മദ്യപിച്ച ബൈക്ക് യാത്രികനെ കസ്റ്റഡിയിലെടുത്തില്ല; മൂന്ന് പോലീസ് ഉദ്യോഗസ്ഥര്‍ക്ക് സസ്‌പെന്‍ഷന്‍

തൃശ്ശൂര്‍ |  മദ്യപിച്ച ബൈക്ക് യാത്രികനെ കസ്റ്റഡിയിലെടുക്കാത്ത സംഭവത്തില്‍ തൃശ്ശൂര്‍ ഈസ്റ്റ് സ്റ്റേഷനിലെ രണ്ട് എസ് ഐ മാര്‍ക്കും ഒരു പോലീസുകാരനും സസ്‌പെന്‍ഷന്‍. എസ് ഐമാരായ അഫ്‌സല്‍, പ്രദീപ് സി പി ഒ ജോസ്‌പോള്‍ എന്നിവര്‍ക്കെതിരെയാണ് നടപടി.കമ്മിഷണറുടെ റിപ്പോര്‍ട്ടിന്റെ അടിസ്ഥാനത്തിലാണ് സസ്‌പെന്‍ഷന്‍.

രണ്ടാഴ്ച മുന്‍പാണ് സംഭവം നടന്നത്. തൃശ്ശൂര്‍ ശക്തന്‍ നഗറിലെ ബാറിനു സമീപത്ത് മദ്യപിച്ചെത്തിയ മുളംകുന്നത്ത് കാവ് സ്വദേശിയായ യുവാവിനെതിരെ കേസെടുക്കാതെ പോലീസ് ബൈക്ക് മാത്രം പിടിച്ചെടുത്ത് വിട്ടയക്കുകയായിരുന്നു. ഇയാളെ കസ്റ്റഡിയില്‍ എടുക്കാനോ രക്തം പരിശോധിക്കാനോ നടപടിയെടുക്കാനോ പോലീസ് തയ്യാറായില്ല. തുടര്‍ന്ന് യുവാവ് പിറ്റേദിവസം ബൈക്ക് വാങ്ങാനായി സ്റ്റേഷനില്‍ എത്തിയപ്പോഴാണ് കേസടുത്തത്. കേസെടുക്കാന്‍ വൈകിയതിനെ തുടര്‍ന്നാണ് സസ്‌പെന്‍ഷന്‍ നടപടി.

അതിനിടെ തന്റെ മൊബൈല്‍ഫോണും പേഴ്‌സും കാണാതായത് യുവാവ് പരാതിപ്പെട്ടിരുന്നു. ഈ പരാതിയിന്മേല്‍ നടത്തിയ അന്വേഷണത്തില്‍ ബാറില്‍ വെച്ച് പേഴ്‌സും മൊബൈലും മറ്റൊരാളാണ്എടുത്തതെന്ന് പോലീസ് കണ്ടെത്തി. തുടര്‍ന്ന് അയാള്‍ക്കെതിരെ കേസെടുക്കുകയും ചെയ്തിരുന്നു.