ഫോര്‍ട്ട് കൊച്ചിയില്‍ നിന്നും കാണാതായ കുട്ടികളെ തമ്പാനൂരില്‍ നിന്നും കണ്ടെത്തി

കൊച്ചി| ഫോര്‍ട്ട് കൊച്ചിയില്‍ നിന്നും കാണാതായ മൂന്ന് കുട്ടികളെ തിരുവനന്തപുരത്തെ തമ്പാനൂരില്‍ നിന്നും കണ്ടെത്തി. കുട്ടികള്‍ ഇപ്പോള്‍ തമ്പാനൂര്‍ പോലീസ് സ്റ്റേഷനിലാണുള്ളത്. ഇന്നലെ രാവിലെ മുതലാണ് കുട്ടികളെ കാണാതായത്. റെയില്‍വേ സ്റ്റേഷന്‍ പരിസരത്ത് ഇവര്‍ കറങ്ങി നടക്കുന്നത് പോലീസിന്റെ ശ്രദ്ധയില്‍പെടുകയായിരുന്നു. നാട് കാണാനിറങ്ങിയതാണ് എന്നാണ് കുട്ടികള്‍ പോലീസിനോട് പറഞ്ഞിരിക്കുന്നത്. ഇവരുടെ കയ്യില്‍ വസ്ത്രങ്ങള്‍ നിറച്ച ബാഗുമുണ്ടായിരുന്നെന്ന് പോലീസ് പറഞ്ഞു.

ലാസര്‍ മാര്‍ക്കറ്റിന് സമീപം താമസിക്കുന്ന ഷമീറിന്റെ മക്കളായ പതിഞ്ചുകാരന്‍ മുഹമ്മദ് അഫ്രീദ്, പതിമൂന്നുകാരന്‍ മുഹമ്മദ് ഹഫീസ്, അയല്‍വാസിയായ ഫറാദിന്റെ മകന്‍ 15കാരന്‍ അദീന്‍ മുഹമ്മദ് എന്നിവരെയാണ് ഇന്നലെ രാവിലെ മുതല്‍ കാണാതായത്. വീട്ടില്‍ നിന്ന് 3000 രൂപയുമായാണ് വിദ്യാര്‍ത്ഥികള്‍ പോയത്. ഗോവയിലേക്ക് പോകുന്നതിനെ കുറിച്ച് വിദ്യാര്‍ഥികള്‍ സംസാരിച്ചതായും ഫോണില്‍ ഗോവയിലേക്കുള്ള ദൂരം സെര്‍ച്ച് ചെയ്തതതായും പോലീസ് കണ്ടെത്തിയിരുന്നു. എന്നാല്‍ കുട്ടികളുടെ യാത്രയുടെ ലക്ഷ്യമെന്തായിരുന്നെന്ന് വ്യക്തമല്ല. കുട്ടികളുടെ മാതാപിതാക്കള്‍ ഫോര്‍ട്ട് കൊച്ചിയില്‍ നിന്ന് തിരുവനന്തപുരത്തേക്ക് തിരിച്ചിട്ടുണ്ട്.