EXPLAINER | പരീക്ഷയിൽ സമഗ്ര പരിഷ്കാരവുമായി സിബിഎസ്ഇ; എന്താണ് ഓൺ സ്ക്രീൻ മാർക്കിംഗ്?

ന്യൂഡൽഹി | 2026-ലെ സി ബി എസ് ഇ. പത്താം ക്ലാസ്, പന്ത്രണ്ടാം ക്ലാസ് പരീക്ഷാ നടത്തിപ്പുമായി ബന്ധപ്പെട്ട് നിർണ്ണായക വിവരങ്ങൾ പുറത്തുവിട്ടു. പരീക്ഷാ കൺട്രോളർ ഡോ. സംയം ഭരദ്വാജിന്റെ നേതൃത്വത്തിൽ നടന്ന ലൈവ് വെബ്കാസ്റ്റിലാണ് അധ്യാപകർക്കും വിദ്യാർഥികൾക്കും രക്ഷിതാക്കൾക്കുമായുള്ള മാർഗ്ഗനിർദ്ദേശങ്ങൾ വ്യക്തമാക്കിയത്. ഇത്തവണത്തെ പരീക്ഷാ രീതിയിലും മൂല്യനിർണ്ണയത്തിലും വലിയ മാറ്റങ്ങളാണ് ബോർഡ് കൊണ്ടുവരുന്നത്.

എന്താണ് ഓൺ സ്ക്രീൻ മാർക്കിംഗ് (OSM)?

സി ബി എസ് ഇ. പന്ത്രണ്ടാം ക്ലാസ് പരീക്ഷാ പേപ്പറുകൾക്കായി നടപ്പിലാക്കുന്ന ഓൺ സ്ക്രീൻ മാർക്കിംഗ് (OSM) എന്നത് ഉത്തരക്കടലാസുകൾ ഡിജിറ്റലായി മൂല്യനിർണ്ണയം നടത്തുന്ന രീതിയാണ്. അധ്യാപകർ നേരിട്ട് പേപ്പറിൽ മാർക്കിടുന്നതിന് പകരം കമ്പ്യൂട്ടർ സ്‌ക്രീനിൽ ഉത്തരങ്ങൾ നോക്കി മാർക്ക് രേഖപ്പെടുത്തുന്നതാണ് ഈ സംവിധാനം. ഇതിന്റെ പ്രവർത്തന രീതി താഴെ പറയുന്ന ഘട്ടങ്ങളിലൂടെയാണ് നടക്കുന്നത്:

• സ്‌കാനിംഗ്: പരീക്ഷ കഴിഞ്ഞാലുടൻ വിദ്യാർത്ഥികളുടെ ഉത്തരക്കടലാസുകൾ അതീവ സുരക്ഷയോടെ ഡിജിറ്റൈസ് ചെയ്യും. ഇവ ഹൈ-റെസല്യൂഷനിൽ സ്‌കാൻ ചെയ്ത് ക്ലൗഡ് സർവറുകളിലേക്ക് മാറ്റും.
• ഡിജിറ്റൽ അലോക്കേഷൻ: സ്‌കാൻ ചെയ്ത ഉത്തരക്കടലാസുകൾ സോഫ്റ്റ്‌വെയർ വഴി അതത് വിഷയങ്ങളിലെ മൂല്യനിർണ്ണയക്കാർക്ക് (Evaluators) ഡിജിറ്റലായി കൈമാറും.
• മൂല്യനിർണ്ണയം: അധ്യാപകർ കമ്പ്യൂട്ടർ സ്‌ക്രീനിൽ ഉത്തരക്കടലാസ് പരിശോധിക്കുന്നു. ഇതിനായി പ്രത്യേക ടൂളുകൾ സോഫ്റ്റ്‌വെയറിലുണ്ടാകും. ഓരോ ചോദ്യത്തിനും നൽകുന്ന മാർക്കുകൾ അപ്പോൾ തന്നെ സിസ്റ്റം രേഖപ്പെടുത്തും.
• ഓട്ടോമേറ്റഡ് ടോട്ടലിംഗ്: ഈ സിസ്റ്റത്തിന്റെ ഏറ്റവും വലിയ പ്രത്യേകത മാർക്കുകൾ സിസ്റ്റം തന്നെ തനിയെ കൂട്ടും എന്നതാണ്. അധ്യാപകർക്ക് ഓരോ പേജിലെയും മാർക്കുകൾ പ്രത്യേകം കൂട്ടേണ്ടി വരുന്നില്ല. ഇതിലൂടെ മനുഷ്യസഹജമായ പിഴവുകൾ (Calculation Errors) പൂർണ്ണമായും ഒഴിവാക്കാം.
• ക്രോസ് ചെക്കിംഗ്: ഏതെങ്കിലും ചോദ്യത്തിന് മാർക്ക് നൽകാൻ വിട്ടുപോയിട്ടുണ്ടെങ്കിൽ സോഫ്റ്റ്‌വെയർ അത് അധ്യാപകനെ ഓർമ്മിപ്പിക്കും. എല്ലാ ചോദ്യങ്ങളും പരിശോധിച്ചാൽ മാത്രമേ ഫയൽ സബ്മിറ്റ് ചെയ്യാൻ സാധിക്കൂ.

ഇതിന്റെ ഗുണങ്ങൾ:

• വേഗത: 12 ദിവസം വേണ്ടിയിരുന്ന മൂല്യനിർണ്ണയം 9 ദിവസം കൊണ്ട് പൂർത്തിയാക്കാം. ഫലം വേഗത്തിൽ പ്രസിദ്ധീകരിക്കാൻ ഇത് സഹായിക്കും.
• കൃത്യത: മാർക്കുകൾ ആഡ് ചെയ്യുന്നതിലോ പോസ്റ്റ് ചെയ്യുന്നതിലോ പിഴവുകൾ വരില്ല.
• സുരക്ഷ: ഉത്തരക്കടലാസുകൾ നഷ്ടപ്പെടാനോ കേടുപാടുകൾ സംഭവിക്കാനോ ഉള്ള സാധ്യതയില്ല.
• അന്താരാഷ്ട്ര പങ്കാളിത്തം: ഡിജിറ്റൽ സംവിധാനമായതിനാൽ ഇന്ത്യക്ക് പുറത്തുള്ള സി ബി എസ് ഇ. സ്കൂളുകളിലെ അധ്യാപകർക്കും മൂല്യനിർണ്ണയത്തിൽ പങ്കാളികളാകാൻ സാധിക്കും.

പത്താം ക്ലാസ്സുകാർക്ക് രണ്ട് ബോർഡ് പരീക്ഷ

2026-ൽ പത്താം ക്ലാസ് വിദ്യാർത്ഥികൾക്കായി രണ്ട് ബോർഡ് പരീക്ഷകൾ നടത്തും. കൂടാതെ പത്താം ക്ലാസ്സിലെ സയൻസ്, സോഷ്യൽ സ്റ്റഡീസ് പരീക്ഷകളുടെ ചോദ്യപേപ്പറുകൾ വിവിധ വിഭാഗങ്ങളായി തിരിക്കും. ഫെബ്രുവരി 17-നാണ് പരീക്ഷകൾ ആരംഭിക്കുന്നത്. പത്താം ക്ലാസ് പരീക്ഷകൾ മാർച്ച് 10-നും പന്ത്രണ്ടാം ക്ലാസ് പരീക്ഷകൾ ഏപ്രിൽ 9-നും അവസാനിക്കും. ഇന്ത്യയിലും വിദേശത്തുമായി 46 ലക്ഷത്തോളം വിദ്യാർത്ഥികളാണ് ഇത്തവണ പരീക്ഷ എഴുതുന്നത്.

സോഷ്യൽ മീഡിയയിലെ വ്യാജ വാർത്തകൾ

ചോദ്യപേപ്പർ ചോർച്ചയുമായി ബന്ധപ്പെട്ട് യൂട്യൂബ് അടക്കമുള്ള പ്ലാറ്റ്‌ഫോമുകളിൽ പ്രചരിക്കുന്ന വ്യാജ വാർത്തകൾ വിശ്വസിക്കരുതെന്ന് ബോർഡ് കർശന നിർദ്ദേശം നൽകി. വ്യാജ വാർത്തകൾ പ്രചരിപ്പിക്കുന്നവർക്കെതിരെ എഫ് ഐ ആർ. രജിസ്റ്റർ ചെയ്യും. ഇത്തരം കാര്യങ്ങളിൽ ഏർപ്പെടുന്ന വിദ്യാർത്ഥികൾക്കെതിരെ അൺഫെയർ മീൻസ് (UFM) പ്രകാരം നടപടിയുണ്ടാകും. സൈബർ പോലീസിന്റെ സഹായത്തോടെ ബോർഡ് സോഷ്യൽ മീഡിയ നിരീക്ഷിക്കുന്നുണ്ട്.

പരീക്ഷാ കേന്ദ്രങ്ങൾക്കുള്ള നിർദ്ദേശങ്ങൾ

ഗണിതം, ഹിന്ദി തുടങ്ങിയ വിഷയങ്ങളുടെ ചോദ്യപേപ്പറുകൾ പ്രത്യേകം പാക്ക് ചെയ്യണം. വിദ്യാർത്ഥികളുടെ സീറ്റിംഗ് അറേഞ്ച്‌മെന്റിൽ കൃത്യത പാലിക്കണം. ഒരു കാരണവശാലും പരീക്ഷാ കേന്ദ്രത്തിൽ വെച്ച് വിഷയം മാറ്റാൻ അനുവദിക്കില്ല. എന്തെങ്കിലും സംശയങ്ങളുള്ള സ്‌കൂളുകൾക്ക് നാളെ വൈകുന്നേരം 5 മണി വരെ സി ബി എസ് ഇ. വെബ്‌സൈറ്റിലെ ഇമെയിൽ വഴി ചോദ്യങ്ങൾ ചോദിക്കാവുന്നതാണ്.