വക്കം പുരുഷോത്തമൻ്റെ വിയോഗത്തിൽ അനുശോചന പ്രവാഹം

മുൻ ഗവർണറും സീനിയർ നേതാവുമായ വക്കം പുരുഷോത്തമന്റെ നിര്യാണത്തിൽ കേരള ഗവർണർ ആരിഫ് മുഹമ്മദ് ഖാൻ അനുശോചിച്ചു. സാമാജികൻ, വിവിധ വകുപ്പുകളിൽ മന്ത്രി, നിയമസഭാ സ്പീക്കർ, പാർലിമെന്റേറിയൻ തുടങ്ങിയ നിലകളിൽ അദ്ദേഹം നൽകിയ സേവനത്തിൽ കാര്യക്ഷമതയും ദീർഘവീക്ഷണവും പ്രതിഫലിച്ചതായി ഗവർണർ അനുസ്മരിച്ചു. “കുറെ മാസം മുമ്പ് വീട്ടിലെത്തി കണ്ടപ്പോഴുള്ള സൗഹൃദത്തിന്റെ ഊഷ്മളത മനസ്സിൽ മായാതെ നിൽക്കുന്നു. അദ്ദേഹത്തിന്റെ ആത്മാവിന് നിത്യശാന്തി നേരുന്നു”- ഗവർണർ സന്ദേശത്തിൽ പറഞ്ഞു.

മുതിർന്ന കോൺഗ്രസ് നേതാവും മികച്ച ഭരണാധികാരിയുമായിരുന്ന വക്കം പുരുഷോത്തമൻ വിട വാങ്ങി. വഹിച്ചിരുന്ന പദവികളിൽ എല്ലാം തിളങ്ങി നിന്നിരുന്ന അദ്ദേഹം എല്ലാ പ്രശ്നങ്ങളും ക്രിയാത്മകമായി പരിഹരിക്കുന്നതിൽ മികവ് പുലർത്തിയിരുന്നു. വക്കത്തിന്റെ വിയോഗം പാർട്ടിക്ക് വലിയ നഷ്ടമാണ് ഉണ്ടാക്കിയിരിക്കുന്നത്. പ്രിയങ്കരനായ വക്കം പുരുഷോത്തമന് ആദരാഞ്ജലികൾ.

പ്രിയപെട്ട വക്കം പുരുഷോത്തമൻ നമ്മെ വിട്ടു പിരിഞ്ഞു. കേരള രാഷ്ട്രീയത്തിലെ അതികായൻ ആണ് വക്കം പുരുഷോത്തമൻ. ഞാൻ വ്യക്തിപരമായി ഏറെ അടുപ്പം സൂക്ഷിക്കുന്ന വക്കത്തിന്റെ വിയോഗം വല്ലാതെ വേദനിപ്പിക്കുന്നു. ഞാൻ പൊതുമരാമത്ത് വകുപ്പ് മന്ത്രിയായിരുന്നപ്പോൾ സ്പീക്കറായിരുന്നു വക്കം. കർക്കശക്കാരനായിരുന്നെങ്കിലും സ്നേഹ നിധിയായ ഗുരുവായിരുന്നു എനിക്ക് അദ്ദേഹം. തിരുവനന്തപുരത്തെ യാത്രാ ക്ലേശം പരിഹരിക്കുന്നതിനു സിറ്റി ഇമ്പ്രൂവ്മെന്റ് പദ്ധതി കൊണ്ടുവരികയും അതിന്റെ ഭാഗമായി പാളയത്ത് അണ്ടർ പാസ്സ് കൊണ്ടുവരാനും ഞങ്ങൾ ആലോചിച്ചു. പ്രസ്തുത പ്രവർത്തി നിശ്ചിത കാലാവധിക്കുള്ളിൽ പൂർത്തീകരിക്കുകയാണെങ്കിൽ ഒരു സ്വർണ്ണ മോതിരം എനിക്ക് സമ്മാനിക്കുമെന്ന് വക്കം ഓഫർ ചെയ്യുകയുണ്ടായി. പറഞ്ഞ സമയത്തിന് മുൻപേ പദ്ധതി പൂർത്തീകരിക്കാൻ സാധിച്ചു. മോതിരത്തിന്റെ കാര്യം ഞാൻ മറന്നെങ്കിലും സ്പീക്കർ പദവിയിൽ നിന്നും മാറി അദ്ദേഹം ധനകാര്യമന്ത്രിയായിട്ടും കൃത്യമായി ആ ചടങ്ങിൽ അന്നത്തെ മുഖ്യമന്ത്രി ബഹുമാന്യനായ ഉമ്മൻ ചാണ്ടി സാർ വശം ബാപ്പയുടെ ചിത്രം ആലേഖനം ചെയ്ത മോതിരം എനിക്ക് സമ്മാനിക്കുകയുണ്ടായി. പ്രിയപ്പെട്ട വക്കത്തിന്റെ വിയോഗത്തിൽ ആദരാഞ്ജലികൾ അർപ്പിക്കുന്നതോടൊപ്പം കുടുംബാംഗങ്ങളുടെ ദുഃഖത്തിൽ പങ്ക് ചേരുന്നു.

മുതിർന്ന കോൺഗ്രസ് നേതാവും മികച്ച പാർലിമെന്റേറിയനുമായിരുന്ന വക്കം പുരുഷോത്തമന്റെ നിര്യാണത്തിൽ അനുശോചനം രേഖപ്പെടുത്തുന്നു. കേരള നിയമസഭാ സ്പീക്കറായും മന്ത്രിയായും പാർലിമെൻറ് അംഗമായും വിവിധ സംസ്ഥാനങ്ങളിൽ ഗവർണറായുമെല്ലാം ഏവർക്കും പ്രിയങ്കരനായിരുന്ന അദ്ദേഹത്തിന്റെ വിയോഗത്തിൽ കുടുംബത്തിന്റെയും സ്നേഹജനങ്ങളുടേയും ദുഃഖത്തിൽ പങ്കുചേരുന്നു. മുതിർന്ന കോൺഗ്രസ് നേതാവ് വക്കം പുരുഷോത്തമന്റെ നിര്യാണത്തിൽ അനുശോചിക്കുന്നു.

സജി ചെറിയാൻ (ഫിഷറീസ് മന്ത്രി)

കോൺഗ്രസ്‌ നേതാവും മുൻ മന്ത്രിയും മുൻ സ്പീക്കറും മുൻ ഗവർണറും ആയിരുന്ന വക്കം പുരുഷോത്തമൻ സാറിന്റെ വിയോഗത്തിൽ അനുശോചനം രേഖപ്പെടുത്തുന്നു. സൗമ്യനായ രാഷ്ട്രീയനേതാവായിരുന്നു അദ്ദേഹം. മികച്ച പാർലമെന്റേറിയനും ഭരണാധികാരിയുമായിരുന്നു. കേരളരാഷ്ട്രീയത്തിലെ തലമുതിർന്ന ഒരു നേതാവ് കൂടെ വിടപറയുകയാണ്. അദ്ദേഹത്തിന്റെ ബന്ധുമിത്രാദികളുടെയും പൊതുസമൂഹത്തിന്റെയും ദുഃഖത്തിൽ പങ്കുചേരുന്നു. ആദരാഞ്ജലികൾ.