Kerala

മൂല്യങ്ങൾ പഠിക്കുന്നതിലും വിദ്യാർഥികൾ മത്സരിക്കട്ടെ: കാന്തപുരം

മർകസ് ടീച്ചേർസ് കമ്യൂണിയൻ 'ഓൺബോർഡ്' സമാപിച്ചു

Published

May 31, 2025 6:28 pm |

Last Updated

May 31, 2025 6:28 pm

വെബ് ഡെസ്‌ക്

കോഴിക്കോട് | സിലബസിലുള്ള പാഠങ്ങൾ പഠിച്ച് ഒന്നാമനാവാൻ മത്സരിക്കുന്നത് പോലെ നമ്മുടെ നാടിന്റെ സവിശേഷ സംസ്കാരവും മൂല്യങ്ങളും അടുത്തറിയാനും പ്രയോഗവത്കരിക്കാനും വിദ്യാർഥികൾ മത്സരിക്കണമെന്ന് കാന്തപുരം എ പി അബൂബക്കർ മുസ്‌ലിയാർ. മർകസ് മാനേജ്‌മെന്റിന് കീഴിൽ സംസ്ഥാനത്തിന്റെ വിവിധ ഭാഗങ്ങളിലായി പ്രവർത്തിക്കുന്ന എയ്‌ഡഡ്‌ സ്കൂളുകളിലെ അധ്യാപകരുടെ സംഗമം ‘ഓൺബോർഡ് ടീച്ചേർസ് കമ്യൂണിയൻ’ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നാടും സംസ്കാരവും ഒന്നിനും കൊള്ളില്ല എന്ന രീതിയിൽ അധ്യാപനം നടത്തരുത്. മതസൗഹാർദ്ദവും ബഹുമാനവും നേരും നന്മയുമൊക്കെ നമ്മുടെ നാടിന്റെ മൂല്യങ്ങളാണ്. അവ മുറുകെ പിടിക്കാൻ വിദ്യാർഥികളെ പ്രേരിപ്പിക്കണം. ഈ വർഷം സർക്കാർ നടപ്പിലാക്കുന്ന ധാർമിക ബോധവത്കരണ ക്ലാസുകൾ സ്വാഗതാർഹമാണ്. മത സംഘടനകൾ ഏറെ കാലമായി ആവശ്യപ്പെടുന്ന കാര്യമാണത്. ലഹരിയുൾപ്പെടെ എല്ലാ തിന്മകളെയും തുരുത്താൻ ക്ലാസ് മുറികൾക്ക് സാധിക്കുമെന്നും കാന്തപുരം പറഞ്ഞു.

കാമിൽ ഇജ്തിമയിൽ നടന്ന സംഗമത്തിൽ മർകസ് ഡയറക്ടർ ജനറൽ സി മുഹമ്മദ് ഫൈസി അധ്യക്ഷത വഹിച്ചു. ജാമിഅ റെക്ടർ ഡോ. മുഹമ്മദ് അബ്ദുൽ ഹകീം അസ്ഹരി സന്ദേശ പ്രഭാഷണം നടത്തി. ഡോ. ടി പി ശശികുമാർ അക്കാഡമിക് എംപവർമെൻറ് സെഷന് നേതൃത്വം നൽകി. വിവിധ മേഖലകളിൽ മികവ് പുലർത്തിയ സ്കൂളുകൾക്കും അധ്യാപകർക്കും ചടങ്ങിൽ ഉപഹാരം നൽകി. മർകസ് ഡയറക്ടർ സി പി ഉബൈദുല്ല സഖാഫി, അക്കാദമിക് വിഭാഗം അസോസിയേറ്റ് ഡയറക്ടർ ഉനൈസ് മുഹമ്മദ്, അക്ബർ ബാദുഷ സഖാഫി, ഡോ. നാസർ കുന്നുമ്മൽ സംസാരിച്ചു.