പുരാതന നഗരം ചാന്‍ ചാനില്‍ കൂട്ടക്കുഴിമാടം; അസ്ഥിക്കൂടങ്ങള്‍ അധികവും യുവതികളുടേത്

ചാന്‍ ചാന്‍| പുരാതന നഗരമായ ചാന്‍ ചാനില്‍ 25 പേരുടെ ഭൗതികാവശിഷ്ടങ്ങള്‍ കണ്ടെത്തി. പെറുവിലെ പുരാവസ്തു ഗവേഷകരാണ് ഭൗതികാവശിഷ്ടങ്ങള്‍ കണ്ടെത്തിയത്. ചിമു സാമ്രാജ്യത്തിന്റെ തലസ്ഥാനമായിരുന്ന 10 ചതുരശ്ര മീറ്റര്‍ വിസ്തൃതിയുള്ള ഒരു ചെറിയ സ്ഥലത്താണ് അസ്ഥികൂടങ്ങള്‍ കണ്ടെത്തിയത്. ഇന്നത്തെ പെറുവിലെ ചില ഭാഗങ്ങള്‍ ചിമു സാമ്രാജ്യം ഭരിച്ചിരുന്നു. കൊളംബിയന് മുമ്പുള്ള അമേരിക്കയിലെ ഏറ്റവും വലിയ മണ്‍കോട്ടയായിരുന്നു അസ്ഥികൂടങ്ങള്‍ കണ്ടെത്തിയ ചാന്‍ ചാന്‍.

ഗവേഷകര്‍ കരുതുന്നത് ചിമുവിലെ ഉന്നതരായ അംഗങ്ങളെ അടക്കം ചെയ്ത ഒരു ശ്മശാന സ്ഥലമായിരിക്കാം ഇതെന്നാണ്. അവശിഷ്ടങ്ങളില്‍ ഭൂരിഭാഗവും മുപ്പത് വയസ്സിനു താഴെയുള്ള യുവതികളുടേതാണെന്ന് പുരാവസ്തു ഗവേഷകനായ സിന്ത്യ ക്യൂവ പറഞ്ഞു.

കണ്ടെത്തിയ അസ്ഥിക്കൂടങ്ങള്‍ വെച്ച് അവരുടെ മരണകാരണം കണ്ടെത്താന്‍ ശാസ്ത്രജ്ഞര്‍ കൂടുതല്‍ പഠനങ്ങള്‍ നടത്തും. അസ്ഥിക്കൂടങ്ങള്‍ ഇരിക്കുന്ന വിധത്തിലാണ് ഉള്ളത്. ഒപ്പം അത് തുണികൊണ്ടുള്ള പല പാളികളിലായി പൊതിഞ്ഞിരുന്നു. 50 ഓളം സെറാമിക് കഷണങ്ങളും കുഴിമാടത്തില്‍ നിന്ന് കണ്ടെത്തിയതായി ഔദ്യോഗിക വൃത്തങ്ങള്‍ അറിയിച്ചു.