ഗസ്സ വെടിനിർത്തൽ: സഹായവിതരണം യു എൻ നിയന്ത്രണത്തിൽ പുനരാരംഭിക്കണമെന്ന ഹമാസ്​ നിർദേശം ഇസ്റാഈൽ തള്ളി; ചർച്ച തുടരും

ഗസ്സ സിറ്റി | ഗസ്സയിലെ വെടിനിർത്തൽ ചർച്ചകൾ ഖത്വർ തലസ്ഥാനമായ ദോഹയിലും അമേരിക്കയിലെ വാഷിംഗ്ടണിലും ഇന്നും തുടരും. ഗസ്സയിലെ സഹായവിതരണം യു എൻ നിയന്ത്രണത്തിൽ പുനരാരംഭിക്കണമെന്ന ഹമാസ്​ നിർദേശത്തെ ഇസ്റാഈൽ എതിർത്തു. ഇസ്റാഈൽ പ്രധാനമന്ത്രി ബെന്യമിൻ നെതന്യാഹു അമേരിക്കയിൽ നേതാക്കളുമായി തിരക്കിട്ട ചർച്ചയിലാണ്. വ്യാഴാഴ്ചയോടെ താത്കാലിക വെടിനിർത്തൽ കരാർ യാഥാർഥ്യമാകുമെന്ന പ്രതീക്ഷയിലാണ് ലോകം.

ഹമാസ്​, ഇസ്റാഈൽ പ്രതിനിധി സംഘങ്ങളാണ് ദോഹയിൽ തുടരുന്ന ചർച്ചയിൽ പങ്കെടുക്കുന്നത്.  ചർച്ചകൾ ശരിയായ ദിശയിലെന്ന്​ അമേരിക്ക അറിയിച്ചു. ഭിന്നതകൾക്ക്​ പരിഹാരം കണ്ട് ഉടൻ വെടിനിർത്തലിലേക്ക്​ നീങ്ങാൻ ഇരുപക്ഷത്തിനും കഴിയുമെന്ന്​ അമേരിക്കയുടെ പശ്ചിമേഷ്യൻ ദൂതൻ സ്റ്റിവ്​ വിറ്റ്​കോഫ്​ പറഞ്ഞു. വെടിനിർത്തൽ വേളയിൽ ഗസ്സയിലേക്കുള്ള സഹായ വിതരണം യു എന്നിനോ സ്വതന്ത്ര ഏജൻസിക്കോ കൈമാറണമെന്നതാണ്​ ഹമാസ്​ ഉന്നയിച്ച പ്രധാന ആവശ്യങ്ങളിലൊന്ന്​. എന്നാൽ ഇസ്റാഈൽ ഇത്​ എതിർക്കുകയാണ്​.

വാഷിംഗ്ടണിൽ ഇസ്റാഈൽ പ്രധാനമന്ത്രി ബെന്യമിൻ നെതന്യാഹുവുമായി ഇന്നലെ സ്റ്റിവ്​ വിറ്റ്​കോഫ്​ ചർച്ച നടത്തി. യു എസ്​ സ്​റ്റേറ്റ്​ സെക്രട്ടറി മാർക്കോ റൂബിയോയുമായി ഇന്ന്​ നെതന്യാഹു ചർച്ച നടത്തും. വെടിനിർത്തലിന് പുറമെ യുദ്ധാനന്തര ഗസ്സയുടെ ഭാവി, ഇറാൻ ആണവ പദ്ധതിക്കെതിരായ നടപടി എന്നിവ സംബന്ധിച്ചും അമേരിക്കൻ നേതാക്കളുമായി ചർച്ച നടത്തുമെന്ന്​ നെതന്യാഹു പറഞ്ഞു. ഇസ്റാഈൽ- ഗസ്സ അതിർത്തിയോട്​ ചേർന്ന്​ മുഴുവൻ ഫലസ്തീനികളെയും പ്രത്യേകം പുനരധിവസിപ്പിച്ച്​ ഹമാസിന്‍റെ സ്വാധീനം ഇല്ലാതാക്കുന്നതുൾപ്പെടെയുള്ള ചില നിർദേശങ്ങളാണ്​ നെതന്യാഹു അമേരിക്കക്ക്​ മുമ്പാ​കെ സമർപ്പിച്ചതെന്ന്​ പാശ്ചാത്യ മാധ്യമങ്ങൾ റിപോർട്ട് ചെയ്തു.