ഇറാൻ പ്രസിഡന്റും വിദേശകാര്യ മന്ത്രിയും ജനങ്ങൾക്കിടയിൽ; യുദ്ധം അവസാനിപ്പിക്കാൻ സന്നദ്ധത അറിയിച്ച് ഭരണകൂടം

ടെഹ്‌റാൻ | ഇറാന്റെ ഉന്നത നേതാക്കളായ പ്രസിഡന്റ് മസൂദ് പെസെഷ്കിയാനും വിദേശകാര്യ മന്ത്രി അബ്ബാസ് അരാഗ്ചിയും രാജ്യത്തെ ഇസ്‌ലാമിക് റിപ്പബ്ലിക് ദിനാഘോഷങ്ങളുടെ ഭാഗമായി നടന്ന റാലിയിൽ പരസ്യമായി പ്രത്യക്ഷപ്പെട്ടു. സുരക്ഷാ ഉദ്യോഗസ്ഥരുടെ വലിയ അകമ്പടിയില്ലാതെ ജനങ്ങൾക്കിടയിലേക്ക് എത്തിയ ഇരുവരും സമരക്കാരുമായി സംവദിക്കുകയും സെൽഫികൾ എടുക്കുകയും ചെയ്തു. അമേരിക്കൻ ഇസ്റാഈൽ ആക്രമണങ്ങളുടെ ഭീഷണി നിലനിൽക്കെയാണ് ഈ അപ്രതീക്ഷിത നീക്കം.

അമേരിക്കയും ഇസ്രായേലും ചേർന്ന് നടത്തിയ ആക്രമണത്തിൽ ഇറാന്റെ സുരക്ഷാ മേധാവി അലി ലാരിജാനി കൊല്ലപ്പെടുന്നതിന് തൊട്ടുമുമ്പാണ് ഇതിനു മുൻപ് ഇറാൻ നേതാക്കൾ ഇത്തരത്തിൽ പരസ്യമായി പ്രത്യക്ഷപ്പെട്ടത്. ഇസ്റാഈൽ തങ്ങളെ ലക്ഷ്യമിടുന്നുണ്ടെങ്കിലും ജനങ്ങൾക്കൊപ്പം നിൽക്കുന്നത് ഊർജ്ജം നൽകുന്നുവെന്ന് വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി.

യുദ്ധം അവസാനിപ്പിക്കാനുള്ള ഇറാന്റെ നിലപാട് പ്രസിഡന്റ് പെസെഷ്കിയാൻ യൂറോപ്യൻ കൗൺസിൽ മേധാവിയെ അറിയിച്ചിട്ടുണ്ട്. ഇനിയും ആക്രമണങ്ങൾ ഉണ്ടാകില്ലെന്ന കൃത്യമായ ഗ്യാരണ്ടി ലഭിച്ചാൽ യുദ്ധം അവസാനിപ്പിക്കാൻ സന്നദ്ധമാണെന്നാണ് ഇറാന്റെ പക്ഷം. ഗസ്സയിൽ ഇസ്റാഈൽ നടത്തുന്ന ആക്രമണങ്ങൾ അവസാനിപ്പിക്കണമെന്ന ആവശ്യവും ഇതിനോടകം ഉയർന്നിട്ടുണ്ട്.

🇮🇷 Iranian President Masoud Pezeshkian and Foreign Minister Abbas Araghchi tonight in the streets of Tehran in support of People. pic.twitter.com/J2blHijWzm

— The Daily News (@DailyNewsJustIn) March 31, 2026

അമേരിക്കൻ പ്രതിനിധി സ്റ്റീവ് വിറ്റ്‌കോഫുമായി നേരിട്ട് സന്ദേശങ്ങൾ കൈമാറുന്നുണ്ടെങ്കിലും വിശ്വാസ്യത പൂജ്യം ശതമാനമാണെന്നും ചർച്ചകൾ കൊണ്ട് ഫലമുണ്ടാകുമെന്ന് കരുതുന്നില്ലെന്നും അരാഗ്ചി പറഞ്ഞു. ഒരു കരയുദ്ധത്തിന് അമേരിക്ക മുതിരുകയാണെങ്കിൽ നേരിടാൻ സജ്ജമാണെന്നും ഇറാൻ മുന്നറിയിപ്പ് നൽകി.

കൂടാതെ, ഇറാന്റെ ഉന്നത നേതാക്കളെ ഇനിയും വധിക്കാൻ ശ്രമിച്ചാൽ ഗൂഗിൾ, ആപ്പിൾ തുടങ്ങിയ പ്രമുഖ അമേരിക്കൻ ടെക് കമ്പനികൾക്കെതിരെ തിരിച്ചടി നൽകുമെന്ന് ഇസ്‌ലാമിക് റെവല്യൂഷണറി ഗാർഡ് കോർപ്സ് (ഐ ആർ ജി സി) ഭീഷണിപ്പെടുത്തിയിട്ടുണ്ട്.

Summary

Iranian President Masoud Pezeshkian and Foreign Minister Abbas Araghchi appeared publicly in Tehran during a rally, demonstrating national unity despite assassination threats. The President expressed a willingness to end the ongoing conflict provided that international guarantees are established to prevent future aggressions. Meanwhile, Iranian officials confirmed direct message exchanges with the US but emphasized a total lack of trust in diplomatic negotiations.