ഇസ്‌റാഈലിന്റെ പ്രതിരോധത്തിലേക്ക് മിസൈലുകള്‍ വിജയകരമായി തുളച്ചുകയറിയതായി ഇറാന്‍

ടെഹ്‌റാന്‍ | ഇസ്‌റാഈലിനെതിരെ ഇറാന്‍ വിക്ഷേപിച്ച മിസൈലുകള്‍ ഇസ്‌റാഈലിന്റെ പ്രതിരോധത്തിലേക്ക് വിജയകരമായി തുളച്ചുകയറിയതായി ഇറാനിയന്‍ സ്റ്റേറ്റ് മീഡിയ റിപ്പോര്‍ട്ട് ചെയ്തു. ഇസ്‌റാഈലിലേക്ക് നിരവധി മിസൈലുകള്‍ വിക്ഷേപിച്ചതായി ഇറാന്‍ അവകാശപ്പെട്ടു.

ഇസ്‌റാഈല്‍ സൈന്യം അത്തരമൊരു ആക്രമണം സ്ഥിരീകരിച്ചിട്ടില്ല. ഇറാനിയന്‍ മിസൈല്‍ സൈറ്റില്‍ സ്വന്തം മിസൈലുകള്‍ വിക്ഷേപിച്ചതായി വ്യക്തമാണ്. ഇസ്‌റാഈല്‍ പ്രതിരോധ സംവിധാനങ്ങള്‍ തങ്ങളുടെ നേരെ വിക്ഷേപിക്കുന്ന മിക്ക മിസൈലുകളും തകര്‍ക്കാന്‍ കഴിഞ്ഞതായും ഇറാന്‍ അവകാശപ്പെട്ടു.

ഇറാനിലേക്ക് കൂടുതല്‍ മിസൈലുകള്‍ തൊടുത്തുവിട്ടതായി ഇസ്‌റാഈല്‍ സൈന്യം പറയുന്നു. ടെഹ്റാനിലെ മിസൈല്‍ സംവിധാനങ്ങളെയും സംഭരണ കേന്ദ്രങ്ങളെയും ലക്ഷ്യമിട്ട് പുതിയ ആക്രമണം ആരംഭിച്ചതായി ഇസ്‌റാഈല്‍ വിശദമാക്കി. ഒറ്റരാത്രികൊണ്ട്, മൂന്ന് മണിക്കൂര്‍ നീണ്ടുനിന്ന മൂന്ന് തരംഗ ആക്രമണം ആണ് നടത്തിയതെന്നും ഇസ്‌റാഈല്‍ കൂട്ടിച്ചേര്‍ക്കുന്നു.

ഇറാനുമായുള്ള ശക്തമായ പോരാട്ടം ആറാം ദിവസവും തുടര്‍ന്ന സാഹചര്യത്തില്‍ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു രാജ്യത്തെ പൗരന്മാരെ അഭിസംബോധന ചെയ്തു. ഇറാന്റെ ആണവ ഭീഷണി ഇല്ലാതാക്കാനുള്ള പ്രവര്‍ത്തനവുമായി രാജ്യം മുന്നോട്ട് നീങ്ങുകയാണെന്നും ഇറാന്റെ തലസ്ഥാനമായ ടെഹ്റാനിന്റെ ആകാശം ഇസ്‌റാഈല്‍ നിയന്ത്രണത്തിലാണെന്നും അദ്ദേഹം അവകാശപ്പെട്ടു.

വേദനാജനകമായ നഷ്ടങ്ങള്‍ രാജ്യത്ത് ഉണ്ടായിട്ടുണ്ടെങ്കിലും ഇസ്‌റാഈലിന്റെ പോരാട്ടം ശക്തമായി തുടരുന്നുവെന്ന് നെതന്യാഹു പറഞ്ഞു. അതേസമയം, ഗസയിലെ പോരാട്ടത്തില്‍ നിന്നു പിന്തിരിയില്ലെന്നും അദ്ദേഹം സൂചന നല്‍കി. ഹമാസിനെ പരാജയപ്പെടുത്തുന്നതിനും ശേഷിക്കുന്ന ബന്ദികളെ മോചിപ്പിക്കുന്നതിനും ഇസ്‌റാഈല്‍ പ്രതിജ്ഞാബദ്ധമാണെന്നും പറഞ്ഞു. അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പിന്തുണയ്ക്ക് നെതന്യാഹു നന്ദി പറഞ്ഞു. ലോക നേതാക്കള്‍ പതിവായി ബന്ധപ്പെട്ടിരുന്നുവെന്നും അദ്ദേഹം കൂട്ടിച്ചേര്‍ത്തു.