ഫസല്‍ വധം: സി ബി ഐ തുടരന്വേഷണ റിപ്പോര്‍ട്ട് തെറ്റ്- കാരായി രാജന്‍

കോഴിക്കോട് | തലശ്ശേരി ഫസല്‍ വധക്കേസില്‍ സി ബി ഐ കോടതിയില്‍ സമര്‍പ്പിച്ച തുടരന്വേഷണ റിപ്പോര്‍ട്ട് തെറ്റാണെന്ന് കേസില്‍ ആരോപണ വിധേയനായ സി പി എം നേതാവ് കാരായി രാജന്‍. ഫസലിനെ തങ്ങള്‍ കൊന്നതാണെന്ന് ആര്‍ എസ് എസ് പ്രവര്‍ത്തകനായ മാഹി ചെമ്പ്ര സ്വദേശി സുബീഷിന്റെ (കുപ്പി സൂബീഷ്) മൊഴിയുണ്ട്. സുബീഷിനെ സമ്മര്‍ദം ചെലുത്തി പോലീസ് പറയിപ്പിച്ചതെന്നാണ് സി ബി ഐ പറയുന്നത്. എന്നാല്‍ ആരാണ് സുബീഷില്‍ സമ്മര്‍ദം ചെലുത്തിയത്. പോലീസിനോട് വെളിപ്പെടുത്തന്നതിന് മുമ്പേ സുബീഷ് സുഹൃത്തിനോടും ഇക്കാര്യം പറഞ്ഞിരുന്നു. സുബീഷിന്റെ ശബ്ദസന്ദേശത്തില്‍ എന്തുകൊണ്ട് ശാസ്ത്രീയ അന്വേഷണം നടത്തുന്നില്ലെന്നും കാരായി രാജന്‍ ചോദിച്ചു.

ജാമ്യവ്യവസ്ഥയില്‍ ഇളവ് ലഭിച്ച സാഹചര്യത്തില്‍ കണ്ണൂരിലേക്ക് പോകുന്നതിനിടെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. കേസില്‍ തന്റെ നിരപരാധിത്വം തെളിയിക്കാന്‍ ഏതറ്റംവരെയും പോകുമെന്നും സത്യം വിജയിക്കുമെന്നും കാരായി കൂട്ടിച്ചേര്‍ത്തു. സി പി എം കണ്ണൂര്‍ ജില്ലാ സെക്രട്ടേറിയേറ്റംഗമായ കാരായി രാജനും തലശ്ശേരി ഏരിയാ കമ്മിറ്റിയംഗമായ കാരായി ചന്ദ്രശേഖരനും ഒമ്പതുവര്‍ഷത്തിന് ശേഷമാണ് കണ്ണൂരിലെത്തുന്നത്. ഇരുവര്‍ക്കും വലിയ സ്വീകരണം സി പി എം ഒരുക്കിയിട്ടുണ്ട്.

ഫസല്‍ വധത്തിന് പിന്നില്‍ ആര്‍ എസ് എസിന് പങ്കില്ലെന്ന് കാണിച്ച് സി ബി ഐ ഇന്നലെയാണ് കൊച്ചിയിലെ പ്രത്യേക സി ബി ഐ കോടതിയില്‍ തുടരന്വേഷണ റിപ്പോര്‍ട്ട്് സമര്‍പ്പിച്ചത്. കൊലക്ക് പിന്നില്‍ താനുള്‍പ്പെട്ട ആര്‍ എസ് എസ് പ്രവര്‍ത്തകരാണെന്ന മാഹി ചെമ്പ്ര സ്വദേശി സുബീഷിന്റെ (കുപ്പി സൂബീഷ്) വെളിപ്പെടുത്തല്‍ കുറ്റപത്രം തള്ളുന്നു. ഇത് പോലീസ് കസ്റ്റഡിയില്‍ പറയിപ്പിച്ചതാണെന്നാണ് കണ്ടെത്തല്‍. കൊടി സുനിയുടെ നേതൃത്വത്തിലുള്ള സംഘമാണ് ഫസലിനെ കൊന്നതെന്നും സി ബി ഐ തുടരന്വേഷണ റിപ്പോര്‍ട്ട് പറയുന്നു. കേസിന്റെ ഗൂഢാലോചന്ക്ക് പിന്നില്‍ സി പി എം നേതാക്കളായ കാരായി രാജനും കാരായി ചന്ദ്രശേഖരവും ഉള്‍പ്പെടെയുള്ളവരാണെന്നും തുടരന്വേഷണ റിപ്പോര്‍ട്ടില്‍ വ്യക്തമാക്കുന്നു.

സി പി എം പ്രാദേശിക നേതാവ് പടുവിലായി മോഹനന്‍ വധക്കേസില്‍ ചോദ്യം ചെയ്യവെയാണ് സുബീഷ് ഫസല്‍ വധക്കേസുമായി ബന്ധപ്പെട്ട് നിര്‍ണായക വെളിപ്പെടുത്തല്‍ നടത്തിയത്. ഇരിങ്ങാലക്കുട സ്വദേശിയായ ഒരു പ്രാചാരക്, തലശ്ശേരി ഡയമണ്ട് മുക്കിലെ ആര്‍ എസ് എസ് നേതാക്കളായ ശശി, മനോജ് എന്നിവരും താനുമുള്‍പ്പെട്ട സംഘമാണ് ഫസല്‍ വധത്തിന് പിന്നിലെന്നായിരുന്നു സുബീഷിന്റെ മൊഴി.

2006 ഒക്ടോബര്‍ 22ന് തലശ്ശേരി സെയ്ദാര്‍ പള്ളിക്കു സമീപം വച്ചായിരുന്നു പത്രവിതരണക്കാരനായ ഫസല്‍ കൊല്ലപ്പെട്ടത്. ഗോപാലപേട്ട സി പി എം ബ്രാഞ്ച് അംഗവും പാര്‍ട്ടി നിയന്ത്രണത്തിലുള്ള അച്യുതന്‍ സ്മാരക വായനശാലയുടെ സെക്രട്ടറിയുമായിരുന്ന ഫസല്‍ പിന്നീട് എന്‍ ഡി എഫില്‍ ചേര്‍ന്നതിലുള്ള രാഷ്ട്രീയവിരോധമാണു കൊലക്ക് കാരണമെന്നായിരുന്നു കണ്ടെത്തല്‍.