ശൈഖ് ഹംദാൻ അറേബ്യൻ ട്രാവൽ മാർക്കറ്റ് സന്ദർശിച്ചു

ദുബൈ|ദുബൈ കിരീടാവകാശിയും യു എ ഇ ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് അൽ മക്തൂം അറേബ്യൻ ട്രാവൽ മാർക്കറ്റ് (എ ടി എം)  സന്ദർശിച്ചു. ആഗോള വിപണികളെ ബന്ധിപ്പിക്കുന്നതിലും ആഗോള യാത്രയുടെ ഭാവി രൂപപ്പെടുത്തുന്നതിലും യു എ ഇയുടെ പങ്ക് ഈ വർഷത്തെ എ ടി എം വീണ്ടും പ്രതിഫലിപ്പിക്കുന്നുവെന്ന് അദ്ദേഹം പറഞ്ഞു. ദുബൈയുടെ ആഗോള മത്സരശേഷി ശക്തിപ്പെടുത്തുന്നതിനും  ആശയങ്ങൾ, കഴിവുകൾ, നവീകരണം എന്നിവയുടെ ഒരു ആഗോള കേന്ദ്രമായി ദുബൈയിയെ സ്ഥാപിക്കാനും ഞങ്ങൾ പ്രതിജ്ഞാബദ്ധരാണ്- അദ്ദേഹം കൂട്ടിച്ചേർത്തു.

നിരവധി അന്താരാഷ്ട്ര പവലിയനുകൾ ശൈഖ് ഹംദാൻ സന്ദർശിച്ചു. ഈ വർഷത്തെ എ ടി എമ്മിൽ അന്താരാഷ്ട്ര പ്രദർശക പങ്കാളിത്തത്തിൽ ഗണ്യമായ വർധനവ് രേഖപ്പെടുത്തിയിട്ടുണ്ട്,
ഈ വർഷത്തെ പരിപാടിയിൽ വ്യോമയാനത്തിന്റെ ഭാവി, ആതിഥ്യമര്യാദയിലെ ഉയർന്നുവരുന്ന പ്രവണതകൾ, കാലാവസ്ഥാ പ്രവർത്തന സംരംഭങ്ങൾ, മേഖലയിലുടനീളം കൃത്രിമബുദ്ധി സ്വീകരിക്കൽ എന്നിവയുൾപ്പെടെ വൈവിധ്യമാർന്ന വിഷയങ്ങൾ ചർച്ച ചെയ്യുന്നു.