Kerala

ലോകത്തെ കേരളമാക്കി മാറ്റണം; പ്രവാസികളുടെ വൈദഗ്ദ്ധ്യം നവകേരള നിർമ്മിതിക്ക് അനിവാര്യമെന്ന് മുഖ്യമന്ത്രി

2027-28ൽ ആരംഭിക്കുന്ന പതിനഞ്ചാം പഞ്ചവത്സര പദ്ധതിയിൽ പ്രവാസവുമായി ബന്ധപ്പെട്ട നൂതന പ്രോജക്ടുകൾ ഉൾപ്പെടുത്തുമെന്നും മുഖ്യമന്ത്രി

Published

Jan 30, 2026 2:16 pm |

Last Updated

Jan 30, 2026 2:16 pm

റാഷിദ് പൂമാടം

തിരുവനന്തപുരം| കേരളത്തിന്റെ വികസനത്തിലും സംസ്കാര രൂപീകരണത്തിലും പ്രവാസി മലയാളി സമൂഹം വഹിക്കുന്ന പങ്ക് നിർണ്ണായകമാണെന്നും കേരളത്തെ ഒരു ‘ലോക കേരളമായി’ പുനർവിഭാവനം ചെയ്യണമെന്നും മുഖ്യമന്ത്രി പിണറായി വിജയൻ. ലോക കേരള സഭയുടെ പ്രതിനിധി സമ്മേളനത്തിൽ സംസാരിക്കുകയായിരുന്നു അദ്ദേഹം. നവകേരള സൃഷ്ടിയിൽ അകം കേരളവും പുറം കേരളവും കൈകോർക്കണമെന്നും അതിനുള്ള ജനാധിപത്യ വേദിയാണ് ലോക കേരള സഭയെന്നും അദ്ദേഹം കൂട്ടിച്ചേർത്തു.

ചൈനീസ് മോഡൽ മാതൃകയാക്കാം

ചൈനയുടെ വളർച്ചയിൽ പ്രവാസി സമൂഹം വഹിച്ച പങ്ക് മുഖ്യമന്ത്രി ചൂണ്ടിക്കാട്ടി. വിദേശത്തുള്ള ചൈനീസ് വിദഗ്ദ്ധരെയും ഗവേഷകരെയും തിരികെ എത്തിച്ച് നാടിന്റെ ഉത്പാദന മേഖലയെ ഉത്തേജിപ്പിക്കുന്ന ‘ചുൺഹൂയ്’ പദ്ധതി മാതൃകാപരമാണ്. സമാനമായ രീതിയിൽ മലയാളി പ്രവാസികളുടെ അറിവും വൈദഗ്ദ്ധ്യവും കേരളത്തിന്റെ വിജ്ഞാനസമൂഹത്തിലേക്കുള്ള മാറ്റത്തിനായി ഉപയോഗപ്പെടുത്തണം. 2027-28ൽ ആരംഭിക്കുന്ന പതിനഞ്ചാം പഞ്ചവത്സര പദ്ധതിയിൽ പ്രവാസവുമായി ബന്ധപ്പെട്ട ഇത്തരം നൂതന പ്രോജക്ടുകൾ ഉൾപ്പെടുത്തുമെന്നും മുഖ്യമന്ത്രി പ്രഖ്യാപിച്ചു.

ലോക കേരള സഭ: അംഗീകാരത്തിന്റെ പുതിയ ഘട്ടം

തുടക്കത്തിൽ ചില കേന്ദ്രങ്ങളിൽ നിന്ന് പരിഹാസവും എതിർപ്പും നേരിട്ട ലോക കേരള സഭയ്ക്ക് ഇന്ന് വലിയ പൊതു അംഗീകാരം ലഭിച്ചിട്ടുണ്ടെന്ന് മുഖ്യമന്ത്രി പറഞ്ഞു. ലോക കേരള സഭ മറ്റ് സംസ്ഥാനങ്ങൾക്ക് അനുകരണീയമായ മാതൃകയാണെന്ന് കേന്ദ്ര സർക്കാർ തന്നെ ഈയിടെ വ്യക്തമാക്കിയത് ഇതിന്റെ വിജയമാണ്. വെറും ചടങ്ങുകൾ എന്നതിലുപരി പ്രായോഗികമായ ഇടപെടലുകൾ വഴി പ്രവാസികളെ ചേർത്തുപിടിക്കാൻ കേന്ദ്ര സർക്കാരും തയ്യാറാകേണ്ടതുണ്ടെന്ന് അദ്ദേഹം ഓർമ്മിപ്പിച്ചു.

പ്രവാസി ക്ഷേമത്തിനായി പുത്തൻ പദ്ധതികൾ
പ്രവാസികൾക്കായി നടപ്പിലാക്കുന്ന പ്രധാന പദ്ധതികളെക്കുറിച്ച് മുഖ്യമന്ത്രി വിശദീകരിച്ചു:
1. പ്രവാസി മിഷൻ: പ്രവാസികളുടെ സാമ്പത്തിക പുനഃസംയോജനം, സംരംഭകത്വം, പുനരധിവാസ പദ്ധതികൾ എന്നിവ ഏകോപിപ്പിക്കാൻ മിഷൻ സജ്ജമായി.
2. നോർക്ക കെയർ: ലോകമെമ്പടുമുള്ള പ്രവാസികൾക്കായി രാജ്യത്ത് ആദ്യമായി നടപ്പിലാക്കുന്ന സമഗ്ര ആരോഗ്യ ഇൻഷുറൻസ് പദ്ധതി.
3. നോർക്ക പോലീസ് സ്റ്റേഷൻ: വിദേശ റിക്രൂട്ട്മെന്റ് തട്ടിപ്പുകൾ തടയാൻ നേരിട്ട് എഫ്.ഐ.ആർ രജിസ്റ്റർ ചെയ്യാൻ കഴിയുന്ന പ്രത്യേക സംവിധാനം ഉടൻ നിലവിൽ വരും.
4. സ്റ്റുഡന്റ് മൈഗ്രേഷൻ പോർട്ടൽ: വിദേശ പഠനത്തിന് പോകുന്ന വിദ്യാർത്ഥികൾക്കായി സമഗ്ര ഓൺലൈൻ സംവിധാനം പൂർത്തിയായി.
5. നിയമനിർമ്മാണം: എഡ്യൂക്കേഷൻ കൺസൾട്ടൻസികളെ നിയന്ത്രിക്കാനുള്ള ബില്ലിന്റെ നടപടികൾ അവസാന ഘട്ടത്തിലാണ്.

ആഗോള അനിശ്ചിതത്വവും സർക്കാരിന്റെ ഇടപെടലും
ലോകമെമ്പാടും കുടിയേറ്റ സമൂഹങ്ങളോട് കാണിക്കുന്ന അസഹിഷ്ണുത വർദ്ധിച്ചു വരികയാണെന്ന് മുഖ്യമന്ത്രി ചൂണ്ടിക്കാട്ടി. ഇത്തരം അനിശ്ചിതത്വങ്ങൾക്കിടയിൽ പ്രവാസികളെ സംരക്ഷിക്കേണ്ട ഉത്തരവാദിത്വം സർക്കാരിനുണ്ട്. തൊഴിൽ അവകാശങ്ങൾ നിഷേധിക്കപ്പെടുന്ന സാഹചര്യത്തിൽ പ്രവാസികൾക്ക് ജാഗ്രത വേണം. തിരികെ എത്തുന്നവരെ പുനരധിവസിപ്പിക്കാൻ സർക്കാർ പദ്ധതികൾ ഒരുക്കുമ്പോൾ തന്നെ, നാടിന്റെ വികസനത്തിൽ പങ്കാളികളാകാനും നിക്ഷേപം നടത്താനും പ്രവാസികൾ മുന്നോട്ടുവരണമെന്നും മുഖ്യമന്ത്രി അഭ്യർത്ഥിച്ചു.