Kerala
ലോകായുക്ത നിയമ ഭേദഗതി നീക്കത്തില് നിന്നും പിന്മാറണം; യെച്ചൂരിക്ക് വി ഡി സതീശന് കത്തയച്ചു
ലോക്പാല്, ലോകായുക്ത നിയമങ്ങളെ ശക്തിപ്പെടുത്തുന്നതില് യെച്ചൂരിയും സി പി എമ്മും സ്വീകരിച്ച പുരോഗമനപരമായ നിലപാടുകള്ക്ക് വിരുദ്ധമാണ് നിയമ ഭേദഗതി.
തിരുവനന്തപുരം | ലോകായുക്ത നിയമം ഭേദഗതി ചെയ്യാനുള്ള നീക്കത്തിനെതിരെ പ്രതിപക്ഷ നേതാവ് വി ഡി സതീശന് സിപിഎം ജനറല് സെക്രട്ടറി സീതാറാം യെച്ചൂരിക്ക് കത്തയച്ചു.
നിയമം ഭേദഗതി ചെയ്യാനുള്ള നീക്കത്തില്നിന്നും പിന്മാറണമെന്ന് സംസ്ഥാന സര്ക്കാരിനോട് പാര്ട്ടി കേന്ദ്ര നേതൃത്വം ആവശ്യപ്പെടണമെന്നാണ് കത്തിലെ ഉള്ളടക്കം.
ലോക്പാല്, ലോകായുക്ത നിയമങ്ങളെ ശക്തിപ്പെടുത്തുന്നതില് യെച്ചൂരിയും സി പി എമ്മും സ്വീകരിച്ച പുരോഗമനപരമായ നിലപാടുകള്ക്ക് വിരുദ്ധമാണ് നിയമ ഭേദഗതി. സി പി എമ്മിന്റെ രാഷ്ട്രീയ ധാര്മ്മികത ചോദ്യം ചെയ്യപ്പെടുന്നതും അഴിമതിക്കെതിരെ പാര്ട്ടി ഇതുവരെ സ്വീകരിച്ച നിലപാടുകള് ജനങ്ങളെ കബളിപ്പിക്കാന് മാത്രമുള്ളതായിരുന്നെന്നും കരുതേണ്ടി വരുമെന്ന് പ്രതിപക്ഷ നേതാവ് കത്തില് ചൂണ്ടിക്കാട്ടി.
നിയമ ഭേദഗതിയിലൂടെ ഗവര്ണര്ക്കോ മുഖ്യമന്ത്രിക്കോ ലോകായുക്ത വിധിക്കുമേല് ഹിയറിങ് നടത്തി ലോകായുക്തയുടെ നിര്ദ്ദേശങ്ങള് സ്വീകരിക്കുകയോ തള്ളുകയോ ചെയ്യാമെന്ന വ്യവസ്ഥയാണ് ഭേദഗതിയിലൂടെ ഉള്പ്പെടുത്തിയിരിക്കുന്നത്. സര്ക്കാരിനെതിരെ എന്ത് കേസ് കൊടുത്താലും ഒരു പ്രസക്തിയും ഉണ്ടാകാത്ത നിലയില് ലോകായുക്തയെ ദുര്ബലപ്പെടുത്തുകയാണ് ലക്ഷ്യം.
അടുത്ത മാസം നിയമസഭാ സമ്മേളനം നടക്കാനിരിക്കെ, 22 വര്ഷം പഴക്കമുള്ളൊരു നിയമത്തില് ഭേദഗതി ഓര്ഡിനന്സ് കൊണ്ടുവരുന്നതിലെ തിടുക്കവും ദുരൂഹമാണ്. കേസുകളില് സര്ക്കാരിനെ പ്രതികൂലമായി ബാധിച്ചേക്കാവുന്ന വിധിയില് നിന്നും രക്ഷപ്പെടാനാണ് ലോകായുക്തയുടെ പല്ലും നഖവും കൊഴിച്ച് നിഷ്ക്രിയമാക്കുന്നത്. അതിനാല് ലോകായുക്തയെ കഴുത്ത് ഞെരിച്ചു കൊല്ലാനുള്ള ഭേദഗതിയില് നിന്നും പിന്മാറാന് സിപിഎം നേതൃത്വത്തിലുള്ള സര്ക്കാരിനും പാര്ട്ടി കേരളഘടകത്തിനും നിര്ദ്ദേശം നല്കണമെന്നും കത്തില് വി ഡി സതീശന് അഭ്യര്ഥിച്ചു