ലോറിയിലെ കമ്പി ശരീരത്തിൽ തുളച്ചുകയറി ബൈക്ക് യാത്രക്കാരൻ മരിച്ചു

തൃശൂർ |  പറന്നുപോയ ടാർപ്പായ എടുക്കാനായി നിർത്തിയ ലോറിക്ക് പിന്നിൽ ബൈക്കിടിച്ച് യുവാവിന് ദാരുണാന്ത്യം. തൃശൂരിലെ ചെമ്പൂത്രയിലാണ് അപകടം. പുതുക്കോട് മണപ്പാടം സ്വദേശി ശ്രീശൈലം വീട്ടിൽ ശൈലേശൻ്റെ മകൻ ശ്രദേഷ് (21) ആണ് മരിച്ചത്. കഴുത്തിലും നെഞ്ചിലും കമ്പി കുത്തിക്കയറിയാണ് ശ്രദേഷ് മരിച്ചത്.

ഇന്ന് വൈകീട്ട് 4.15ന് പാലക്കാട് ഭാഗത്തേക്കുള്ള പാതയിലാണ് അപകടം ഉണ്ടായത്. കമ്പി കയറ്റിയ ലോറി ദേശീയപാത ആരംഭിക്കുന്ന ഭാഗത്ത് നിർത്തിയിട്ടിരിക്കുകയായിരുന്നു. ഇത് അറിയാതെയെത്തിയ ബൈക്ക് യാത്രക്കാരൻ ലോറിക്ക് പിന്നിൽ ഇടിച്ചു കയറുകയായിരുന്നു. പീച്ചി പോലീസ് സ്ഥലത്തെത്തി പോലീസ് വാഹനത്തിൽ തന്നെ ഇയാളെ തൃശൂരിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

അതിനിടെ, വാഹനത്തിൽ ഇരുമ്പ് കമ്പികൾ പോലുള്ളവ കൊണ്ടുപോകുമ്പോൾ ഉണ്ടാകേണ്ട അപകട മുന്നറിയിപ്പ് സംവിധാനങ്ങളോ വാഹനം നിർത്തിയിട്ടിരിക്കുകയാണെന്ന അപകട സൂചനയോ  ഉണ്ടായിരുന്നില്ല. ഇതാണ് അപകടത്തിന് വഴിയൊരുക്കിയതെന്നാണ് നാട്ടുകാർ ആരോപിക്കുന്നത്. എന്നാൽ, പറന്നുപോയ ടാർപ്പായ എടുക്കാനായാണ് വാഹനം ദേശീയപാതയിൽ നിർത്തിയതാണെന്നാണ് ഡ്രൈവർ വിശദീകരിക്കുന്നത്.