സെല്‍ഫി എടുക്കുന്നതിനിടെ ഭാര്യ പാലത്തില്‍ നിന്ന് തള്ളിയിട്ടു; ഭര്‍ത്താവിനെ രക്ഷിച്ചത് നാട്ടുകാര്‍

ബെംഗളൂരു | മൊബൈലില്‍ സെല്‍ഫി എടുക്കുകയായിരുന്ന ഭര്‍ത്താവിനെ യുവതി പാലത്തില്‍ നിന്ന് തള്ളി താഴെയിട്ടു. ഓടിയെത്തി നാട്ടുകാര്‍ ഭര്‍ത്താവിനെ രക്ഷപ്പെടുത്തി. കര്‍ണാടകയിലെ യാദ്ഗിറിലാണ് നാടകീയ സംഭവം.

കൃഷ്ണ നദിക്കു കുറുകെയുള്ള ഗുര്‍ജാപൂര്‍ പാലത്തില്‍ നിന്നാണ് ഭര്‍ത്താവിനെ തള്ളിയിട്ടത്. അബദ്ധത്തില്‍ കാല്‍വഴുതി വീഴുകയായിരുന്നെന്ന് യുവതി ഓടിക്കൂടിയവരെ തെറ്റിദ്ധരിപ്പിച്ചു. പാലത്തില്‍ നിന്ന് താഴെ നദിയിലേക്ക് വീണ യുവാവ് ഒഴുകി സമീപത്തുള്ള പാറയില്‍ പിടിച്ച് കയറി. നിലവിളി കേട്ട് ഓടിയെത്തിയ നാട്ടുകാര്‍ കയര്‍ പാറയിലേക്ക് ഇട്ടുകൊടുത്താണ് യുവാവിനെ മുകളിലേക്ക് കയറ്റിയത്.

മുകളിലേക്ക് കയറിയ ശേഷം യുവാവ് തന്നെയാണ് ഭാര്യ തന്നെ തള്ളിയിടുകയായിരുന്നുവെന്ന് ആരോപിച്ചത്. എന്നാല്‍ ഭാര്യ കുറ്റം നിഷേധിച്ചു. യുവാവിനെ രക്ഷപ്പെടുത്തുന്നതിന്റെ വീഡിയോ പ്രചരിക്കുന്നുണ്ട്. റായ്ച്ചൂര്‍ പോലീസ് മൊഴി രേഖപ്പെടുത്താനായി ദമ്പതികളെ വിളിച്ചുവരുത്തി. ഭര്‍ത്താവ് പരാതിയൊന്നും നല്‍കിയിട്ടില്ല.