനുകൂലിക്കുന്നവരാണ് ഇ എസ് ബിജിമോളും പി വസന്തവും.