700 ജിബിപിഎസ് വരെ വേഗം; ഉപഗ്രഹ ഇന്റർനെറ്റ് സ്റ്റാർ ലിങ്ക് ഉടൻ ഇന്ത്യയിൽ പ്രവർത്തനം തുടങ്ങും

ന്യൂഡൽഹി | ഇലോൺ മസ്കിന്റെ ഉടമസ്ഥതയിലുള്ള സാറ്റലൈറ്റ് അധിഷ്ഠിത ഇന്റർനെറ്റ് സേവന ദാതാക്കളായ സ്റ്റാർലിങ്ക് 12 മാസത്തിനുള്ളിൽ ഇന്ത്യയിൽ പ്രവർത്തനം ആരംഭിക്കും. തുടക്കത്തിൽ 600 മുതൽ 700 Gbps വരെ ബാൻഡ്‌വിഡ്ത്ത് വാഗ്ദാനം ചെയ്യുമെന്ന് ടെലികമ്മ്യൂണിക്കേഷൻസ് വകുപ്പ് വൃത്തങ്ങളെ ഉദ്ധരിച്ച് എൻഡിടിവി പ്രോഫിറ്റ് റിപ്പോർട്ട് ചെയ്യുന്നു. തുടക്കത്തിൽ നഗരപ്രദേശങ്ങൾ കേന്ദ്രീകരിച്ച് .30,000 മുതൽ 50,000 വരെ ഉപഭോക്താക്കൾക്കായിരിക്കും സേവനം ലഭ്യമാകുക. റെഗുലേറ്ററി അനുമതി ലഭിച്ചാൽ 2027 ഓടെ ഇത് 3 Tbps ആയി വികസിപ്പിക്കുമെന്നും റിപ്പോർട്ടിൽ വ്യക്തമാക്കുന്നു

സ്റ്റാർലിങ്കിന്റെ സാറ്റലൈറ്റുകളെ ഇന്റർനെറ്റുമായി ബന്ധിപ്പിക്കുന്ന രണ്ടോ മൂന്നോ ‘എർത്ത് സ്റ്റേഷൻ സൈറ്റുകൾ’ കണ്ടെത്തിയിട്ടുണ്ട്. ഓരോ സൈറ്റിലും ഒമ്പത് ‘ഗേറ്റ്‌വേകൾ’ വീതം സ്ഥാപിക്കാനാണ് പദ്ധതി. ഇത് ഉപയോക്താവിനെ ഇന്റർനെറ്റുമായി ബന്ധിപ്പിക്കുകയും സാറ്റലൈറ്റുകളെ ആഗോള ഇന്റർനെറ്റ് അടിസ്ഥാന സൗകര്യങ്ങളുമായി ബന്ധിപ്പിച്ച് അതിവേഗ ഇന്റർനെറ്റ് ലഭ്യമാക്കുകയും ചെയ്യുന്നു.

ഇന്ത്യയിൽ ഡയറക്ട്-ടു-കൺസ്യൂമർ (DTC) മോഡൽ അവതരിപ്പിക്കാനും സ്റ്റാർലിങ്ക് പദ്ധതിയിടുന്നതായി വൃത്തങ്ങൾ അറിയിച്ചു. ഇത് വ്യക്തികൾക്ക് ഭാരതി എയർടെൽ, വോഡാഫോൺ, റിലയൻസ് ജിയോ തുടങ്ങിയ നിലവിലുള്ള ISP-കളെ ഒഴിവാക്കി നേരിട്ട് ഇന്റർനെറ്റ് കണക്ഷൻ വാങ്ങാൻ അനുവദിക്കും.

ഇന്ത്യയിലെ ഏറ്റവും വലിയ ടെലികോം ഓപ്പറേറ്റർമാരും ഇന്റർനെറ്റ് സേവന ദാതാക്കളുമായ എയർടെലും ജിയോയും സ്റ്റാർലിങ്കിന്റെ സാറ്റലൈറ്റ് അധിഷ്ഠിത ഇന്റർനെറ്റ് വിൽക്കുന്നതിനായി ഇതിനകം ബിസിനസ്-ടു-ബിസിനസ് കരാറുകളിൽ ഒപ്പുവച്ചിട്ടുണ്ട്.

DTC മോഡൽ ഒരു പ്രീമിയം സേവനമായിരിക്കുമെന്നാണ് പ്രതീക്ഷിക്കുന്നത്. വ്യക്തിഗത സ്റ്റാർലിങ്ക് ഗ്രൗണ്ട് സ്റ്റേഷനുകൾക്ക് $250-നും $600-നും ഇടയിൽ (ഏകദേശം 20,000 രൂപ മുതൽ 50,000 രൂപ വരെ) വിലവരും.

ഈ മാസം ആദ്യം സർക്കാർ സ്റ്റാർലിങ്കിന് ലെറ്റർ ഓഫ് ഇൻ്റന്റ് നൽകിയിരുന്നു. 2022 മുതൽ ഇന്ത്യൻ വിപണിയിൽ പ്രവേശിക്കാൻ സ്റ്റാർലിങ്ക് ശ്രമിച്ചുവരികയാണ്. നേരത്തെ എയർടെലും ജിയോയും ഇതിനെ എതിർത്തിരുന്നു. എന്നാൽ കഴിഞ്ഞ ഒക്ടോബറിൽ സ്റ്റാർലിങ്കിന് ബാൻഡ്‌വിഡ്ത്ത് അനുവദിക്കാൻ സർക്കാർ തീരുമാനിക്കുകയായിരുന്നു.