ഇതൊരു പുതിയ യാത്രയുടെ ആരംഭം

കോഴിക്കോട്- മലപ്പുറം ജില്ലകളെ ബന്ധിപ്പിച്ച് ചാലിയാർ പുഴക്ക് കുറുകെ എളമരം കടവിൽ നിർമിച്ച പാലം ഇന്ന് പൊതുമരാമത്ത് മന്ത്രി പി എ മുഹമ്മദ് റിയാസ് ഉദ്ഘാടനം ചെയ്യുന്നത് പുതിയ യാത്രയുടെ ആരംഭമാണെന്ന് മുസ്ലിം ലീഗ് എം പി. ഇ ടി മുഹമ്മദ് ബഷീർ. പാലം വരുന്നതോടെ ഇക്കരെയുള്ള മലപ്പുറം ജില്ലയിലെ എളമരം പ്രദേശത്തുകാർക്ക് അര മണിക്കൂർ കൊണ്ട് കോഴിക്കോട്ട് എത്താം. മെഡിക്കൽ കോളജ് നമ്മുടെ അടുത്തേക്കാവുന്നു. ചാലിയാറിന് ഇക്കരെയുള്ള ഗ്രാമീണ ജനങ്ങൾ കോഴിക്കോട് നഗരത്തിൻ്റെ തന്നെ ഭാഗമായി വന്നേക്കും. പുതിയ പ്രതീക്ഷകൾ, പുതിയ വികസന സാധ്യതകൾ, പുതിയ മനുഷ്യബന്ധങ്ങൾ, പുതിയ സാംസ്കാരിക സവിശേഷതകൾ എല്ലാമെല്ലാം ഇനി ജന്മമെടുക്കുമായിരിക്കും. ഈ പാലം തുറക്കപ്പെടുമ്പോൾ അത് എൻ്റെ ജീവിതത്തിൻ്റെ ഭൂതകാല ചിന്തകളുടേയും വർത്തമാനകാല സങ്കൽപ്പങ്ങളുടെയും ഇടയിലുള്ള മറ്റൊരു പാലമായാണ് എനിക്ക് അനുഭവപ്പെടുന്നതെന്നും അദ്ദേഹം ഫേസ്ബുക്കിൽ കുറിച്ചു. പോസ്റ്റ് പൂർണരൂപത്തിൽ:

എളമരം കടവ് പാലം യാഥാർത്ഥ്യമാവുകയാണ്. എളമരം കടവും ചാലിയാർ പുഴയും ഒരു കാലത്ത് എൻ്റെ ജീവിതത്തിൻ്റെ തന്നെ ഭാഗമായിരുന്നു. കുട്ടിക്കാലത്ത് കുടിവെള്ളവും കളിയും കുളിയുമെല്ലാം പുഴയിലായിരുന്നു. പഴയ തലമുറയിൽ ചാലിയാർ കൊണ്ടു മാത്രം ജീവിച്ചു പോന്ന അനേകമാളുകളുണ്ടായിരുന്നു. മീൻ പിടിച്ചും കക്ക വാരിയും ചരക്കുകൾ കൊണ്ടുപോയും ചാലിയാറിനെ അവർ ഉപജീവനത്തിന് ഉപയോഗപ്പെടുത്തി.

എൻ്റെ ഓർമകളിൽ മുമ്പ് ചാലിയാറിൽ ഒരൊറ്റ പാലമാണ് ഉണ്ടായിരുന്നത്. അത് ഫറോഖിലെ പാലമായിരുന്നു. കാലം മാറിയപ്പോൾ ഒട്ടനവധി പാലങ്ങളുണ്ടായി. ചാലിയാറിലെ മറുകരയിൽ മാവൂരിൽ ഫാക്ടറി വന്ന കാലം. അതിൻ്റെ തുടക്കം മുതൽ ഒടുക്കം വരെ കണ്ട തലമുറയിൽപ്പെട്ട ഒരാളാണ് ഞാൻ. കമ്പനി വരുന്നതിന് മുമ്പ് മണ്ണ് പരിശോധിക്കാൻ വന്ന സായിപ്പിനെ കാണാൻ പോയ കൂട്ടത്തിൽ ഞാനുമുണ്ടായിരുന്നു.

രാത്രി 11 മണിക്ക് ശേഷം തോണി സമയം കഴിഞ്ഞാൽ മാവൂരിലേക്ക് തന്നെ തിരിച്ചുപോയി എസ്.ടി.യു ഓഫീസിലോ മറ്റോ കിടന്നുറങ്ങും. വേനൽ ക്കാലത്ത് പുഴയിൽ ഇറങ്ങി നടക്കുന്ന കാലം. രാത്രിയിൽ വസ്ത്രം മാറി തോർത്ത് മുണ്ടുടുത്ത് ഷർട്ടും തുണിയുമൊക്കെ കെട്ടാക്കി തലയിൽ വെച്ച് നീന്തിക്കടന്ന് അക്കരെ പറ്റിയ ആ കാലം ഓർക്കുമ്പോൾ ഇപ്പോൾ തമാശയായി തോന്നും. ആ മുണ്ടുടുത്ത് തന്നെയാണ് രാത്രി വീട്ടിലേക്ക് നടന്നു പോയിരുന്നത്.

ചാലിയാറിൽ പുഴമാടുകളുണ്ടായിരുന്നു. അതിൻ്റെ തീരത്ത് പലരും പച്ചക്കറി കൃഷി നടത്തി. അവിടെ വിശാലമായ മണൽപ്പുറത്ത് ഇരുന്ന് കാറ്റ് കൊണ്ട് സായാഹ്നങ്ങൾ ചെലവഴിക്കുന്നത് ഞങ്ങളുടെ തലമുറയിൽപ്പെട്ടവർക്ക് ഇഷ്ടപ്പെട്ട ഒന്നായിരുന്നു.

പാലം ഉദ്ഘാടനം ചെയ്യുന്നതോടെ എളമരം കടവിലെ അവസാന കടത്തു തോണിയും ബോട്ടുമെല്ലാം ഓർമയാവും. കാലം മാറി, ഇനി ഞങ്ങൾക്കെന്തു കാര്യമെന്നു പറഞ്ഞ് അവർ യാത്ര ചോദിക്കുകയാണ്. ഇതൊരു പുതിയ യാത്രയുടെ ആരംഭമാണ്. അര മണിക്കൂർ കൊണ്ട് കോഴിക്കോട്ട് എത്താം. മെഡിക്കൽ കോളജ് നമ്മുടെ അടുത്തേക്കാവുന്നു. ചാലിയാറിന് ഇക്കരെയുള്ള ഗ്രാമീണ ജനങ്ങൾ കോഴിക്കോട് നഗരത്തിൻ്റെ തന്നെ ഭാഗമായി വന്നേക്കും. പുതിയ പ്രതീക്ഷകൾ, പുതിയ വികസന സാധ്യതകൾ, പുതിയ മനുഷ്യബന്ധങ്ങൾ, പുതിയ സാംസ്കാരിക സവിശേഷതകൾ എല്ലാമെല്ലാം ഇനി ജന്മമെടുക്കുമായിരിക്കും. ഈ പാലം തുറക്കപ്പെടുമ്പോൾ അത് എൻ്റെ ജീവിതത്തിൻ്റെ ഭൂതകാല ചിന്തകളുടേയും വർത്തമാനകാല സങ്കൽപ്പങ്ങളുടെയും ഇടയിലുള്ള മറ്റൊരു പാലമായാണ് എനിക്ക് അനുഭവപ്പെടുന്നത്.