ഡ്രാഗൺ ഫ്രൂട്ട് എന്ന മാന്ത്രിക പഴം

നമ്മുടെ നാട്ടിൽ അടുത്തായി സുലഭമായി ലഭിക്കുന്ന പഴമാണ് ഡ്രാഗൺ ഫ്രൂട്ട്. കേരളത്തിൽ ഇപ്പോൾ ഇത് വ്യാപകമായി കൃഷി ചെയ്യാനും ആരംഭിച്ചിട്ടുണ്ട്. ഗുണങ്ങളുടെ കാര്യത്തിൽ ഒരു മാന്ത്രിക പഴം തന്നെയാണ് ഇത്. എന്തൊക്കെയാണ് ഡ്രാഗൺ ഫ്രൂട്ടിന്റെ ഗുണങ്ങൾ എന്ന് നോക്കാം.

മൃദുവും സൂക്ഷ്മവുമായ കാമ്പുള്ളതും മധുര രുചിയുള്ളതുമായ ഡ്രാഗൺ ഫ്രൂട്ട് പലപ്പോഴും കിവിക്കും പിയറിനും ഇടയിലുള്ള ഒരു സങ്കരമായാണ് വിശേഷിപ്പിക്കപ്പെടുന്നത്. ഇത് കാഴ്ചയിൽ സുന്ദരി മാത്രമല്ല , പോഷകങ്ങളാൽ നിറഞ്ഞതുമാണ്. വിറ്റാമിനുകൾ, ധാതുക്കൾ, ആൻ്റിഓക്‌സിഡൻ്റുകൾ, നാരുകൾ എന്നിവയുടെ നല്ല ഉറവിടമാണ് ഡ്രാഗൺ ഫ്രൂട്ടുകൾ. സലാഡുകളിലും ഡെസേർട്ടുകളിലും സ്മൂത്തികളിലും എല്ലാം ചേർക്കാൻ വ്യാപകമായി ഇത് ഉപയോഗിക്കുന്നുണ്ട്.

ഡ്രാഗൺ ഫ്രൂട്ടിൽ അടങ്ങിയിരിക്കുന്ന ജീവകങ്ങളും ധാതുക്കളും ധാരാളമാണ്. അവയിൽ കാര്യമായ അളവിൽ വിറ്റാമിനുകൾ ബി 1, ബി 2, ബി 3, ഇരുമ്പ്, കാൽസ്യം, ഫോസ്ഫറസ് എന്നിവയും വിറ്റാമിൻ സിയും ഉണ്ട്. ഇത് രോഗപ്രതിരോധ സംവിധാനത്തെ ശക്തിപ്പെടുത്തുന്നു. മൊത്തത്തിലുള്ള ആരോഗ്യത്തിന് ആവശ്യമായ ഈ പോഷകങ്ങൾ നൽകുന്നതിലൂടെ മികച്ച ആരോഗ്യ ഗുണങ്ങളും ഇത് നൽകുന്നുണ്ട്.

ഡ്രാഗൺ ഫ്രൂട്ടിൻ്റെ പിങ്ക് അല്ലെങ്കിൽ വെളുത്ത പഴം ആൻ്റിഓക്‌സിഡൻ്റുകളുടെ നല്ല ഉറവിടമാണ്. ഓക്‌സിഡേറ്റീവ് സ്ട്രെസ് കുറയുകയും ക്യാൻസർ, ഹൃദ്രോഗം തുടങ്ങിയ വിട്ടുമാറാത്ത രോഗങ്ങളുടെ സാധ്യത കുറയുകയും ചെയ്യുന്നതിനാൽ, ഫ്രീ റാഡിക്കലുകൾക്കെതിരായ ശരീരത്തിൻ്റെ പോരാട്ടത്തിൽ ആൻ്റിഓക്‌സിഡൻ്റുകൾ സഹായിക്കുന്നു.

ഡ്രാഗൺ ഫ്രൂട്ട്സ് നാരുകളുടെ മികച്ച ഉറവിടമാണ്. ഇത് നിങ്ങളുടെ ദഹന വ്യവസ്ഥയെ മികച്ചതാക്കുന്നു. അതുകൊണ്ടുതന്നെ മലബന്ധം അസിഡിറ്റി ഉൾപ്പെടെ ദഹനവുമായി ബന്ധപ്പെട്ട പ്രശ്നങ്ങളെ ഒരു പരിധിവരെ ചെറുക്കാനും ആകും.

ഡ്രാഗൺ ഫ്രൂട്ട് മികച്ച പ്രീബയോട്ടിക്കാണ്. കുടലിലെ ആരോഗ്യകരമായ ബാക്ടീരിയകള്‍ക്ക് ഭക്ഷണമാകുന്ന ഒന്ന്. ഇതിനാല്‍ തന്നെ ഇത് കുടല്‍ ആരോഗ്യത്തിന് മികച്ചതാണ്. നാരുകളാല്‍ സമ്പുഷ്ടമായതിനാല്‍ ദഹന പ്രക്രിയ ശക്തിപ്പെടുത്താനും മലബന്ധം മാറാനുമെല്ലാം ഏറെ നല്ലതാണ്.

ഇത് കൂടാതെ ഹൃദയത്തെ സംരക്ഷിക്കാനും ചർമ്മത്തിന് മികച്ച പോഷണം നൽകാനും ഒക്കെ ഡ്രാഗൺ ഫ്രൂട്ട് സഹായിക്കും. പിന്നെ വില അല്പം കൂടുതലാണെങ്കിലും നേരത്തെ പറഞ്ഞപോലെ ആരോഗ്യ ഗുണങ്ങൾ ഏറെയുണ്ടെങ്കിൽ കൂടെ കൂട്ടാമല്ലോ ഡ്രാഗൺ ഫ്രൂട്ടിനെയും.