കോന്നിയില്‍ അനുവദിച്ചതിലും കൂടുതല്‍ പാറ പൊട്ടിച്ചോ എന്ന കാര്യം അന്വേഷിക്കും; ജില്ലാ കളക്ടര്‍ പ്രേം കൃഷ്ണന്‍

പത്തനംതിട്ട| പത്തനംതിട്ട കോന്നിയില്‍ പാറയിടിഞ്ഞ് അപകടമുണ്ടായ പാറമടയ്ക്ക് 2026 ഫെബ്രുവരി വരെ പെര്‍മിറ്റ് ഉള്ളതായി ജില്ലാ കളക്ടര്‍ പ്രേം കൃഷ്ണന്‍. ക്വറിക്കെതിരെ നേരത്തെയും നാട്ടുകാര്‍ മലിനീകരണം അടക്കമുള്ള പരാതികള്‍ നല്‍കിയിരുന്നു. എന്നാല്‍ പരിശോധനയില്‍ അത്തരത്തിലൊന്നും കണ്ടെത്താന്‍ സാധിച്ചിരുന്നില്ലെന്നും കളക്ടര്‍ പറഞ്ഞു. എന്നാല്‍ അനുവദിച്ചതിലും കൂടുതല്‍ പാറ പൊട്ടിച്ചോ, അനുവദിച്ച സ്ഥലത്തായിരുന്നോ പാറ പൊട്ടിച്ചത് എന്നതടക്കമുള്ള കാര്യങ്ങളില്‍ അന്വേഷണം നടത്തുമെന്ന് ജില്ലാ കളക്ടര്‍ പ്രേം കൃഷ്ണന്‍ വ്യക്തമാക്കി.

ജിയോളജി വകുപ്പിനോട് വിശദമായ റിപ്പോര്‍ട്ട് തരാന്‍ ആവശ്യപ്പെട്ടിട്ടുണ്ട്. രക്ഷാപ്രവര്‍ത്തനം ഉടന്‍ തുടങ്ങുമെന്നും കളക്ടര്‍ മാധ്യമങ്ങളോട് പറഞ്ഞു. ഫയര്‍ഫോഴ്സും എന്‍ഡിആര്‍എഫ് സംഘവും സംയുക്തമായാണ് പാറയിടിഞ്ഞയിടത്ത് തിരച്ചില്‍ നടത്തുന്നത്. ജാര്‍ഖണ്ഡ് സ്വദേശി അജയ് റായ് എക്‌സ്‌കവേറ്ററിനുളളില്‍ കുടുങ്ങിക്കിടക്കുന്നതായാണ് സംശയം. സ്ഥലത്ത് വീണ്ടും പാറക്കല്ലുകള്‍ ഇടിഞ്ഞുവീഴുന്നത് രക്ഷാപ്രവര്‍ത്തനത്തിന് ആശങ്കയുയര്‍ത്തുന്നുണ്ട്. അപകടസ്ഥലത്തേക്ക് രക്ഷാപ്രവര്‍ത്തകര്‍ക്ക് മാത്രമാണ് പ്രവേശിക്കാന്‍ അനുമതി നല്‍കിയിട്ടുള്ളത്.