'മുഖ്യമന്ത്രിയെ പോലെ കോൺഗ്രസ് നേതാക്കൾ വാചക കസർത്തിനില്ല'; അന്വേഷണത്തെ ഭയക്കുന്നില്ലെന്നും കെ സുധാകരൻ

തിരുവനന്തപുരം | മുഖ്യമന്ത്രിയെ പോലെ കോൺഗ്രസ് നേതാക്കൾ വാചക കസർത്തിനില്ലെന്നും ഒരു അന്വേഷണത്തെയും ഭയമില്ലെന്നും കെ പി സി സി പ്രസിഡൻ്റ് കെ സുധാകരൻ. പിണറായി വിജയനും മകളും നടത്തിയ ക്രമക്കേടുകൾ വ്യക്തമായ തെളിവുകൾ സഹിതം ആണ് മാത്യു കുഴൽനാടൻ സഭക്ക് അകത്തുംപുറത്തും ഉന്നയിച്ചത്. തന്റെ മകളുടെ കമ്പനിക്ക് മെന്റർ ഇല്ല എന്ന കള്ളം പറഞ്ഞ മുഖ്യമന്ത്രി വിജയനെ സി പി എം മറന്നാലും കേരളം മറക്കില്ല. മുഖ്യമന്ത്രി പദവി ദുരുപയോഗം ചെയ്യാൻ വേണ്ടി തന്നെയാണ് മകൾക്ക് സ്വകാര്യ കമ്പനികൾ അന്യായമായി പണം നൽകിയിട്ടുണ്ടാവുക. അതുമായി ബന്ധപ്പെട്ട ചോദ്യങ്ങൾക്ക് മുഖ്യമന്ത്രിയും പാർട്ടിയും മറുപടി പറഞ്ഞേ തീരൂവെന്നും കെ സുധാകരൻ പറഞ്ഞു.

സി പി എം ഉന്നയിച്ച ആരോപണങ്ങളിൽ കൃത്യമായ മറുപടികൾ പത്രസമ്മേളനത്തിൽ കൊടുത്തതിനുശേഷം കോൺഗ്രസിന്റെ യുവ നേതാവ് മാത്യു കുഴൽനാടൻ ചോദിച്ചത് “ഇനി നിങ്ങൾക്ക് ചോദ്യങ്ങൾ വല്ലതുമുണ്ടോ ? ഞാൻ പത്രസമ്മേളനം നിർത്തട്ടെ?” എന്നാണ്. മുഖ്യമന്ത്രിയെയും മറ്റ് സി പി എം നേതാക്കളെയും പോലെ അരിയെത്ര എന്ന് ചോദിക്കുമ്പോൾ പയറഞ്ഞാഴി എന്ന് ഉത്തരം പറയാനും ചോദ്യങ്ങളെ ഭയന്ന് പാതിവഴിയിൽ പത്രസമ്മേളനം അവസാനിപ്പിച്ച് ഓടാനും കോൺഗ്രസ് നേതാക്കളെ കിട്ടില്ലെന്ന് സാരം. ഭീഷണിപ്പെടുത്തിയും ആരോപണങ്ങള്‍ ഉന്നയിച്ചും കേസെടുത്തും കോണ്‍ഗ്രസിനെ നിശ്ശബ്ദമാക്കാമെന്നത് സിപിഎമ്മിന്റെ അതിമോഹമാണ്.