ബഹിരാകാശ ഗവേഷണം: യു എ ഇ സ്വന്തമായി റോക്കറ്റ് നിര്‍മിക്കും

ദുബൈ | ബഹിരാകാശത്തേക്ക് ഉപഗ്രഹങ്ങളെ വഹിക്കുന്ന പുനരുപയോഗിക്കാവുന്ന റോക്കറ്റുകള്‍ വികസിപ്പിക്കാന്‍ യു എ ഇ ശ്രമം. സ്വകാര്യ പങ്കാളിത്തം ഈ സംരംഭത്തിനുണ്ട്. ആഗോള ബഹിരാകാശ മത്സരത്തില്‍ രാജ്യത്തിന്റെ കുതിച്ചുയരുന്ന അഭിലാഷങ്ങള്‍ക്ക് ഇത് പ്രചോദനമാകും.

യൂറോപ്യന്‍ എയ്‌റോസ്‌പേസ് സ്ഥാപനമായ ആസ്പയര്‍ സ്‌പേസ്, ആസ്ഥാനം എമിറേറ്റ്‌സിലേക്ക് മാറ്റുകയും ദുബൈയിലെ ലീപ് 71-മായി ചേര്‍ന്ന് രണ്ട് ഘട്ടങ്ങളുള്ള റോക്കറ്റ് സംവിധാനം നിര്‍മിക്കുകയും ചെയ്യും. ഭൂമിയുടെ താഴ്ന്ന ഭ്രമണപഥത്തിലേക്ക് 15 ടണ്‍ വരെ ഭാരമുള്ള വസ്തുക്കള്‍ വഹിക്കാന്‍ കഴിയുന്ന തരത്തിലാണ് ഈ റോക്കറ്റ് രൂപകല്‍പന ചെയ്തിരിക്കുന്നത്. 2030ല്‍ ആദ്യ വിക്ഷേപണം പദ്ധതിയിട്ടിട്ടുണ്ട്. യു എസ്, റഷ്യ, യൂറോപ്പ്, ചൈന തുടങ്ങിയ രാജ്യങ്ങള്‍ക്ക് മാത്രമാണ് ഈ കഴിവുള്ളത്. ബഹിരാകാശത്ത് പരമാധികാര പ്രവേശനം സ്ഥാപിക്കാന്‍ യു എ ഇയെ ഈ കരാര്‍ സഹായിക്കുമെന്ന് ആസ്പയറിന്റെ ചീഫ് എക്സിക്യൂട്ടീവ് സ്റ്റാന്‍ റുഡെന്‍കോ അറിയിച്ചു. നിര്‍മിത ബുദ്ധി ഉപയോഗിച്ച് ലീപ് 71 രൂപകല്‍പന ചെയ്തതാണ് റോക്കറ്റ്. ദ്രാവക മീഥെയ്നും ദ്രാവക ഓക്സിജനും ഉപയോഗിക്കുന്ന മെത്തലോക്സ് എന്‍ജിനുകളാണ് ആസ്പയറിന്റെ റോക്കറ്റിന് കരുത്ത് പകരുന്നത്. പ്രൊപ്പല്‍ഷന്‍ സിസ്റ്റങ്ങള്‍ പൂര്‍ണമായും യു എ ഇയിലാണ് നിര്‍മിക്കുക. ഈ റോക്കറ്റുകള്‍ക്കായുള്ള വിക്ഷേപണ സ്ഥലം ഇതുവരെ സ്ഥിരീകരിച്ചിട്ടില്ല.

അന്താരാഷ്ട്ര ബഹിരാകാശ നിലയത്തിലേക്ക് ബഹിരാകാശ യാത്രികരെ അയക്കുന്നത് മുതല്‍ ചൊവ്വയിലേക്ക് ഒരു അന്വേഷണം വിക്ഷേപിക്കുകയും ചന്ദ്ര റോവറുകള്‍ വികസിപ്പിക്കുകയും ചെയ്യുന്നത് വരെയുള്ള ബഹിരാകാശ അഭിലാഷങ്ങളില്‍ യു എ ഇ ഗണ്യമായ പുരോഗതി കൈവരിച്ചിട്ടുണ്ട്. ആഭ്യന്തരമായി നിര്‍മിച്ച റോക്കറ്റുകള്‍ ഉപയോഗിച്ച് സ്വന്തം ദൗത്യങ്ങള്‍ വിക്ഷേപിക്കാനുള്ള കഴിവ് വലിയ നേട്ടമാകും.