യു പി നിയമവാഴ്ചക്ക് പുറത്തോ?

ക്രമസമാധാന പാലനത്തിന്റെയും നിയമവാഴ്ചയുടെയും കാര്യത്തില്‍ ഉത്തര്‍ പ്രദേശിലെ യോഗി ഭരണകൂടം അമ്പേ പരാജയമാണെന്ന് ഇതിനകം പലകുറി തെളിഞ്ഞതാണ്. ഭരണകൂട തണലില്‍ വളരുന്നതും അല്ലാത്തതുമായ ഗുണ്ടാ സംഘങ്ങളുടെ വിളയാട്ട നിലമായി മാറിക്കൊണ്ടിരിക്കുകയാണ് രാജ്യത്തെ ഏറ്റവും വലിയ സംസ്ഥാനം. പോലീസ് സേനയിലെ വര്‍ഗീയവത്കരണം എത്രമേല്‍ അപകടകരമായ നിലയിലാണെന്നത് വെളിപ്പെട്ട സന്ദര്‍ഭം കൂടിയായിരുന്നു യു പിയിലെ പൗരത്വ ഭേദഗതി നിയമ വിരുദ്ധ പ്രതിഷേധങ്ങള്‍. യു പിയിലെ നിയമപാലകരില്‍ ക്രിമിനല്‍ സ്വഭാവം പ്രകടിപ്പിക്കുന്നവരുടെ എണ്ണത്തിലെ പെരുപ്പം ഭീതിപ്പെടുത്തുന്ന രീതിയിലേക്ക് വളര്‍ന്നിട്ടുണ്ട്. അത്തരമൊരു സന്ദര്‍ഭത്തില്‍ സംസ്ഥാനം ഭരിക്കുന്ന പാര്‍ട്ടിയുടെ പ്രവര്‍ത്തകര്‍ക്ക് പോലും ജീവഭയത്തോടെ മാത്രം കഴിയേണ്ടി വരുന്നു എന്നാണ് യു പിയില്‍ നിന്ന് പുറത്തുവരുന്ന വാര്‍ത്തകള്‍ തെര്യപ്പെടുത്തുന്നത്.

ഒക്ടോബര്‍ മൂന്നിന് ലഖിംപൂരിലെ ഖേരിയില്‍ കേന്ദ്ര മന്ത്രി പുത്രന്‍ കര്‍ഷക പ്രതിഷേധക്കാര്‍ക്ക് നേരേ വാഹനമിടിച്ചു കയറ്റി കര്‍ഷകരെ കൊലപ്പെടുത്തിയതിനെ തുടര്‍ന്നുണ്ടായ സംഘര്‍ഷത്തില്‍ ബി ജെ പി പ്രവര്‍ത്തകനായ ശ്യാം സുന്ദറും കൊല്ലപ്പെട്ടിരുന്നു. ഭര്‍ത്താവ് കൊല്ലപ്പെടാനിടയായ സംഭവത്തില്‍ നേരായ അന്വേഷണം വേണമെന്നാവശ്യപ്പെട്ട് ശ്യാം സുന്ദറിന്റെ വിധവ റൂബി ദേവി, നേരത്തേ സമര്‍പ്പിക്കപ്പെട്ട പൊതുതാത്പര്യ ഹരജിയില്‍ കക്ഷി ചേര്‍ന്നു. മരണത്തിന് മുമ്പ് ശ്യാം സുന്ദറിനെ അവസാനമായി കണ്ടത് പോലീസ് ഉദ്യോഗസ്ഥര്‍ക്കൊപ്പമാണ്. ബുള്ളറ്റ് പ്രൂഫും എ കെ 47 തോക്കുകളുമായി നില്‍ക്കുന്ന പോലീസ് ഉദ്യോഗസ്ഥര്‍ക്കൊപ്പമുള്ള ശ്യാം സുന്ദറിന്റെ പടം റൂബി ദേവിയുടെ അഭിഭാഷകന്‍ ചീഫ് ജസ്റ്റിസ് എന്‍ വി രമണയുടെ നേതൃത്വത്തിലുള്ള മൂന്നംഗ ബഞ്ചിന് മുമ്പില്‍ പ്രദര്‍ശിപ്പിക്കുകയും ചെയ്തു. യു പിയിലെ പ്രത്യേക അന്വേഷണ സംഘത്തില്‍ തനിക്ക് വിശ്വാസമില്ലെന്നും സി ബി ഐ അന്വേഷണം വേണമെന്നുമാണ് കഴിഞ്ഞ തിങ്കളാഴ്ച, കൊല്ലപ്പെട്ട ബി ജെ പി പ്രവര്‍ത്തകന്റെ വിധവ സുപ്രീം കോടതി മൂന്നംഗ ബഞ്ചിന് മുമ്പില്‍ അറിയിച്ചത്. ഇതുള്‍പ്പെടെ സംഘര്‍ഷവുമായി ബന്ധപ്പെട്ട കേസുകളിലെ അന്വേഷണത്തിന് മേല്‍നോട്ടം വഹിക്കുന്നതിന് സംസ്ഥാനത്തിന് പുറത്ത് നിന്നുള്ള വിരമിച്ച ഹൈക്കോടതി ജഡ്ജിയെ നിയമിക്കുന്ന കാര്യം ആലോചിക്കുന്നുണ്ടെന്നാണ് സുപ്രീം കോടതി പ്രസ്താവിത ആവശ്യത്തോട് പ്രതികരിച്ചത്. തങ്ങളുടെ രാഷ്ട്രീയ താത്പര്യത്തിന് വേണ്ടി ഭര്‍ത്താവിനെ കൊലക്ക് കൊടുക്കുകയായിരുന്നു ഉത്തര്‍ പ്രദേശ് ഭരണകൂടം എന്നാണ് ശ്യാം സുന്ദറിന്റെ വിധവ പറയുന്നത്.

യു പി പോലീസ് കസ്റ്റഡിയില്‍ കൊല്ലപ്പെട്ട ജാന്‍പൂരില്‍ നിന്നുള്ള യുവാവിന്റെ കേസില്‍ അന്വേഷണം സി ബി ഐക്ക് കൈമാറിക്കൊണ്ടുള്ള വിധി സെപ്തംബര്‍ എട്ടിന് അലഹബാദ് ഹൈക്കോടതി പുറപ്പെടുവിച്ചു. അതിനെതിരെ യു പി സര്‍ക്കാര്‍ സുപ്രീം കോടതിയെ സമീപിച്ചതില്‍ സുപ്രീം കോടതി ഡിവിഷന്‍ ബഞ്ച് കഴിഞ്ഞ വാരം ഹരജി തള്ളുകയാണുണ്ടായത്. ഇരുപത്തിനാല് വയസ്സുള്ള യുവാവിന്റെ കസ്റ്റഡി മരണത്തില്‍ ഐ പി എസ് റാങ്കിലുള്ള ഉദ്യോഗസ്ഥര്‍ക്ക് പങ്കുണ്ടെന്ന് പ്രഥമദൃഷ്ട്യാ കണ്ടെത്തിയതിന്റെ അടിസ്ഥാനത്തിലാണ് സുപ്രീം കോടതി ഹരജി തള്ളിയത്.

വീട്ടില്‍ നിന്ന് ബലംപ്രയോഗിച്ച് പോലീസ് കസ്റ്റഡിയിലെടുത്ത സഹോദരനെ കാണാന്‍ പോലീസ് സ്റ്റേഷനില്‍ എത്തിയെങ്കിലും കാണാന്‍ അനുവദിച്ചില്ല. തൊട്ടടുത്ത ദിവസം പോലീസ് കസ്റ്റഡിയില്‍ മരിച്ചു എന്ന വാര്‍ത്തയാണ് ലഭിച്ചതെന്ന് കൊല്ലപ്പെട്ടയാളുടെ സഹോദരന്‍ മാധ്യമങ്ങള്‍ക്ക് മുമ്പില്‍ വ്യക്തമാക്കിയിരുന്നു. എന്നാല്‍ കൊലപാതക കുറ്റം ചുമത്തപ്പെട്ട പോലീസ് ഉദ്യോഗസ്ഥര്‍ക്ക് ക്ലീന്‍ചിറ്റ് നല്‍കാനുള്ള ശ്രമമാണ് ഉത്തര്‍ പ്രദേശ് പോലീസ് നടത്തിയത്. അതിനായി പ്രധാന തെളിവുകള്‍ ഒഴിവാക്കി മറ്റു ചില തെളിവുകള്‍ വ്യാജമായി ചമച്ചുണ്ടാക്കി. അത് ബോധ്യമായതിന്റെ അടിസ്ഥാനത്തിലാണ് സ്വതന്ത്രവും പക്ഷപാതരഹിതവുമായ അന്വേഷണം നടത്തണമെന്ന ആവശ്യത്തിലേക്ക് അലഹബാദ് ഹൈക്കോടതി എത്തിയത്. എന്നാല്‍ കസ്റ്റഡി കൊലപാതക തെളിവുകളെ പാടെ നിഷേധിക്കുന്നതും കൗതുകം ജനിപ്പിക്കുന്നതുമായ കെട്ടുകഥയാണ് ഇതിലെ പോലീസ് ഭാഷ്യം. മോട്ടോര്‍ സൈക്കിളില്‍ അപകടം വരുത്തിയതിന് ജനം മര്‍ദിച്ചതാണ് മരണത്തിലേക്ക് നയിച്ചതെന്നാണ് പോലീസ് പറയുന്നത്. പോലീസ് ഇരയെ സി എച്ച് സിയില്‍ എത്തിച്ചെങ്കിലും ഡ്യൂട്ടിയിലുണ്ടായിരുന്ന ഡോക്ടര്‍ ജാന്‍പൂര്‍ ജില്ലാ ആശുപത്രിയിലേക്ക് റഫര്‍ ചെയ്യുകയായിരുന്നു. അവിടെ എത്തിയപ്പോള്‍ മരണപ്പെടുകയും ചെയ്തു എന്ന യു പി പോലീസ് വിശദീകരണത്തെ പൊളിക്കുന്ന തെളിവുകളാണ് പിന്നീട് പുറത്തുവന്നത്.

ജനങ്ങളുടെ ജീവനും സ്വത്തിനും സംരക്ഷണം നല്‍കേണ്ട നിയമപാലകര്‍ തന്നെ അവരെ കൊല്ലുന്നു. പകല്‍ വെളിച്ചത്തില്‍ അതൊളിപ്പിക്കാന്‍ നടത്തുന്ന വിഫല ശ്രമങ്ങളാണ് ഓരോന്നായി ഇവിടെ അഴിഞ്ഞുവീഴുന്നത്. അത്തരം സംഭവ വികാസങ്ങളുടെ ഉഗ്രരൂപങ്ങളാണ് ഉത്തര്‍ പ്രദേശില്‍ നിന്ന് പുറത്തു വന്നുകൊണ്ടിരിക്കുന്നത്. കസ്റ്റഡി മരണങ്ങളും പോലീസ് അതിക്രമങ്ങളും നമ്മുടെ രാജ്യത്ത് അപൂര്‍വ സംഗതികളല്ലെങ്കിലും ഉത്തര്‍ പ്രദേശില്‍ ഭരണകൂടം സ്വീകരിക്കുന്ന സമീപനങ്ങളാണ് പ്രശ്നവത്കരിക്കപ്പെടാറുള്ളത്. വേട്ടക്കാര്‍ക്കൊപ്പം നിര്‍ലജ്ജം അണിനിരക്കാറുണ്ട് യോഗി ഭരണകൂടം. യു പിയിലെ ആള്‍ക്കൂട്ട കൊലപാതക കേസുകളില്‍ ഒന്നില്‍ പോലും ഇരകള്‍ക്ക് നീതി ലഭിച്ചില്ലെന്ന ബി ബി സി അന്വേഷണ റിപ്പോര്‍ട്ട് തെളിയിക്കുന്നതും അത് തന്നെയാണ്. വസ്തുതകളെ കീഴ്മേല്‍ മറിച്ച് ആടിനെ പട്ടിയും പേപ്പട്ടിയുമാക്കി മാറ്റുന്ന വിധം നിയമവാഴ്ചയെ ഭരണകൂടം തന്നെ പരസ്യമായി വെല്ലുവിളിച്ചതിന്റെ സമീപകാല ഉദാഹരണങ്ങള്‍ നിരവധിയാണ്. ഭരണകൂടത്തിന്റെ ദീര്‍ഘകാല ലക്ഷ്യങ്ങളുടെ ഭാഗമായി ഭരണകൂടം തന്നെ വളര്‍ത്തുന്ന ഗോ രക്ഷക് സംഘങ്ങളടക്കമുള്ള ഗുണ്ടാ സംഘങ്ങള്‍ക്ക് സൈ്വരവിഹാരം നടത്താന്‍ പാകത്തില്‍ ഒരു വലിയ സംസ്ഥാനത്തെ മാറ്റിത്തീര്‍ത്തതിന്റെ ഫലമാണ് സ്വന്തം അനുയായികള്‍ക്ക് പോലും ജീവഭയത്തോടെ അന്തിയുറങ്ങേണ്ടി വരുന്ന സാഹചര്യം ഉത്തര്‍ പ്രദേശില്‍ സംജാതമാക്കിയത്.

ഉത്തര്‍ പ്രദേശിലെ ഗൊരഖ്പൂര്‍ ബി ആര്‍ ഡി ആശുപത്രിയിലെ പീഡിയാട്രീഷനായിരുന്ന ഡോ. കഫീല്‍ ഖാനെ യോഗി ആദിത്യനാഥ് സര്‍ക്കാര്‍ പിരിച്ചുവിട്ടതാണ് ഏറ്റവും പുതിയ വാര്‍ത്ത. 2017ല്‍ ഗൊരഖ്പൂര്‍ ബി ആര്‍ ഡി മെഡിക്കല്‍ കോളജില്‍ ഓക്സിജന്‍ ലഭിക്കാതെ 63 കുഞ്ഞുങ്ങള്‍ മരിച്ച സന്ദര്‍ഭത്തില്‍ ധീരോദാത്തമായ ഇടപെടല്‍ നടത്തി ശ്രദ്ധേയനായ കഫീല്‍ ഖാനെ ചേര്‍ത്തു പിടിക്കുന്നതിന് പകരം വേട്ടയാടുകയായിരുന്നു യു പി ഭരണകൂടം ചെയ്തത്. തുടരെയുള്ള നിയമ പോരാട്ടങ്ങളില്‍ നീതിപീഠം കഫീല്‍ ഖാനെ തുണച്ചെങ്കിലും ഭരണകൂടം പ്രതികാര ദാഹത്തോടെ അദ്ദേഹത്തെ പിന്തുടര്‍ന്നതിനൊടുവിലാണിപ്പോള്‍ പിരിച്ചുവിട്ടിരിക്കുന്നത്.

ലഖിംപൂര്‍ ഖേരിയിലെ കര്‍ഷക കൂട്ടക്കൊലക്കേസില്‍ നൂറുകണക്കിന് കര്‍ഷക പ്രതിഷേധക്കാര്‍ ദൃക്സാക്ഷികളായുള്ളതില്‍ 23 പേരുടെ സാക്ഷിമൊഴികള്‍ മാത്രം രേഖപ്പെടുത്തിയ യു പി പോലീസ് നടപടിയെ വിമര്‍ശിച്ചിരുന്നു സുപ്രീം കോടതി. യു പി പോലീസ് നടപടിയില്‍ ആശ്ചര്യം രേഖപ്പെടുത്തിയ സുപ്രീം കോടതി സാക്ഷികള്‍ക്ക് സംരക്ഷണമൊരുക്കണമെന്നും ആവശ്യപ്പെട്ടു. ക്രിമിനല്‍ നീതിന്യായ സംവിധാനത്തില്‍ സാക്ഷികള്‍ക്ക് വലിയ പങ്ക് വഹിക്കാനുണ്ട്. അധികാരവും ഉന്നത സ്വാധീനവുമുള്ളവര്‍ പ്രതിസ്ഥാനത്ത് വരുന്ന കേസുകളില്‍ സാക്ഷി പറയാന്‍ പലരും തയ്യാറാകാതിരിക്കുന്ന സ്ഥിതിവിശേഷം ആത്യന്തികമായി നീതിന്യായ സംവിധാനത്തിലുള്ള പൊതുജന വിശ്വാസം നഷ്ടപ്പെടാനിടയാക്കും. നിയമവാഴ്ച ഉറപ്പുവരുത്തേണ്ട ഭരണകൂടം തന്നെ വേട്ടക്കാര്‍ക്കൊപ്പം നെഞ്ചുവിരിച്ച് നില്‍ക്കുന്ന സമയത്ത് സാക്ഷികള്‍ നിര്‍ഭയരായിരിക്കുമെന്ന് കരുതാന്‍ നിര്‍വാഹമില്ല. ഐ പി എസ് ഉദ്യോഗസ്ഥര്‍ ഉള്‍പ്പെടെയുള്ളവര്‍ കസ്റ്റഡി പീഡനത്തിന് കാര്‍മികത്വം വഹിക്കുമ്പോള്‍ ക്രിമിനലുകളുടെ കൈയിലേക്ക് സംസ്ഥാനത്തിന്റെ ക്രമസമാധാന ചുമതല വഴുതിപ്പോകുന്ന സാഹചര്യമാണുണ്ടാകുന്നത്. സാക്ഷി പറയാന്‍ പോലും ആരും ധൈര്യപ്പെടാത്ത സാഹചര്യവും അതിനാലാണുണ്ടാകുന്നത്. കോളിളക്കം സൃഷ്ടിച്ച കേസുകളില്‍ പലതും കോടതിയില്‍ പരാജയപ്പെട്ടു പോകുന്നതും അങ്ങനെയാണ്. രാജ്യത്ത് പൊതുവിലും ഉത്തര്‍ പ്രദേശില്‍ സവിശേഷമായും ക്രമസമാധാന പാലനത്തില്‍ നിലനില്‍ക്കുന്ന ഭീകര സാഹചര്യം നമ്മുടെ നീതിന്യായ സംവിധാനത്തിന് മാരക മുറിവേല്‍പ്പിക്കുന്നതാണ്.