ഇന്ത്യയിൽ നോൺ-ആൽക്കഹോളിക് ഫാറ്റി ലിവർ കേസുകൾ ക്രമാതീതമായി ഉയരുന്നു; കാരണം ഇതാണ്...

ന്യൂഡൽഹി | ഇന്ത്യയിൽ നിശബ്ദ മഹാമാരിയായി മാറിക്കൊണ്ടിരിക്കുന്ന നോൺ-ആൽക്കഹോളിക് ഫാറ്റി ലിവർ ഡിസീസ് (NAFLD) സംബന്ധിച്ച് ആശങ്കാജനകമായ റിപ്പോർട്ടുകൾ പുറത്ത്. ‘ദ ലാൻസെറ്റ് റീജിയണൽ ഹെൽത്ത് സൗത്ത് ഈസ്റ്റ് ഏഷ്യ’യിൽ പ്രസിദ്ധീകരിച്ച സി എസ് ഐ ആർ ഹെൽത്ത് കോഹോർട്ട് പഠനപ്രകാരം ഇന്ത്യയിലെ മുതിർന്നവരിൽ 38.9 ശതമാനം പേർക്കും ഫാറ്റി ലിവർ ബാധിച്ചേക്കാമെന്ന് സൂചിപ്പിക്കുന്നു. ഇതിൽ വലിയൊരു വിഭാഗം ആളുകളുടെയും കരളിന്റെ കോശങ്ങൾ കടുപ്പമേറുന്ന ‘ഫൈബ്രോസിസ്’ എന്ന അവസ്ഥയിലേക്ക് നീങ്ങുന്നതായും ഇത് ഗുരുതരമായ കരൾ രോഗങ്ങൾക്ക് കാരണമാകുമെന്നും പഠനം മുന്നറിയിപ്പ് നൽകുന്നു.

മദ്യപാനം മൂലം മാത്രമാണ് കരൾ രോഗങ്ങൾ ഉണ്ടാകുന്നത് എന്ന ധാരണ തിരുത്തിക്കൊണ്ടാണ് നോൺ-ആൽക്കഹോളിക് ഫാറ്റി ലിവർ കേസുകൾ വർദ്ധിക്കുന്നത്. മോശമായ ഭക്ഷണരീതിയും വ്യായാമമില്ലാത്ത ജീവിതശൈലിയുമാണ് ഇതിന്റെ പ്രധാന കാരണങ്ങൾ.

ഫാറ്റി ലിവറിന് കാരണമാകുന്ന പ്രധാന ഘടകങ്ങൾ

• അമിതവണ്ണം: വ്യായാമമില്ലാത്ത ജീവിതശൈലിയും കലോറി കൂടിയ ഭക്ഷണവും ഇന്ത്യക്കാരിൽ അമിതവണ്ണത്തിന് കാരണമാകുന്നു. ഇത് കരൾ രോഗ സാധ്യത വർദ്ധിപ്പിക്കുന്നു.
• ഭക്ഷണരീതി: ശുദ്ധീകരിച്ച കാർബോഹൈഡ്രേറ്റുകൾ, പഞ്ചസാര, അനാരോഗ്യകരമായ കൊഴുപ്പ് എന്നിവയുടെ അമിത ഉപയോഗം കരളിൽ കൊഴുപ്പ് അടിഞ്ഞുകൂടാൻ ഇടയാക്കുന്നു.
• ഇൻസുലിൻ പ്രതിരോധം: ടൈപ്പ് 2 പ്രമേഹം, മെറ്റബോളിക് സിൻഡ്രോം എന്നിവയുള്ളവരിൽ ശരീരം ഇൻസുലിനോട് ശരിയായി പ്രതികരിക്കാതെ വരുന്നത് കൊഴുപ്പ് കരളിലേക്ക് നീങ്ങാൻ കാരണമാകുന്നു.
• ജനിതക ഘടകങ്ങൾ: ദക്ഷിണേഷ്യൻ വംശജർക്ക് മെറ്റബോളിക് പ്രശ്നങ്ങളുണ്ടാകാൻ ജനിതകപരമായ സാധ്യത കൂടുതലാണെന്ന് പഠനങ്ങൾ പറയുന്നു.
• മറ്റ് രോഗങ്ങൾ: പി സി ഒ എസ്, തൈറോയ്ഡ് പ്രശ്നങ്ങൾ, ഉറക്കമില്ലായ്മ (Sleep Apnea) എന്നിവയുള്ളവരിലും ഫാറ്റി ലിവർ സാധ്യത കൂടുതലാണ്. കൂടാതെ വൈറ്റമിൻ ഡി കുറവും രോഗാവസ്ഥ സങ്കീർണ്ണമാക്കുന്നു.

പ്രതിരോധ മാർഗ്ഗങ്ങൾ

കൃത്യമായ ഭക്ഷണക്രമം പാലിക്കുക, ദിവസവും വ്യായാമം ചെയ്യുക, ശരീരഭാരം നിയന്ത്രിക്കുക, മദ്യപാനം ഒഴിവാക്കുക എന്നിവയിലൂടെ ഫാറ്റി ലിവർ തടയാനാകും. കൃത്യമായ ഇടവേളകളിൽ രക്തപരിശോധനയിലൂടെയും സ്കാനിംഗിലൂടെയും കരളിന്റെ ആരോഗ്യം വിലയിരുത്തേണ്ടത് അത്യാവശ്യമാണ്.

ലക്ഷണങ്ങൾ ശ്രദ്ധിക്കുക

തുടക്കത്തിൽ ലക്ഷണങ്ങൾ പ്രകടിപ്പിക്കാത്തതിനാൽ ഫാറ്റി ലിവർ ഒരു നിശബ്ദ ഭീഷണിയാണ്. അമിതമായ തളർച്ച, വയറിന്റെ മുകൾ ഭാഗത്ത് അസ്വസ്ഥത, പെട്ടെന്ന് ശരീരഭാരം കുറയുക എന്നിവ ശ്രദ്ധയിൽപ്പെട്ടാൽ ഉടൻ വൈദ്യസഹായം തേടണം. യഥാസമയം ചികിത്സിച്ചില്ലെങ്കിൽ ഇത് ലിവർ സിറോസിസ്, കരൾ കാൻസർ തുടങ്ങിയ മാരകാവസ്ഥകളിലേക്ക് നയിച്ചേക്കാം.