Kerala
ഭരണഘടനാ ചട്ടങ്ങള്‍ക്കുള്ളില്‍ നിന്ന് പ്രവര്‍ത്തിക്കാന്‍ ഗവര്‍ണര്‍ക്ക് നിര്‍ദേശം നല്‍കണം: രാഷ്ട്രപതിക്ക് കെ സി വേണുഗോപാലിന്റെ കത്ത്
ഭരണഘടനാപരവും നിയമപരവുമായ അംഗീകാരമില്ലാത്ത 'കാവിക്കൊടിയേന്തിയ ഭാരതമാതാവിന്റെ' ചിത്രം ഔദ്യോഗിക ചടങ്ങുകളില്‍ പ്രദര്‍ശിപ്പിക്കണമെന്ന് ഗവര്‍ണര്‍ ശാഠ്യം പിടിക്കുന്നത് അംഗീകരിക്കാനാവില്ല.
ന്യൂഡല്‍ഹി | ഭരണഘടനാ ചട്ടങ്ങളുടെ പരിധിക്കുള്ളില്‍ നിന്ന് ഉത്തരവാദിത്തങ്ങള്‍ നിറവേറ്റാനും ഫെഡറല്‍ സംവിധാനത്തെ തകര്‍ക്കുന്ന നടപടികളില്‍ നിന്ന് പിന്മാറാനും ഗവര്‍ണര്‍ രാജേന്ദ്ര അര്‍ലേക്കര്‍ക്ക് നിര്‍ദേശം നല്‍കണമെന്ന് ആവശ്യപ്പെട്ട് കെ സി വേണുഗോപാല്‍ എം പി. ഈ ആവശ്യമുന്നയിച്ച് വേണുഗോപാല്‍ രാഷ്ട്രപതിക്ക് കത്തെഴുതി.
ഭരണഘടനാ ചട്ടക്കൂട്ടിനകത്തു നിന്ന് പ്രവര്‍ത്തിക്കേണ്ടതാണ് ഗവര്‍ണര്‍ പദവി. പ്രത്യയശാസ്ത്രപരമായ കാഴ്ചപ്പാടുകള്‍ക്ക് അവിടെ പ്രസക്തിയില്ലെന്നും എ ഐ സി സി ജനറല്‍ സെക്രട്ടറി കൂടിയായ വേണുഗോപാല്‍ കത്തില്‍ ചൂണ്ടിക്കാട്ടി. കാവിക്കൊടിയേന്തിയ ഭാരതാംബ ചിത്രവിവാദവുമായി ബന്ധപ്പെട്ട് ഗവര്‍ണറുടെ നിലപാടുകള്‍ കേരളത്തിലുണ്ടാക്കുന്ന ഭരണഘടനാ പ്രതിസന്ധിയും ക്രമസമാധാന പ്രശ്നങ്ങളും സംബന്ധിച്ച ആശങ്ക അദ്ദേഹം രാഷ്ട്രപതിയെ അറിയിച്ചു. രാജ്ഭവന്‍ കൈക്കൊള്ളുന്ന ഭരണഘടന വിരുദ്ധ നിലപാടുകള്‍ സംസ്ഥാനത്തെ ജനാധിപത്യ സ്ഥാപനങ്ങളുടെ പ്രവര്‍ത്തനത്തെ ദുര്‍ബലപ്പെടുത്തുകയും, ക്രമസമാധാന പ്രശ്‌നങ്ങള്‍ സൃഷ്ടിക്കുകയും ചെയ്തിട്ടുണ്ട്.
വ്യക്തമായ വിവേചനാധികാരമുള്ള വിഷയങ്ങളില്‍ ഒഴികെ, മന്ത്രിസഭയുടെ ഉപദേശത്തിന് അനുസൃതമായി പ്രവര്‍ത്തിക്കാന്‍ ഉദ്ദേശിച്ചുള്ള ഭരണഘടനാ സ്ഥാനമാണ് ഗവര്‍ണറുടേത്. ഗവര്‍ണര്‍ നിഷ്പക്ഷതയോടും അന്തസ്സോടും സംയമനത്തോടും കൂടി പ്രവര്‍ത്തിക്കണമെന്നും പക്ഷപാതപരമോ പ്രത്യയശാസ്ത്രപരമോ ആയ ഇടപെടലുകള്‍ ഒഴിവാക്കണമെന്നും സര്‍ക്കാരിയ കമ്മീഷന്‍, പുഞ്ചി കമ്മീഷന്‍ തുടങ്ങിയവ വ്യക്തമാക്കുന്നു. എന്നാല്‍, കേരളത്തിലെ സമീപകാല സംഭവവികാസങ്ങള്‍ ഭരണഘടനാ തത്വങ്ങളില്‍ നിന്ന് വ്യതിചലിക്കുന്നതാണ്.
ഭരണഘടനാപരവും നിയമപരവുമായ അംഗീകാരമില്ലാത്ത’കാവിക്കൊടിയേന്തിയ ഭാരതമാതാവിന്റെ’ ചിത്രം ഔദ്യോഗിക ചടങ്ങുകളില്‍ പ്രദര്‍ശിപ്പിക്കണമെന്ന് ഗവര്‍ണര്‍ ശാഠ്യം പിടിക്കുന്നത് അംഗീകരിക്കാനാവില്ല. ദേശീയപതാകയ്ക്ക് പകരം ഇത്തരം അനൗദ്യോഗിക ചിത്രത്തിന് പൊതുചടങ്ങുകളില്‍ മുന്‍ഗണന നല്‍കുന്നത് അപകടകരമാണ്.
ഫെഡറലിസവും ഭരണഘടനാപരമായ ഔചിത്യവും ഉയര്‍ത്തിപ്പിടിച്ചുകൊണ്ട്, കേന്ദ്രത്തെയും സംസ്ഥാനത്തെയും ബന്ധിപ്പിക്കുന്ന നിഷ്പക്ഷ നിലപാടില്‍ ഉറച്ചുനിന്നാണ് ഗവര്‍ണര്‍ പ്രവര്‍ത്തിക്കേണ്ടത്. അതില്‍നിന്നും വ്യതിചലിക്കുന്നത് ഭരണഘടനയിലുള്ള ജനങ്ങളുടെ വിശ്വാസത്തെ ദുര്‍ബലപ്പെടുത്തുമെന്നും വേണുഗോപാല്‍ കത്തില്‍ പറഞ്ഞു.
Latest
ഒഴുക്കില്‍പ്പെട്ട് യുവാവ് മരിച്ചു
കൊച്ചിയില്‍ നിന്ന് യാത്ര പോയ ഹാജിമാര്‍ തിരിച്ചെത്തിത്തുടങ്ങി
സമസ്ത നൂറാം വാര്‍ഷികം: നാടാകെ നിറഞ്ഞു; നൂറിന്‍ വെളിച്ചം
ഐ സി എഫ് സമ്മര്‍ ക്യാമ്പ്
ഭരണഘടനാ ചട്ടങ്ങള്‍ക്കുള്ളില്‍ നിന്ന് പ്രവര്‍ത്തിക്കാന്‍ ഗവര്‍ണര്‍ക്ക് നിര്‍ദേശം നല്‍കണം: രാഷ്ട്രപതിക്ക് കെ സി വേണുഗോപാലിന്റെ കത്ത്
കരടിയുടെ ആക്രമണത്തില്‍ മധ്യവയസ്‌കന് പരുക്ക്
