ഇസ്‌റാഈലില്‍ കുടുങ്ങിയ മലയാളികളുടെ സുരക്ഷ ഉറപ്പുവരുത്തണം: സി പി എം

തിരുവനന്തപുരം | ഹമാസ്-ഇസ്‌റാഈല്‍ സംഘര്‍ഷം കടുത്ത സാഹചര്യത്തില്‍ ഇസ്‌റാഈലില്‍ കുടുങ്ങിയ മലയാളികള്‍ സുരക്ഷിതരാണെന്ന് ഉറപ്പുവരുത്താന്‍ നടപടി സ്വീകരിക്കണമെന്ന് കേന്ദ്രത്തോട് ആവശ്യപ്പെട്ട് സി പി എം. പാര്‍ട്ടി സംസ്ഥാന സെക്രട്ടേറിയറ്റ് ആണ് ഇതുസംബന്ധിച്ച പ്രസ്താവനയിറക്കിയത്.

ഹമാസ്-ഇസ്‌റാഈല്‍ ഏറ്റുമുട്ടല്‍ ഏറെ അപകടകരമായ സ്ഥിതിയാണ് ഉണ്ടാക്കിയിരിക്കുന്നത്. സാധാരണ പൗരന്മാരുടെ ജീവിതത്തെ ഇത് ഗുരുതരമായി ബാധിക്കും. ഇപ്പോള്‍ തന്നെ
നിരവധി ജീവനുകള്‍ നഷ്ടമായിക്കഴിഞ്ഞു. അക്രമ സംഭവങ്ങള്‍ തുടര്‍ന്നാല്‍ നിരപരാധികളുടെ ജീവന്‍ കൂടുതലായി നഷ്ടപ്പെടുന്നതിന് അത് ഇടവരുത്തും. ഫലസ്തീന്റെ ഭൂപ്രദേശങ്ങള്‍ ഇസ്‌റാഈല്‍ വ്യാപകമായി പിടിച്ചെടുക്കുകയും ഫലസ്തീന്‍ പൗരന്മാരെ കൊലപ്പെടുത്തുകയും ചെയ്യുന്നതാണ് പുതിയ സംഭവവികാസങ്ങളിലേക്കു വഴിതുറന്നത്. ജനാധിപത്യപരമായ രീതിയില്‍ ഇത്തരം പ്രശ്നങ്ങളെ തിരിച്ചറിഞ്ഞ് പരിഹരിക്കാനുള്ള ഇടപെടലുകളാണ് ആവശ്യമെന്നും പാര്‍ട്ടി സെക്രട്ടേറിയറ്റ് പറഞ്ഞു.

ദ്വിരാഷ്ട്ര പരിഹാരമെന്ന യു.എന്‍ രക്ഷാസമിതിയുടെ പ്രമേയം അടിയന്തിരമായി നടപ്പിലാക്കുകയും ഫലസ്തീന്‍ ജനതയുടെ ന്യായമായ അവകാശങ്ങള്‍ സംരക്ഷിക്കുകയും വേണം. ഏറ്റുമുട്ടല്‍ അവസാനിപ്പിക്കാനും സമാധാനം ഉറപ്പാക്കാനുമുള്ള നീക്കങ്ങള്‍ നടത്തണമെന്നും സെക്രട്ടേറിയറ്റ് പറഞ്ഞു.