ഫ്രാൻസിസ് മാർപാപ്പ: ജീവിതം ലളിതം; നിലപാടുകൾ ധീരം; ഒടുവിൽ സംസാരിച്ചത് ഗസ്സക്ക് വേണ്ടി

വത്തിക്കാൻ സിറ്റി | ലോകമെമ്പാടുമുള്ള കത്തോലിക്ക വിശ്വാസികൾക്ക് മാർഗ്ഗദീപമായിരുന്ന ഫ്രാൻസിസ് മാർപാപ്പയുടെ ജീവിതം ലാളിത്യം കൊണ്ടും വിട്ടുവീഴ്ചയില്ലാത്ത നിലപാടുകൾ കൊണ്ടും ശ്രദ്ധേയമായിരുന്നു. ഒരു അസാധാരണ വ്യക്തിത്വത്തെയാണ് കത്തോലിക്ക സഭക്ക് അദ്ദേഹത്തിന്റെ വിയോഗത്തോടെ നഷ്ടമാകുന്നത്.

സാധാരണക്കാരന്റെ ജീവിതം നയിച്ച നേതാവായിരുന്നു ഫ്രാൻസിസ് മാർപാപ്പ. ആഢംബരങ്ങളെ വെടിഞ്ഞ്, നഗരപ്രാന്തത്തിലെ ഒരു ചെറിയ അപ്പാർട്ടുമെന്റിൽ താമസിച്ച അദ്ദേഹം, പൊതുഗതാഗത മാർഗ്ഗങ്ങളെ ആശ്രയിക്കുകയും വിമാനയാത്രകളിൽ പോലും ഇക്കോണമി ക്ലാസ് തിരഞ്ഞെടുക്കുകയും ചെയ്തു. ഈ ലളിതമായ ജീവിതശൈലി ലോകമെമ്പാടുമുള്ള സാധാരണക്കാരുമായി അദ്ദേഹത്തെ കൂടുതൽ അടുപ്പിച്ചു.

നിലപാടുകളിലെ ധീരതയായിരുന്നു ഫ്രാൻസിസ് മാർപാപ്പയുടെ മുഖമുദ്ര. സാമൂഹ്യനീതിക്കും പാർശ്വവൽക്കരിക്കപ്പെട്ടവർക്കും വേണ്ടി അദ്ദേഹം എപ്പോഴും ശബ്ദമുയർത്തി. എതിർപ്പുകൾ ശക്തമായിരുന്നപ്പോഴും ശരിയുടെ പക്ഷത്ത് ഉറച്ചുനിൽക്കാൻ അദ്ദേഹം ധൈര്യം കാണിച്ചു. ദരിദ്രർക്കും കുടിയേറ്റക്കാർക്കും വേണ്ടി അദ്ദേഹം ശക്തമായി വാദിച്ചു. അമേരിക്കയുടെ കുടിയേറ്റ നയങ്ങളെ അദ്ദേഹം പരസ്യമായി വിമർശിച്ചത് ഇതിന് ഉദാഹരണമാണ്. കുടിയേറ്റക്കാരോട് അനുകമ്പയോടെ പെരുമാറണമെന്നും അവർക്കെതിരായ വിവേചനങ്ങൾ അപലപിക്കപ്പെടണമെന്നും അദ്ദേഹം ആഹ്വാനം ചെയ്തു.

വത്തിക്കാനിലെ സെന്റ് പീറ്റേഴ്സ് ബസിലിക്കയിൽ ഇന്നലെ ഈസ്റ്റർ സന്ദേശം നൽകുന്ന ഫ്രാൻസിസ് മാർപ്പാപ്പ

ആഗോളതലത്തിൽ ഫ്രാൻസിസ് മാർപാപ്പയുടെ നിലപാടുകൾ ഏറെ ശ്രദ്ധിക്കപ്പെട്ട ഒന്ന് ഗസ്സ വിഷയത്തിലായിരുന്നു. ഗസ്സയിൽ ഇസ്റാഈൽ നടത്തുന്നത് മനുഷ്യക്കുരുതിയാണെന്ന് തുറന്നുപറയാൻ അദ്ദേഹം ഒട്ടും മടിച്ചില്ല. മരിക്കുന്നതിന് തലേ ദിവസം നൽകിയ ഈസ്റ്റർ സന്ദേശത്തിൽ പോലും, ഗസ്സയിൽ ഉടനടി വെടിനിർത്തൽ പ്രഖ്യാപിക്കണമെന്നും ഫലസ്തീനിലെയും ഇസ്റാഈലിലെയും ദുരിതമനുഭവിക്കുന്നവർക്ക് വേണ്ടി ലോകം മുന്നിട്ടിറങ്ങണമെന്നും അദ്ദേഹം ആഹ്വാനം ചെയ്തു. പട്ടിണിയിലാണ്ട ഒരു ജനതയെ സഹായിക്കേണ്ടത് ലോകത്തിന്റെ കടമയാണെന്ന് അദ്ദേഹം ഓർമ്മിപ്പിച്ചു. സെൻ്റ് പീറ്റേഴ്‌സ് ബസിലിക്കയുടെ ബാൽക്കണിയിൽ നിന്ന് ആയിരക്കണക്കിന് വിശ്വാസികളെ നേരിൽ കണ്ടാണ് അദ്ദേഹം ഇന്നലെ ഈസ്റ്റർ സന്ദേശം നൽകിയത്.

മതങ്ങൾ തമ്മിലുള്ള സംവാദത്തിന്റെയും സഹകരണത്തിന്റെയും പ്രാധാന്യം ഫ്രാൻസിസ് മാർപാപ്പ എപ്പോഴും ഉയർത്തിക്കാട്ടി. ആഗോള വെല്ലുവിളികളെ നേരിടാൻ മതങ്ങൾ ഒന്നിച്ചു പ്രവർത്തിക്കേണ്ടത് അനിവാര്യമാണെന്ന് അദ്ദേഹം വിശ്വസിച്ചു. ഇതിന്റെ ഭാഗമായി, അൽ-അസ്ഹർ ഗ്രാൻഡ് ഇമാം ഷെയ്ഖ് അഹമ്മദ് എൽ-ത്വയ്യിബിനൊപ്പം ‘മനുഷ്യ സാഹോദര്യത്തെക്കുറിച്ചുള്ള രേഖ’യിൽ അദ്ദേഹം ഒപ്പുവച്ചത് ചരിത്രപരമായ ഒരു മുന്നേറ്റമായിരുന്നു. ദൈവം, മനുഷ്യ സാഹോദര്യം എന്നിവയിൽ വിശ്വസിക്കുന്ന എല്ലാവരെയും ഒരുമിപ്പിക്കാൻ ലക്ഷ്യമിട്ടുള്ളതായിരുന്നു ആ രേഖ.

പരിസ്ഥിതി സംരക്ഷണത്തിലും ഫ്രാൻസിസ് മാർപാപ്പ തൻ്റെ ആശങ്കകൾ തുറന്നു പ്രകടിപ്പിച്ചു. കാലാവസ്ഥാ വ്യതിയാനം ഭൂമിക്കും ജീവജാലങ്ങൾക്കും ഒരുപോലെ ഭീഷണിയാണെന്ന് അദ്ദേഹം 2015 മുതൽ ശക്തമായി വാദിച്ചു. സുതാര്യതയും ഉത്തരവാദിത്തവും വർദ്ധിപ്പിക്കുന്നതിനായി സഭയ്ക്കുള്ളിൽ അദ്ദേഹം നിരവധി പരിഷ്കാരങ്ങൾ കൊണ്ടുവന്നു. പുരോഹിതന്മാരുടെ ലൈംഗികവും സാമ്പത്തികവുമായ ദുരുപയോഗങ്ങൾ ഇല്ലാതാക്കാൻ അദ്ദേഹം നിർണായക നടപടികൾ സ്വീകരിച്ചു.

സമാധാനം, സാമൂഹിക നീതി, പരിസ്ഥിതി സംരക്ഷണം എന്നിവയ്ക്കായുള്ള അദ്ദേഹത്തിന്റെ അക്ഷീണമായ പ്രവർത്തനങ്ങൾക്ക് അംഗീകാരമായി 2025 ജനുവരിയിൽ അമേരിക്കൻ പ്രസിഡന്റ് ജോ ബൈഡൻ അദ്ദേഹത്തിന് പ്രസിഡൻഷ്യൽ മെഡൽ ഓഫ് ഫ്രീഡം വിത്ത് ഡിസ്റ്റിംക്ഷൻ നൽകി ആദരിച്ചു. അദ്ദേഹത്തിന്റെ വാക്കുകളും പ്രവൃത്തികളും ലോകമെമ്പാടുമുള്ള ദശലക്ഷക്കണക്കിന് ആളുകൾക്ക് പ്രത്യാശയും പ്രചോദനവും നൽകുന്നതായിരുന്നു.