Kerala
നടിയെ ആക്രമിച്ച കേസ്: ആറ് പ്രതികള്ക്കും 20 വര്ഷം വീതം കഠിന തടവ്
50,000 രൂപ പിഴയൊടുക്കണം. പിഴയൊടുക്കിയില്ലെങ്കില് ഒരു വര്ഷം കൂടി അധിക തടവ് അനുഭവിക്കണം. പ്രതികളുടെ പ്രായം കോടതി പരിഗണിച്ചു.
കൊച്ചി | നടിയെ ആക്രമിച്ച കേസില് ആറ് പ്രതികള്ക്കും സമാന ശിക്ഷ വിധിച്ച് കോടതി. 20 വര്ഷം വീതം കഠിന തടവും 50,000 രൂപ വീതം പിഴയൊടുക്കാനുമാണ് കോടതി ഉത്തരവ്. പിഴയൊടുക്കിയില്ലെങ്കില് ഒരു വര്ഷം കൂടി അധിക തടവ് അനുഭവിക്കണം.
കൂട്ട ബലാത്സംഗത്തിനും ക്രിമിനല് ഗൂഢാലോചനക്കുമാണ് ശിക്ഷ. പ്രതികളുടെ പ്രായം കോടതി പരിഗണിച്ചു. 40 വയസ്സിന് താഴെയുള്ളവരാണ് പ്രതികള് എല്ലാവരും. പ്രതികള് വിചാരണ തടവ് കുറച്ച് ശിക്ഷ അനുഭവിച്ചാല് മതിയെന്നും ഉത്തരവില് പറയുന്നു. ഇതുപ്രകാരം ഒന്നാം പ്രതി പള്സര് സുനി ഇനി പന്ത്രണ്ടര വര്ഷം ജയിലില് കിടന്നാല് മതി.
രണ്ടാം പ്രതി മാര്ട്ടിന് ആന്റണി പതിനഞ്ച് വര്ഷം ശിക്ഷ അനുഭവിക്കണം. മൂന്നാം പ്രതി ബി മണികണ്ഠന് പതിനഞ്ചര വര്ഷവും നാലാം പ്രതി വി പി വിജീഷ് പതിനഞ്ച് വര്ഷവും അഞ്ചാം പ്രതി എച്ച് സലീം പതിനെട്ടര വര്ഷവും ആറാം പ്രതി പ്രദീപ് പതിനേഴ് വര്ഷവുമാണ് തടവില് കഴിയേണ്ടത്. പ്രതികളെ വിയ്യൂര് സെന്ട്രല് ജയിലിലേക്ക് മാറ്റും. എറണാകുളം പ്രിന്സിപ്പല് സെഷന്സ് ജഡ്ജി ഹണി എം വര്ഗീസ് ആണ് ശിക്ഷ വിധിച്ചത്. പ്രതികള് കുറ്റക്കാരാണെന്ന് തിങ്കളാഴ്ച കോടതി കണ്ടെത്തിയിരുന്നു.
കേസിലെ ഒന്നാം പ്രതി പള്സര് സുനി, രണ്ടാം പ്രതി മാര്ട്ടിന് ആന്റണി, മൂന്നാം പ്രതി ബി മണികണ്ഠന്, നാലാം പ്രതി വി പി വിജീഷ്, അഞ്ചാം പ്രതി എച്ച് സലിം (വടിവാള് സലിം), ആറാം പ്രതി പ്രദീപ് എന്നിവരെയാണ് കോടതി ശിക്ഷിച്ചത്. വിവിധ കുറ്റങ്ങളിലായി പ്രതികള്ക്ക് കോടതി വിധിച്ചിരിക്കുന്ന പിഴയില് നിന്ന് അഞ്ച് ലക്ഷം രൂപ അതിജീവിതയ്ക്ക് നല്കണമെന്നും കോടതി ഉത്തരവില് വ്യക്തമാക്കുന്നു. എട്ട് വര്ഷത്തെ നിയമപോരാട്ടങ്ങള്ക്കൊടുവിലാണ് കേസില് കുറ്റക്കാരെന്ന് കണ്ടെത്തിയ ആറ് പ്രതികള്ക്കും വിചാരണക്കോടതി ശിക്ഷ വിധിച്ചിരിക്കുന്നത്.
പരമാവധി ശിക്ഷ നല്കണമെന്ന പ്രോസിക്യൂഷന് വാദം കോടതി തള്ളി. കേസിലെ ദൃശ്യങ്ങള് അടങ്ങിയ പെന്ഡ്രൈവ് അന്വേഷണ ഉദ്യോഗസ്ഥന് സൂക്ഷിക്കണം. ഇരയുടെ സ്വകാര്യതയെ ഒരുതരത്തിലും ബാധിക്കാത്ത വിധത്തില് ഇവ സൂക്ഷിക്കണമെന്നും ഉത്തരവിലുണ്ട്.
Latest
വാര്ത്തകളില് വീണ്ടും എച്ച് ക്യു- 9 ബി
റഷ്യന് കരുത്തിന് മങ്ങല്; പശ്ചിമേഷ്യന് യുദ്ധത്തില് നിസ്സഹായനായി പുടിന്
നതാന്സിന് നേരെ ആക്രമണമുണ്ടായെന്ന് ഇറാന്; ഇല്ലെന്ന് ഐ എ ഇ എ
നിര്ത്തൂ അതിക്രമം; അമേരിക്കക്കാര് ആക്രമണത്തെ എതിര്ക്കുന്നുവെന്ന് സര്വേ
അവര് എവിടെ? ഒരു ഫോണ് വിളിയെങ്കിലും..
ഗള്ഫിലെ എസ് എസ് എല് സി, ഹയര് സെക്കന്ഡറി പരീക്ഷകള് മാറ്റി
