FACT CHECK: 'ആരെന്ത് പറഞ്ഞാലും കൊവിഡ് മൂന്നാം തരംഗം യാഥാര്‍ഥ്യമാണ്'; ഡോക്ടറുടെ പേരിലുള്ള പോസ്റ്റിന്റെ വസ്തുതയെന്ത്?

വസ്തുത : വാട്ട്സാപ്പിൽ തന്റെ പേരിൽ പ്രചരിക്കുന്ന കുറിപ്പ് എഴുതിയത് താനല്ലെന്നും അങ്ങനെ പറഞ്ഞിട്ടില്ലെന്നും ആസ്റ്റർ ഹോസ്പിറ്റൽ എമർജൻസി വിഭാഗം മേധാവി ഡോ. പി പി വേണുഗോപാൽ അറിയിച്ചു. ഇതിനെതിരെ ഇദ്ദേഹം സൈബർ പോലീസിൽ പരാതി നൽകിയുണ്ട്. മാസങ്ങൾക്കു മുമ്പും ഇദ്ദേഹത്തിന്റെ പേരിൽ സമാനമായ പ്രചാരണം നടന്നിരുന്നു. കൊവിഡിന്റെ പുതിയ വകഭേദ ഭീതി നിലനിൽക്കുന്ന സാഹചര്യത്തിൽ ആളുകളെ തെറ്റിധരിപ്പിക്കുന്ന ഇത്തരത്തിലുള്ള വ്യാജ സന്ദേശങ്ങൾ പുറത്ത് വിടുന്നത് വളരെ ഗൗരവകരമായ പ്രശ്‌നമാണെന്ന് ഡോ. പി പി വേണുഗോപാൽ പറഞ്ഞു. വൈറസിനെക്കാളും വളരെ അപകടകരമാണ് ഇത്തരം വ്യാജ സന്ദേശങ്ങൾ.ഇത്തരം വ്യാജ പ്രചാരണങ്ങൾ ജനം വിശ്വസിക്കരുതെന്നും ആരോഗ്യവകുപ്പ് പുറത്ത് വിടുന്നത് മാത്രം വിശ്വസിക്കണമെന്നും അദ്ദേഹം പറഞ്ഞു. സന്ദേശത്തിന്റെ ഉറവിടം ഡൽഹിയാണെന്നും അതിന്റെ പരിഭാഷപ്പെടുത്തിയ രൂപമാണ് കേരളത്തിൽ പ്രചരിപ്പിക്കുന്നതെന്നുമാണ് പോലിസ് അറിയിച്ചത്. ഈ സന്ദേശങ്ങളിൽ ചില മാറ്റങ്ങൾ വരുത്തിയാണ് വീണ്ടും പ്രചാരണം നടത്തുന്നത്.
നിജസ്ഥിതി മനസ്സിലാക്കാതെ ചില ഓൺലൈൻ മാധ്യമങ്ങളും ഇത് ഏറ്റെടുത്തതായി ശ്രദ്ധയിൽപ്പെട്ടിട്ടുണ്ട്. ഇത്തരം വ്യാജ പ്രചാരണങ്ങളിൽ തനിക്കോ സ്ഥാപനത്തിനോ യാതൊരു ഉത്തരവാദിത്തവും ഇല്ലെന്നും ഡോ. വേണുഗോപാൽ അറിയിച്ചു.