'ലാബ് റിപ്പോർട്ടുകൾ നോർമലാണ്, പക്ഷേ എനിക്ക് സുഖമില്ല'; ഈ അവസ്ഥയ്ക്ക് കാരണം ഇതാണ്

നിങ്ങളുടെ ലാബ് റിപ്പോർട്ടുകളെല്ലാം നോർമലാണ്, എന്നിട്ടും നിങ്ങൾക്ക് കടുത്ത ക്ഷീണവും തളർച്ചയും അനുഭവപ്പെടുന്നുണ്ടോ? ഏകാഗ്രത കുറയുക, മുടി കൊഴിച്ചിൽ, അകാരണമായ ഭാരക്കൂടുതൽ, ഉറക്കമില്ലായ്മ തുടങ്ങിയ ബുദ്ധിമുട്ടുകൾ നിങ്ങളെ അലട്ടുന്നുണ്ടെങ്കിൽ ‘എല്ലാം നോർമൽ’ എന്ന ലാബ് റിപ്പോർട്ടുകൾ കൊണ്ട് തൃപ്തിപ്പെടരുത് എന്നാണ് കാലിഫോർണിയയിലെ ഡോക്ടറായ ക്ലിയോ ടെറ്റ്‌സ്‌ലോഫ് പറയുന്നത്. പലപ്പോഴും ലാബ് റിപ്പോർട്ടുകൾ നൽകുന്ന ‘നോർമൽ റേഞ്ച്’ (Normal Range) അല്ല ശരീരത്തിന് യഥാർത്ഥത്തിൽ വേണ്ട ‘ഒപ്റ്റിമൽ ലെവൽ’ (Optimal Level) എന്ന് അവർ ചൂണ്ടിക്കാട്ടുന്നു.

ശരീരം നൽകുന്ന പത്ത് അപായ സൂചനകൾ ഇവയാണ്:

1. തൈറോയ്ഡ് നോർമൽ, പക്ഷേ ക്ഷീണം മാറുന്നില്ല

ടി എസ് എച്ച് (TSH) ലെവൽ 3.5 ആണെങ്കിൽ അത് ലാബ് റിപ്പോർട്ടിൽ നോർമൽ ആയിരിക്കാം. എന്നാൽ ശരീരത്തിന്റെ ഉന്മേഷത്തിന് ഇത് 1.0 മുതൽ 2.0 വരെയാകുന്നതാണ് ഉചിതം. പലപ്പോഴും ടി എസ് എച്ച് മാത്രം പരിശോധിക്കുന്നത് കൊണ്ട് തൈറോയ്ഡിന്റെ പൂർണ്ണരൂപം ലഭിക്കില്ല. Free T3, Free T4, തൈറോയ്ഡ് ആന്റിബോഡീസ് എന്നിവ കൂടി പരിശോധിക്കേണ്ടതുണ്ട്.

2. വിറ്റാമിൻ ബി 12 കുറയുന്നു

ബി 12 ലെവൽ 280 ആണെങ്കിൽ ലാബുകൾ നോർമൽ എന്ന് രേഖപ്പെടുത്താം. എന്നാൽ ഇത് 800-ന് അടുത്തായിരിക്കുന്നതാണ് തലച്ചോറിന്റെ പ്രവർത്തനത്തിനും ഓർമ്മശക്തിക്കും നല്ലത്. ഇതിന്റെ കുറവ് നിങ്ങളെ തളർത്തുകയും ഏകാഗ്രത നശിപ്പിക്കുകയും ചെയ്യും.

3. അനീമിയ ഇല്ലെങ്കിലും മുടി കൊഴിച്ചിൽ

ഹീമോഗ്ലോബിൻ നോർമൽ ആയതുകൊണ്ട് മാത്രം ശരീരത്തിൽ അയൺ ആവശ്യത്തിനുണ്ടെന്ന് കരുതരുത്. ശരീരത്തിലെ അയൺ സ്റ്റോറേജ് അളക്കുന്ന ഫെറിറ്റിൻ (Ferritin) 50-ന് മുകളിലെങ്കിലും ഉണ്ടെങ്കിലേ മുടി കൊഴിച്ചിൽ തടയാനും തൈറോയ്ഡിന് പിന്തുണ നൽകാനും സാധിക്കൂ.

4. മൂഡ് ഓഫ്, വിറ്റാമിൻ ഡി

വിറ്റാമിൻ ഡി 28 ആണെങ്കിൽ അത് പര്യാപ്തമാണെന്ന് ലാബ് റിപ്പോർട്ട് പറഞ്ഞേക്കാം. എന്നാൽ മാനസികാരോഗ്യം, പ്രതിരോധശേഷി, ഹോർമോൺ ബാലൻസ് എന്നിവയ്ക്ക് ഇത് 50-നും 80-നും ഇടയിലായിരിക്കണം. ഇതിന്റെ കുറവ് ഉത്കണ്ഠയ്ക്കും വിഷാദത്തിനും കാരണമാകാം.

5. രക്തത്തിലെ പഞ്ചസാരയും ശരീരഭാരവും

ഫാസ്റ്റിംഗ് ഗ്ലൂക്കോസ് 96 ആണെങ്കിൽ അത് നോർമൽ ആയി കണക്കാക്കാം, എന്നാൽ 75-85 ആണ് ഏറ്റവും നല്ല അളവ്. ഇൻസുലിൻ റെസിസ്റ്റൻസ് വർഷങ്ങളോളം ശരീരത്തിൽ തുടർന്ന ശേഷമേ ഗ്ലൂക്കോസ് നില ഉയരുകയുള്ളൂ. ഇത് കണ്ടെത്താൻ ഫാസ്റ്റിംഗ് ഇൻസുലിൻ ടെസ്റ്റ് ആവശ്യമാണ്.

6. ഉറക്കമില്ലായ്മയും കോർട്ടിസോൾ അളവും

രാവിലെ 8 മണിക്ക് എടുക്കുന്ന കോർട്ടിസോൾ ടെസ്റ്റ് കൊണ്ട് മാത്രം കാര്യമില്ല. പകൽ മുഴുവനുള്ള വ്യതിയാനങ്ങൾ അറിയാൻ മൾട്ടിപ്പിൾ പോയിന്റ് കോർട്ടിസോൾ ടെസ്റ്റ് ആവശ്യമാണ്.

7. ഹോർമോൺ മാറ്റങ്ങൾ

30-കളിലും 40-കളിലും അനുഭവപ്പെടുന്ന ശാരീരിക ബുദ്ധിമുട്ടുകൾ വെറും പ്രായത്തിന്റേതാണെന്ന് പറഞ്ഞ് തള്ളിക്കളയരുത്. ഈസ്ട്രജൻ, പ്രോജസ്റ്ററോൺ അളവുകളിലെ വ്യതിയാനങ്ങൾ ശാസ്ത്രീയമായി പരിശോധിക്കണം.

8. വീക്കം (Inflammation)

സാധാരണ രക്തപരിശോധനയിൽ വലിയ രോഗങ്ങൾ ഇല്ലെന്ന് കണ്ടേക്കാം. എന്നാൽ ശരീരത്തിനുള്ളിൽ പതുക്കെ വളരുന്ന വീക്കം കണ്ടെത്താൻ hs-CRP, ഹോമോസിസ്റ്റീൻ തുടങ്ങിയ പരിശോധനകൾ ആവശ്യമാണ്.

9. ദഹനപ്രശ്നങ്ങൾ

വയർ വീർക്കുക, മലബന്ധം തുടങ്ങിയ പ്രശ്നങ്ങൾക്ക് കൂടുതൽ നാരുകൾ അടങ്ങിയ ഭക്ഷണം കഴിക്കാൻ നിർദ്ദേശിക്കാറുണ്ടെങ്കിലും അതിന്റെ യഥാർത്ഥ കാരണം കണ്ടെത്താൻ വിശദമായ പരിശോധനകൾ ആവശ്യമാണ്.

10. ലക്ഷണങ്ങളെ കൂട്ടിയിണക്കാതിരിക്കുക

ബി 12, ഫെറിറ്റിൻ, വിറ്റാമിൻ ഡി എന്നിവയുടെ ചെറിയ കുറവുകളും തൈറോയ്ഡ് അളവിലെ നേരിയ വ്യതിയാനങ്ങളും ചേർന്ന് നിങ്ങളെ അവശനാക്കാം. ഇവ ഓരോന്നായി കാണാതെ മൊത്തത്തിലുള്ള ഒരു ആരോഗ്യചിത്രം വിലയിരുത്താൻ ഡോക്ടറോട് ആവശ്യപ്പെടുക.

ലാബ് റിപ്പോർട്ടുകൾ വെറും കണക്കുകൾ മാത്രമാണ്. നിങ്ങളുടെ ശരീരം നൽകുന്ന ലക്ഷണങ്ങൾ അവഗണിക്കാതെ കൂടുതൽ വ്യക്തമായ പരിശോധനകൾ നടത്താൻ ശ്രദ്ധിക്കുക.

Summary

Many people experience exhaustion, hair loss, and mood swings even when their lab reports fall within the “normal” range. Dr. Cleo Tetzloff explains that standard lab ranges often fail to reflect the “optimal” levels needed for the body to thrive, particularly regarding Thyroid (TSH), B12, and Ferritin. She emphasizes the importance of looking at markers like fasting insulin and inflammatory indicators rather than viewing test results in isolation to find the root cause of persistent symptoms.