വി എസിന് ആദരാഞ്ജലികളര്‍പ്പിച്ച് സിനിമാ താരങ്ങള്‍

തിരുവനന്തപുരം | മുന്‍ മുഖ്യമന്ത്രിയും മുതിര്‍ന്ന സി പി എം നേതാവുമായ വി എസ് അച്യുതാനന്ദന്റെ വിയോഗത്തില്‍ അനുശോചനവുമായി സിനിമാ താരങ്ങള്‍. ജീവിതം തന്നെ സമരമാക്കിയ ജനനായകന്‍ പ്രിയപ്പെട്ട സഖാവ് വി എസിന് കണ്ണീരില്‍ കുതിര്‍ന്ന ആദരാഞ്ജലികള്‍ എന്നാണ് നടന്‍ മോഹന്‍ലാല്‍ ഫേസ് ബുക്കില്‍ കുറിച്ചത്. സാധാരണക്കാരുടെ പ്രതീക്ഷയും, പ്രത്യാശയുമായി തിളങ്ങിനിന്ന ആ മഹദ് വ്യക്തിത്വവുമായി എക്കാലത്തും സ്‌നേഹബന്ധം പുലര്‍ത്താനായത് ഭാഗ്യമായി കാണുന്നു. മൂന്ന് തവണ പ്രതിപക്ഷ നേതാവായും, ഒരു തവണ മുഖ്യമന്ത്രിയായും സേവനമനുഷ്ഠിച്ച അദ്ദേഹം നിലപാടുകളിലും ആദര്‍ശത്തിലും എക്കാലവും ഉറച്ചുനിന്നു. മലയാളിയുടെ മനസില്‍ അദ്ദേഹത്തിന് മരണമില്ലെന്നും മോഹന്‍ലാല്‍ അനുശോചന സന്ദേശത്തില്‍ കുറിച്ചു.

പ്രിയ സഖാവ് വി എസിന് ആദരാഞ്ജലികള്‍ നേരുന്നതായി നടന്‍ മമ്മൂട്ടിയും മലയാളികളുടെ സ്വന്തം സമരനായകന്‍, സഖാവ് വി എസ് അച്യുതാനന്ദന് ആദരാഞ്ജലികള്‍ നേരുന്നതായി നടനും കേന്ദ്രമന്ത്രിയുമായ സുരേഷ് ഗോപിയും കുറിച്ചു.

വി എസിന്റെ കാല്‍പാദത്തില്‍ ഒരു മുറിവിന്റെ പാട് ഇന്നുമുള്ളതായി ഒരിക്കല്‍ വായിച്ചത് ഓര്‍ക്കുന്നതായി നടി മഞ്ജുവാര്യര്‍ പറഞ്ഞു. പുന്നപ്ര-വയലാര്‍ സമരത്തിന്റെ ഓര്‍മയായ ബയണറ്റിന്റെ അടയാളമാണത്. ആ കാല്‍പാദം കൊണ്ടാണ് അദ്ദേഹം ജനഹൃദയങ്ങളിലേക്ക് നടന്നുകയറിയത്. അത് ഓരോ ചുവടിലും സൂക്ഷിച്ചിരുന്നതു കൊണ്ടാണ് അദ്ദേഹം എന്നുമൊരു പോരാളിയായിരുന്നത് എന്നും സ്ത്രീ സുരക്ഷയ്ക്കായുള്ള വി എസിന്റെ നിലപാടുകള്‍ കാലത്തിന്റെ ആവശ്യകത കൂടിയായിരുന്നുവെന്നും മഞ്ജുവാര്യര്‍ അനുശോചന സന്ദേശത്തില്‍ പറഞ്ഞു.

നടന്മാരായ പൃഥ്വിരാജ്, ഇന്ദ്രജിത്ത്, അജു വര്‍ഗീസ്, നിവിന്‍ പോളി, ടൊവിനോ തോമസ്, ബേസില്‍, ആസിഫ് അലി, നടിമാരായ നിഖില വിമല്‍, റിമ കല്ലിങ്കല്‍, സംവിധായകരായ ഷാജി കൈലാസ്, ആഷിഖ് അബു തുടങ്ങിയവരും അനുശോചനം രേഖപ്പെടുത്തി.