ഇസ്രായേലിന്റെ എല്ലാ ആണവ സൗകര്യങ്ങളും അന്താരാഷ്ട്ര ആണവോര്‍ജ്ജ ഏജന്‍സിയുടെ കീഴിലാക്കണം : ഖത്വര്‍

വിയന്ന |  എല്ലാ ഇസ്രായേലി ആണവ സൗകര്യങ്ങളെയും അന്താരാഷ്ട്ര ആണവോര്‍ജ്ജ ഏജന്‍സിയുടെ കീഴില്‍ കൊണ്ടുവരുന്നതിനുള്ള അന്താരാഷ്ട്ര ശ്രമങ്ങള്‍ ശക്തമാക്കണമെന്നും ആണവ വ്യാപന രഹിത രാജ്യമെന്ന നിലയില്‍ ആണവ ആയുധ വ്യാപന കരാറില്‍ ഇസ്രായേല്‍ ചേരണമെന്നും ഖത്വര്‍ ആവശ്യപ്പെട്ടു.

അധിനിവേശ ഫലസ്തീന്‍ പ്രദേശങ്ങളിലെ സ്ഥിതിയും ഇസ്രായേലിന്റെ ആണവ ശേഷിയും ചര്‍ച്ച ചെയ്യുന്നതിനായി വിയന്നയില്‍ നടന്ന അന്താരാഷ്ട്ര ആണവോര്‍ജ്ജ ഏജന്‍സിയുടെ ബോര്‍ഡ് ഓഫ് ഗവര്‍ണേഴ്സിന്റെ സെഷനില്‍ വിയന്നയിലെ ഐക്യരാഷ്ട്രസഭ ഓഫീസിലെയും അന്താരാഷ്ട്ര സംഘടനകളിലെയും ഖത്വര്‍ അംബാസഡറും സ്ഥിരം പ്രതിനിധിയുമായ ജാസിം യാക്കൂബ് അല്‍ ഹമ്മദിയാണ് ഇക്കാര്യം വ്യക്തമാക്കിയത്.

ഐക്യരാഷ്ട്രസഭ സുരക്ഷാ കൗണ്‍സില്‍, യുഎന്‍ ജനറല്‍ അസംബ്ലി, ഐഎഇഎ, 1995 ലെ എന്‍പിടി അവലോകന സമ്മേളനം എന്നിവയുടെ പ്രമേയങ്ങള്‍ അനുസരിച്ചുള്ള പ്രതിബദ്ധതകള്‍ അന്താരാഷ്ട്ര സമൂഹവും അതിന്റെ സ്ഥാപനങ്ങളും ഉയര്‍ത്തിപ്പിടിക്കേണ്ടതിന്റെ ആവശ്യകത അല്‍ ഹമ്മദി അടിവരയിട്ടു.

ഇസ്രായേല്‍ ഒഴികെയുള്ള എല്ലാ മിഡില്‍ ഈസ്റ്റിലെ രാജ്യങ്ങളും നിലവില്‍ ഐഎഇഎ യില്‍ കക്ഷികളാണെന്നും ഏജന്‍സിയുമായി ഫലപ്രദമായ സുരക്ഷാ കരാറുകളുണ്ടെന്നും അദ്ദേഹം ചൂണ്ടിക്കാട്ടി. പലസ്തീന്‍ ജനതയെ നിര്‍ബന്ധിതമായി കുടിയിറക്കണമെന്ന തീവ്രവാദ ആഹ്വാനങ്ങള്‍ വര്‍ദ്ധിപ്പിക്കുക, വെസ്റ്റ് ബാങ്കിലെ നഗരങ്ങള്‍ക്കും അഭയാര്‍ത്ഥി ക്യാമ്പുകള്‍ക്കുമെതിരെ സൈനിക നടപടികള്‍ ശക്തമാക്കുക, ഗാസയിലേക്കുള്ള മാനുഷിക സഹായം തടയുക, പലസ്തീന്‍ അഭയാര്‍ത്ഥികള്‍ക്കായുള്ള ഐക്യരാഷ്ട്രസഭയുടെ ദുരിതാശ്വാസ, പ്രവര്‍ത്തന ഏജന്‍സിയുടെപ്രവര്‍ത്തനങ്ങളില്‍ നിയന്ത്രണങ്ങള്‍ നിലനിര്‍ത്തുക എന്നിവയുള്‍പ്പെടെ ഇസ്രായേല്‍ ആക്രമണാത്മക നയങ്ങളാണ് തുടരുന്നുതെന്നും അദ്ദേഹം പറഞ്ഞു