ആകാശത്ത് വിരിയുന്ന കനൽവളയം: 2026-ലെ ആദ്യ സൂര്യഗ്രഹണം മറ്റന്നാൾ; ഇന്ത്യയിൽ ദൃശ്യമാകുമോ?

ന്യൂഡൽഹി | അത്യപൂർവ്വമായ ഒരു ആകാശവിസ്മയത്തിന് സാക്ഷ്യം വഹിക്കാൻ ഒരുങ്ങുകയാണ് ലോകം. 2026-ലെ ആദ്യ സൂര്യഗ്രഹണം ഫെബ്രുവരി 17 ചൊവ്വാഴ്ച നടക്കും. ചന്ദ്രൻ സൂര്യനും ഭൂമിക്കും ഇടയിലൂടെ കടന്നുപോകുമ്പോൾ സൂര്യന്റെ മധ്യഭാഗം മറയുകയും വശങ്ങൾ തിളങ്ങുന്ന ഒരു വളയം പോലെ കാണപ്പെടുകയും ചെയ്യുന്ന ‘റിംഗ് ഓഫ് ഫയർ’ (Ring of Fire) അഥവാ വലയ സൂര്യഗ്രഹണമാണ് ഇത്തവണ സംഭവിക്കുന്നത്.

എന്താണ് ഈ ‘കനൽവളയം’?

ഭൂമിയിൽ നിന്ന് ഏറ്റവും അകലെയുള്ള ഭ്രമണപഥത്തിലൂടെ ചന്ദ്രൻ സഞ്ചരിക്കുമ്പോഴാണ് വലയ സൂര്യഗ്രഹണം ഉണ്ടാകുന്നത്. ചന്ദ്രൻ സൂര്യനെ പൂർണ്ണമായും മറയ്ക്കാൻ കഴിയാത്തത്ര ചെറുതായി കാണപ്പെടുന്നതിനാൽ, സൂര്യന്റെ പുറംഭാഗം ഒരു തിളങ്ങുന്ന വളയം പോലെ അവശേഷിക്കുന്നു. ഇതിനെയാണ് ശാസ്ത്രലോകം ‘റിംഗ് ഓഫ് ഫയർ’ എന്ന് വിളിക്കുന്നത്. നാസയുടെ കണക്കനുസരിച്ച്, സൂര്യന്റെ ഏകദേശം 96 ശതമാനത്തോളം ഭാഗം ഇത്തവണ ചന്ദ്രൻ മറയ്ക്കും.

സമയക്രമം

ഫെബ്രുവരി 17-ന് അന്താരാഷ്ട്ര സമയം (UTC) രാവിലെ 07:01-ന് ഗ്രഹണം ആരംഭിക്കും. ഏകദേശം 2 മിനിറ്റും 20 സെക്കൻഡും നീണ്ടുനിൽക്കുന്ന ഈ പ്രതിഭാസത്തിൽ കനൽവളയം ദൃശ്യമാകും.

ഇന്ത്യയിൽ കാണാൻ കഴിയുമോ?

ഇന്ത്യയിലെ ആകാശപ്രേമികൾക്ക് ഇത്തവണ നിരാശയാകും ഫലം. ഈ ഗ്രഹണം തെക്കൻ അർദ്ധഗോളത്തിൽ സംഭവിക്കുന്നതിനാലും ആ സമയത്ത് ഇന്ത്യയിൽ സൂര്യൻ ചക്രവാളത്തിന് താഴെയായിരിക്കുന്നതിനാലും രാജ്യത്ത് ഇത് ദൃശ്യമാകില്ല.

എവിടെയൊക്കെ ദൃശ്യമാകും?

അന്റാർട്ടിക്കയിലെ കോൺകോർഡിയ, മിർണി തുടങ്ങിയ റിസർച്ച് സ്റ്റേഷനുകളിൽ നിന്നാണ് ഈ ഗ്രഹണം ഏറ്റവും വ്യക്തമായി കാണാൻ സാധിക്കുക. കൂടാതെ ദക്ഷിണാഫ്രിക്ക, ടാൻസാനിയ, സാംബിയ, സിംബാബ്‌വെ തുടങ്ങിയ ആഫ്രിക്കൻ രാജ്യങ്ങളിലും അർജന്റീന, ചിലി തുടങ്ങിയ തെക്കേ അമേരിക്കൻ ഭാഗങ്ങളിലും ഭാഗിക ഗ്രഹണം ദൃശ്യമാകും. എത്തിച്ചേരാൻ പ്രയാസമുള്ള മേഖലകളിൽ ഗ്രഹണം സംഭവിക്കുന്നതിനാൽ വളരെ കുറഞ്ഞ ആളുകൾക്ക് മാത്രമേ ഇത് നേരിട്ട് കാണാൻ കഴിയൂ എന്ന് കാലാവസ്ഥാ നിരീക്ഷകർ വിലയിരുത്തുന്നു.