വസ്ത്രത്തിന്റെ പരിണാമം

മനുഷ്യചരിത്രത്തിന്റെ ഏടുകൾ മറിച്ചുനോക്കുമ്പോൾ, നാഗരികതയുടെ വളർച്ചക്കൊപ്പം സഞ്ചരിച്ച വിസ്മയമാണ് വസ്ത്രം. ഇന്ന് നാം കാണുന്ന വർണാഭമായ വസ്ത്രങ്ങളിലേക്ക് മനുഷ്യൻ എത്തിയത് ഒറ്റദിവസംകൊണ്ടല്ല. മറിച്ച് ലക്ഷക്കണക്കിന് വർഷങ്ങളുടെ അധ്വാനവും ബുദ്ധിയും കണ്ടുപിടിത്തങ്ങളും അതിന് പിന്നിലുണ്ട്. ആദിമ മനുഷ്യൻ കൊടുംതണുപ്പിൽ നിന്നും വെയിലിൽ നിന്നും രക്ഷനേടാൻ മരത്തോലുകളും മൃഗചർമങ്ങളും ശരീരത്തിൽ ചുറ്റിയ ഇടത്തുനിന്നാണ് വസ്ത്രത്തിന്റെ കഥ ആരംഭിക്കുന്നത്. പിന്നീട് കരകൗശലത്തിന്റെയും ശാസ്ത്രത്തിന്റെയും ചിറകിലേറി അത് വളർന്നു. ഇന്നത് കേവലം ശരീരം മറയ്ക്കാനുള്ള ഉപാധി മാത്രമല്ല, മറിച്ച്, ഓരോ വ്യക്തിയുടെയും സംസ്കാരത്തെയും ചിന്തകളെയും ആത്മവിശ്വാസത്തെയും ലോകത്തിന് മുന്നിൽ അടയാളപ്പെടുത്തുന്ന കലാരൂപം കൂടിയാണ്. മരത്തോലിൽ തുടങ്ങി, പരുത്തിയിലും പട്ടിലും വിരിഞ്ഞ്, അത്യാധുനിക സ്മാർട്ട് വസ്ത്രങ്ങളിൽ എത്തിനിൽക്കുന്ന ആ യാത്ര വളരെ കൗതുകകരമാണ്. നൂറ്റാണ്ടുകളിലൂടെ വസ്ത്രം സഞ്ചരിച്ച വിസ്മയകരമായ നാൾവഴികളാവട്ടെ ഇന്നത്തെ പഠനം.

ആദിമകാലം മുതൽ ആധുനികത വരെ

മനുഷ്യന്റെ പ്രാഥമിക ആവശ്യങ്ങളിൽ ഒന്നാണ് വസ്ത്രം. ലക്ഷക്കണക്കിന് വർഷങ്ങൾ നീണ്ട മനുഷ്യപരിണാമത്തോടൊപ്പം വസ്ത്രധാരണ രീതിയും വലിയ മാറ്റങ്ങൾക്ക് വിധേയമായിട്ടുണ്ട്. ചരിത്രാതീത കാലത്ത് ജീവിച്ചിരുന്ന മനുഷ്യർ മൃഗങ്ങളുടെ തൊലി, ഇലകൾ, മരത്തോലുകൾ എന്നിവയാണ് ശരീരം മറയ്ക്കാൻ ഉപയോഗിച്ചിരുന്നത്. പിന്നീട് ഏകദേശം 30,000 വർഷങ്ങൾക്ക് മുന്പ് മൃഗങ്ങളുടെ എല്ലുകൾ ഉപയോഗിച്ച് സൂചികൾ നിർമിക്കാൻ മനുഷ്യൻ പഠിച്ചു. മൃഗചർമങ്ങൾ കൂട്ടിച്ചേർത്ത് തുന്നി വസ്ത്രങ്ങളാക്കാൻ ഇത് അവരെ സഹായിച്ചു.

നൂൽ

മനുഷ്യൻ സ്ഥിരതാമസം തുടങ്ങുകയും കൃഷി ചെയ്യാൻ ആരംഭിക്കുകയും ചെയ്തതോടെയാണ് വസ്ത്രനിർമാണത്തിൽ വലിയ വിപ്ലവം ഉണ്ടായത്.

ചെടികളിൽ നിന്നുള്ള നാരുകൾ (പരുത്തി, ചണം), മൃഗങ്ങളുടെ രോമം (കമ്പിളി) എന്നിവ ഉപയോഗിച്ച് നൂലുകൾ ഉണ്ടാക്കാൻ മനുഷ്യൻ പഠിച്ചു. ലളിതമായ തറികൾ ഉപയോഗിച്ച് തുണി നെയ്യാൻ തുടങ്ങിയത് ഈ കാലഘട്ടത്തിലാണ്. നൈൽ നദിക്കരയിലെ ഈജിപ്തുകാർ ലിനൻ തുണികളാണ് പ്രധാനമായും ഉപയോഗിച്ചിരുന്നത്. കനം കുറഞ്ഞതും വെളുത്തതുമായ വസ്ത്രങ്ങളായിരുന്നു ഇവരുടെ പ്രത്യേകത.

പരുത്തി

ഇന്ത്യയിൽ സിന്ധൂനദീതട സംസ്കാരത്തിന്റെ കാലത്തുതന്നെ പരുത്തി വസ്ത്രങ്ങൾ വ്യാപകമായി ഉപയോഗിച്ചിരുന്നു. ഇന്ത്യയിലെ പരുത്തി വസ്ത്രങ്ങൾ ലോകപ്രശസ്തമായിരുന്നു.

പട്ട്

ബി സി 3000ത്തോടെ ചൈനക്കാർ പട്ടുനൂൽ പുഴുക്കളിൽ നിന്ന് പട്ട് നിർമിക്കാൻ പഠിച്ചു. നൂറ്റാണ്ടുകളോളം ചൈനക്കാർ ഇത് ഒരു രഹസ്യമായി സൂക്ഷിച്ചു. സിൽക്ക് റൂട്ട് വഴി ഇത് പിന്നീട് ലോകമെങ്ങും എത്തി.

മധ്യകാലഘട്ടം

മധ്യകാലഘട്ടത്തിൽ വസ്ത്രങ്ങൾ കേവലം ഒരു സംരക്ഷണം എന്നതിലുപരി സമൂഹത്തിലെ പദവി കാണിക്കാനുള്ള മാർഗമായി മാറി. രാജാക്കന്മാരും പ്രഭുക്കന്മാരും വിലകൂടിയ പട്ട്, വെൽവെറ്റ് വസ്ത്രങ്ങൾ ധരിച്ചപ്പോൾ സാധാരണക്കാർ പരുത്തിയും കമ്പിളിയും ഉപയോഗിച്ചു. വസ്ത്രങ്ങളിൽ പലതരത്തിലുള്ള നിറങ്ങളും എംബ്രോയ്ഡറി ജോലികളും ഈ കാലഘട്ടത്തിൽ വ്യാപകമായി.

വ്യാവസായിക വിപ്ലവവും വസ്ത്രനിർമാണവും

വ്യാവസായിക വിപ്ലവത്തോടെ വസ്ത്രനിർമാണം പൂർണമായും മാറിമറിഞ്ഞു. സ്പിന്നിംഗ് ജെന്നി, പവർ ലൂം തുടങ്ങിയ യന്ത്രങ്ങളുടെ കണ്ടുപിടിത്തം തുണി ഉത്പാദനം വർധിപ്പിച്ചു.

19ാം നൂറ്റാണ്ടിൽ തയ്യൽ മെഷീൻ കണ്ടുപിടിച്ചതോടെ വസ്ത്രങ്ങൾ വൻതോതിൽ തുന്നി ഉണ്ടാക്കാൻ സാധിച്ചു. ഇതോടെ വസ്ത്രങ്ങളുടെ വില കുറയുകയും സാധാരണക്കാർക്ക് എളുപ്പത്തിൽ ലഭ്യമാകുകയും ചെയ്തു. ഇരുപതാം നൂറ്റാണ്ടിന്റെ തുടക്കത്തിൽ നൈലോൺ, പോളിസ്റ്റർ, റയോൺ തുടങ്ങിയ കൃത്രിമ നാരുകൾ ശാസ്ത്രജ്ഞർ വികസിപ്പിച്ചെടുത്തു. ഇവക്ക് ഈടുനിൽപ്പ് കൂടുതലായിരുന്നു, കൂടാതെ അലക്കി ഉപയോഗിക്കാൻ എളുപ്പവുമായിരുന്നു. പിന്നീട് അളവുകൾക്കനുസരിച്ച് വസ്ത്രങ്ങൾ കടകളിൽ നിന്ന് നേരിട്ട് വാങ്ങുന്ന റെഡിമെയ്ഡ് സംസ്കാരം ലോകമെമ്പാടും പടർന്നു.

ആധുനിക കാലം

ഇന്ന് വിപണിയിൽ ദിവസേന പുതിയ ഡിസൈനുകൾ വരുന്നു. സാങ്കേതികവിദ്യയുടെ വളർച്ച വസ്ത്രധാരണത്തെ ആഗോളതലത്തിൽ ഒന്നാക്കി മാറ്റി. സാങ്കേതികവിദ്യയുടെ സഹായത്തോടെ ശരീര താപനില ക്രമീകരിക്കുന്നതും ഹൃദയമിടിപ്പ് അളക്കുന്നതുമായ ആധുനിക വസ്ത്രങ്ങൾ വരെ ഇന്ന് ലഭ്യമാണ്.

വസ്ത്രനിർമാണം പരിസ്ഥിതിക്ക് ദോഷം വരുത്തുന്നു എന്ന തിരിച്ചറിവിലേക്ക് ആളുകൾ എത്തുകയും പ്രകൃതിദത്തവും പുനരുപയോഗിക്കാൻ കഴിയുന്നതുമായ വസ്ത്രങ്ങളിലേക്ക് ഇന്ന് മനുഷ്യൻ വീണ്ടും തിരിയുകയും ചെയ്യുന്നുണ്ട്.