ജീവിതത്തിൽ വിജയിക്കാൻ ഇലോൺ മസ്‌കിന്റെ അഞ്ചു മിനിറ്റ് തന്ത്രം: നിങ്ങളും പിന്തുടരുന്നോ?

ലോകത്തിലെ ഏറ്റവും വലിയ ധനികനാണ് ഇലോൺ മസ്‌ക്. പല കാര്യങ്ങൾക്കും അദ്ദേഹം പ്രശസ്തനാണ് – യുഎസിൽ ഡൊണാൾഡ് ട്രംപിന്റെ ഭരണകൂടത്തിന് കീഴിൽ ഡോഗെയെ (DOGE – Department of Government Efficiency) നയിക്കുന്നത്, ബഹിരാകാശത്തേക്ക് റോക്കറ്റുകൾ അയക്കുന്നത്, ഇലക്ട്രിക് കാറുകൾ നിർമ്മിക്കുന്നത്, അദ്ദേഹത്തിന്റെ വിചിത്രമായ ആശയങ്ങളിലൂടെ സാങ്കേതിക ലോകത്തെ ദിനംപ്രതി ഞെട്ടിക്കുന്നത് എന്നിവയെല്ലാം അതിൽ ചിലതാണ്. എന്നാൽ മറ്റുള്ളവരെ അപേക്ഷിച്ച് ഇത്രയധികം കാര്യങ്ങൾ ചെയ്യാൻ ഇലോൺ മസ്‌കിന് എങ്ങനെ സാധിക്കുന്നു, അദ്ദേഹത്തിനും ഒരു ദിവസത്തിൽ 24 മണിക്കൂർ മാത്രമേയുള്ളൂ എന്നോർക്കുക. മസ്‌കിന്റെ ശക്തമായ ഉൽപ്പാദനക്ഷമതയുടെ രഹസ്യം അതിശയകരമാംവിധം ലളിതമാണ്: അഞ്ചു മിനിറ്റ് നിയമം, അതാണ് അദ്ദേഹത്തിന്റെ വിജയമന്ത്രം. എന്താണ് ഇലോൺ മസ്‌കിന്റെ അഞ്ചു മിനിറ്റ് നിയമം? ഇത് നിങ്ങളെയും വിജയിപ്പിക്കാൻ സഹായിക്കുമോ? നമുക്ക് നോക്കാം:

ഇലോൺ മസ്‌കിന്റെ അഞ്ചു മിനിറ്റ് നിയമം കേവലം അഞ്ചു മിനിറ്റിനുള്ളിൽ നിങ്ങളുടെ ജീവിതം മാറ്റുന്നതിനെക്കുറിച്ചോ ഒറ്റരാത്രികൊണ്ട് വിജയം നേടുന്നതിനെക്കുറിച്ചോ അല്ല. മറിച്ച്, മസ്‌ക് എങ്ങനെ തന്റെ ദിവസം ക്രമീകരിക്കുന്നു എന്നതിനെക്കുറിച്ചാണ് – മണിക്കൂറുകളായിട്ടല്ല, ചെറിയ അഞ്ച് മിനിറ്റ് ബ്ലോക്കുകളായിട്ടാണ് അദ്ദേഹം കാര്യങ്ങൾ ചെയ്യുന്നത്. നമ്മളിൽ ഭൂരിഭാഗം പേരും നമ്മുടെ ദിവസത്തെ അവ്യക്തമായ ലക്ഷ്യങ്ങളായോ വലിയ ജോലികളായോ വിഭജിക്കുമ്പോൾ, ഇലോൺ മസ്‌ക് തന്റെ മുഴുവൻ ഷെഡ്യൂളിനെയും അഞ്ച് മിനിറ്റ് ദൈർഘ്യമുള്ള ചെറിയ ടാസ്‌ക്കുകളായി വിഭജിക്കുന്നു എന്നതാണ് വ്യത്യാസം. ഓരോന്നിനും വ്യക്തമായ ലക്ഷ്യവുമുണ്ടാകും.

എന്തുകൊണ്ടാണ് ഇലോൺ മസ്‌ക് ഓരോ ടാസ്‌ക്കിനും 5 മിനിറ്റ് മാത്രം നൽകുന്നത്?

നമ്മുടെ തിരക്കേറിയ ഓട്ടത്തിനിടയിൽ ശ്രദ്ധ നഷ്ടപ്പെടാൻ സാധ്യതയുള്ളതുമായ നിരവധി കാര്യങ്ങളുണ്ട്. ഒരു ഫോൺ സ്ക്രോൾ ചെയ്യുകയോ, ദീർഘനേരം കാപ്പി കുടിക്കുകയോ, ഒരു സഹപ്രവർത്തകനുമായി സംസാരിക്കുകയോ ചെയ്യുന്നത് നമ്മളറിയാതെ 5 മിനിറ്റിൽ നിന്ന് 30 മിനിറ്റിലേക്ക് നീണ്ടുപോകാറുണ്ട്. എന്നാൽ, ഇലോൺ മസ്‌കിന്റെ അഞ്ച് മിനിറ്റ് ഷെഡ്യൂളിംഗ് കൃത്യതയും ഉത്തരവാദിത്തവും ഉറപ്പാക്കുന്നു. ഓരോ ബ്ലോക്കും ബോധപൂർവ്വം നിശ്ചയിച്ചിട്ടുള്ളതാണ്. അവ്യക്തമായ സമയനഷ്ടത്തിന് അവിടെ സ്ഥാനമില്ല.

ഇത് കർക്കശമായി തോന്നാമെങ്കിലും, വാസ്തവത്തിൽ ഇത് നിങ്ങൾക്ക് ധാരാളം സ്വാതന്ത്ര്യം നൽകുന്നു – കാരണം നിങ്ങൾ എന്താണ് ചെയ്യുന്നതെന്നും എത്രനേരം ചെയ്യുമെന്നും നിങ്ങൾക്ക് കൃത്യമായി അറിയുമ്പോൾ, ലക്ഷ്യമില്ലാതെ ദിവസം മുഴുവൻ അലഞ്ഞുതിരിയുന്നതിന്റെ സമ്മർദ്ദത്തിൽ നിന്ന് നിങ്ങൾ സ്വതന്ത്രനാകുന്നു.

ഇലോൺ മസ്‌ക് എങ്ങനെയാണ് 5 മിനിറ്റ് നിയമം ഉപയോഗിക്കുന്നത്?

ടെസ്‌ല, സ്പേസ് എക്സ്, ന്യൂറാലിങ്ക്, ദി ബോറിംഗ് കമ്പനി തുടങ്ങി തന്റെ എല്ലാ കമ്പനികളെയും ഒരേസമയം കൈകാര്യം ചെയ്യാൻ ഈ രീതി ഉപയോഗിക്കുന്നുണ്ടെന്ന് ഇലോൺ മസ്‌ക് പരസ്യമായി പറഞ്ഞിട്ടുണ്ട്. ഓരോ ദിവസവും രാവിലെ മുതൽ അഞ്ച് മിനിറ്റ് ദൈർഘ്യമുള്ള ടാസ്‌ക്കുകളായി അദ്ദേഹം ആസൂത്രണം ചെയ്യുന്നു. മീറ്റിംഗ്, ഇമെയിൽ സെഷൻ, ബ്രെയിൻസ്റ്റോമിംഗ് ബ്ലോക്ക് തുടങ്ങി ഉച്ചഭക്ഷണ ഇടവേള പോലും കൃത്യമായി രേഖപ്പെടുത്തിയിരിക്കും.

നിങ്ങൾ ഇത് പിന്തുടരാൻ ആഗ്രഹിക്കുന്നുവെങ്കിൽ, ആദ്യമായി അഞ്ച് മിനിറ്റ് നിയമം അൽപ്പം ബുദ്ധിമുട്ടായി തോന്നിയേക്കാം. മസ്‌കിന്റെ ഷെഡ്യൂൾ മിനിറ്റ് ബൈ മിനിറ്റ് പകർത്തുക എന്നതല്ല ഇതിലൂടെ ഉദ്ദേശിക്കുന്നത്. സമയം നിങ്ങളുടെ ഏറ്റവും വിലയേറിയ നാണയമാണെന്നും, അതിനെ അങ്ങനെ പരിഗണിക്കുന്നത് നിങ്ങളുടെ ശ്രദ്ധയും ഉൽപ്പാദനക്ഷമതയും ഗണ്യമായി വർദ്ധിപ്പിക്കുകയും അതുവഴി നിങ്ങളെ മറ്റുള്ളവരെക്കാൾ കൂടുതൽ വിജയിപ്പിക്കുകയും ചെയ്യും എന്നതാണ് ഇതിലെ പ്രധാന കാര്യം.

5 മിനിറ്റ് നിയമം എങ്ങനെ ഉപയോഗിക്കാം?

ഇലോൺ മസ്‌കിന്റെ ഉയർന്ന ഉൽപ്പാദനക്ഷമത ഫോർമുല നിങ്ങളുടെ ജീവിതത്തിൽ ഉൾപ്പെടുത്താൻ ഈ ലളിതമായ ഘട്ടങ്ങൾ പിന്തുടരുക:

• ദിവസത്തിലെ നിങ്ങളുടെ പ്രധാനപ്പെട്ട 3 കാര്യങ്ങൾ എഴുതുക.
• അവയെ അഞ്ച് മിനിറ്റ് ദൈർഘ്യമുള്ള ടാസ്‌ക്കുകളായോ ഘട്ടങ്ങളായോ വിഭജിക്കുക.
• ഓരോ ബ്ലോക്കിലും കൃത്യമായി ശ്രദ്ധിക്കാൻ ഒരു ടൈമർ ഉപയോഗിക്കുക.
• ശ്വാസം എടുക്കാനും, ഫോൺ സ്ക്രോൾ ചെയ്യാനും, ലഘുഭക്ഷണം കഴിക്കാനും ഏതാനും അഞ്ച് മിനിറ്റ് ഇടവേളകൾ അനുവദിക്കുക.

കൃത്യമായ അഞ്ച് മിനിറ്റ് സമയപരിധിയും വ്യക്തമായ ലക്ഷ്യവും ഉണ്ടെന്ന് നിങ്ങളുടെ മനസ്സിന് അറിയുമ്പോൾ നിങ്ങൾക്ക് എത്രമാത്രം കാര്യങ്ങൾ ചെയ്യാൻ കഴിയും എന്ന് നിങ്ങൾ അത്ഭുതപ്പെടും.

അവസാനമായി, അഞ്ച് മിനിറ്റ് നിയമം നമ്മെ ഓർമ്മിപ്പിക്കുന്നത് ഉൽപ്പാദനക്ഷമത കൂടുതൽ കാര്യങ്ങൾ ചെയ്യുന്നതിലല്ല, മറിച്ച് പ്രധാനപ്പെട്ട കാര്യങ്ങൾ ബോധപൂർവ്വം ചെയ്യുന്നതിലാണ്. നിങ്ങൾ നിങ്ങളുടെ സമയം വിവേകത്തോടെ ഉപയോഗിക്കുമ്പോൾ, ഇലോൺ മസ്‌കിനെപ്പോലെ വലിയ കാര്യങ്ങളിലേക്കുള്ള വാതിൽ നിങ്ങൾ തുറക്കുകയാണ് ചെയ്യുന്നത്.