കുട്ടികളിലെ പൊണ്ണത്തടി പരിഹാരമുണ്ട്

കഴിഞ്ഞ കുറച്ച് വർഷങ്ങളായി കുട്ടികളിലെ അമിതഭാരം ശാരീരികവും മാനസികവുമായ ആരോഗ്യത്തിൽ കാര്യമായ സ്വാധീനം ചെലുത്തുന്നതായി കാണപ്പെടുന്നു. അമിതവണ്ണവും പൊണ്ണത്തടിയും ഉള്ള കുട്ടികൾ പ്രായപൂർത്തിയായതിനു ശേഷവും പൊണ്ണത്തടിയുള്ളവരായി തുടരാനുള്ള സാധ്യതയുണ്ട്. കുട്ടികൾ കഴിക്കുന്ന, കൂടുതൽ കലോറിയും കൊഴുപ്പുമുള്ള ഭക്ഷണത്തിന്റെഅമിത ഉപയോഗമാണ് ഇതിന്റെ പ്രധാന കാരണങ്ങളിലൊന്ന്. പ്രമേഹം, ഹൃദയ സംബന്ധമായ അസുഖങ്ങൾ തുടങ്ങിയ വിവിധ ജീവിതശൈലി രോഗങ്ങൾക്കും അമിതവണ്ണം കാരണമാകും. കുട്ടികൾ നല്ല രീതിയിൽ ഭക്ഷണം കഴിക്കാനും ആരോഗ്യകരമായ ജീവിതശൈലി പിന്തുടരാനും പഠിക്കേണ്ടത് വളരെ പ്രധാനമാണ്. അത് കുടുംബത്തിൽ നിന്ന് തന്നെ നന്നായി പഠിപ്പിക്കുകയും വേണം. ചെറുപ്പത്തിൽ കുട്ടികളിൽ കാണപ്പെടുന്ന പൊണ്ണത്തടി അവരുടെ ശാരീരികവും സാമൂഹികവും വൈകാരികമായ വളർച്ചയെയും ആത്മാഭിമാനത്തെയും പ്രതികുലമായി ബാധിക്കും.

കുട്ടികളിലെ പൊണ്ണത്തടിയുടെ പ്രധാന കാരണങ്ങൾ
1) അനാരോഗ്യകരമായ ഭക്ഷണ ക്രമം: ഫാസ്റ്റ് ഫുഡ്, മധുരവും കൊഴുപ്പും കൂടുതൽ അടങ്ങിയ ഭക്ഷണങ്ങൾ, മധുരമുള്ള പാനീയങ്ങൾ തുടങ്ങിയ ഉയർന്ന കലോറിയും കുറഞ്ഞ പോഷകങ്ങളും ഉള്ള ഭക്ഷണങ്ങൾ കഴിക്കുന്നത്.

2) വ്യായാമത്തിന്റെ അഭാവം: അമിതമായ സ്‌ക്രീൻ സമയം (ടി വി, കമ്പ്യൂട്ടറുകൾ, വീഡിയോ ഗെയിമുകൾ), വ്യായാമത്തിന്റെ അഭാവം തുടങ്ങിയവ ശരീരഭാരം വർധിപ്പിക്കുന്നതിന് കാരണമാകുന്നു.

3) ജനിതകമായ കാരണങ്ങൾ: ഒരു കുട്ടിയുടെ അച്ഛനോ/ അമ്മയോ, അല്ലെങ്കിൽ കുടുംബ ചരിത്രമോ അമിതവണ്ണമുള്ളവരോ പൊണ്ണത്തടിയുള്ളവരോ ആണെങ്കിൽ കുട്ടിക്കും അമിതവണ്ണമുണ്ടാകാനുള്ള സാധ്യത കൂടുതലാണ്.

4) പാരിസ്ഥിതിക ഘടകങ്ങൾ: ആരോഗ്യകരമായ ഭക്ഷണം കഴിക്കാതിരിക്കുക, ഔട്ട്‌ഡോർകളിയെ നിരുത്സാഹപ്പെടുത്തുന്ന സുരക്ഷിതമല്ലാത്ത അയൽപക്കങ്ങൾ, പാർക്കുകളുടെയോ വിനോദസൗകര്യങ്ങളുടെയോ അഭാവം മുതലായവ ശരീരഭാരം വർധിപ്പിക്കുന്നതിന് കാരണമാകും.

5) വൈകാരികമായ ഘടകങ്ങൾ: കുടുംബകലഹങ്ങൾ അല്ലെങ്കിൽ ഭീഷണിപ്പെടുത്തൽ പോലെയുള്ള വൈകാരിക സമ്മർദം, അമിതമായി ഭക്ഷണം കഴിക്കുന്നതിലേക്ക്‌ നയിച്ചേക്കാം.

6) മാതാപിതാക്കളുടെ സ്വാധീനം: മാതാപിതാക്കളുടെ ഭക്ഷണശീലങ്ങൾ, ഭക്ഷണത്തോടുള്ള മനോഭാവം, ശാരീരിക പ്രവർത്തനങ്ങളുടെ അളവ് എന്നിവ കുട്ടിയുടെ പെരുമാറ്റത്തെയുംഭാരത്തെയും സാരമായി ബാധിക്കും.

7) വിവിധ തരത്തിലുള്ള രോഗാവസ്ഥകൾ: ചില രോഗാവസ്ഥകളും സ്റ്റിറോയിഡുകൾ പോലുള്ള മരുന്നുകളുടെ ഉപയോഗവും കുട്ടികളിൽ ഹോർമോൺ വ്യതിയാനങ്ങൾ ഉണ്ടാക്കുകയും അമിതഭാരത്തിന് കാരണമാവുകയും ചെയ്യും.

8)സാംസ്‌കാരിക ഘടകങ്ങൾ: ഭക്ഷണ തിരഞ്ഞെടുപ്പുകൾക്കും അളവുകൾക്കും ചുറ്റുമുള്ള സാംസ്‌കാരിക മാനദണ്ഡങ്ങൾ ഭക്ഷണശീലങ്ങളെയും ശരീരഭാരത്തിന്റെ നിലയെയുംസ്വാധീനിക്കും.

9) വിപണനവും പരസ്യവും: കുട്ടികളെ ലക്ഷ്യമിട്ടുള്ള അനാരോഗ്യകരമായ ഭക്ഷണപാനീയവും പരസ്യവും വിപണനവും അവരുടെ ഭക്ഷണരീതികളെ സ്വാധീനിക്കും.
മുകളിൽ പറഞ്ഞതിൽ നിന്ന് ഏതും പൊണ്ണത്തടിക്ക് കാരണമാകാം. അതിനാൽ ശരിയായ പ്രശ്‌നം കണ്ടെത്തി ഉചിതമായ പരിഹാരം ചെയ്യുന്നത് അമിതവണ്ണത്തെ കുറയ്ക്കാൻ സഹായിക്കും.

ഈ പ്രശ്‌നങ്ങൾ നമുക്ക് എങ്ങനെ പരിഹരിക്കാനാകും?
1) വിദ്യാഭ്യാസവും അവബോധവും: ആരോഗ്യകരമായ ഭക്ഷണക്രമത്തിന്റെയും ചിട്ടയായ വ്യായാമരീതിയുടെയും പ്രാധാന്യത്തെ കുറിച്ച് രക്ഷിതാക്കൾ, പരിചരണം നൽകുന്നവർ, കുട്ടികൾ എന്നിവർക്കിടയിൽ അവബോധം വളർത്തുക.

2) ആരോഗ്യകരമായ ഭക്ഷണം പ്രോത്സാഹിപ്പിക്കുക: പഴങ്ങൾ, പച്ചക്കറികൾ, തവിടോട് കൂടിയ ധാന്യങ്ങൾ, പ്രോട്ടീനുകൾ, കൊഴുപ്പ് കുറഞ്ഞ പാലുത്പന്നങ്ങൾ എന്നിവയുടെ ഉപയോഗം പ്രോത്സാഹിപ്പിക്കുക.

3) വ്യായാമം വർധിപ്പിക്കുക: ഫുട്‌ബോൾ, നീന്തൽ, സൈക്ലിംഗ്, ഓടിച്ചാടി കളിക്കുക എന്നിവയിലൂടെ കുട്ടികൾക്ക് വ്യായാമങ്ങളിൽ ഏർപ്പെടാനുള്ള അവസരങ്ങൾ നൽകുക.

4) ആരോഗ്യകരമായ ഭക്ഷണങ്ങളിലേക്കുള്ള പ്രവേശനം മെച്ചപ്പെടുത്തുക: കർഷകരുടെ വിപണികൾ, കമ്മ്യൂണിറ്റി ഗാർഡനുകൾ, പലചരക്ക് കട എന്നിവ പോലുള്ള സംരംഭങ്ങളിലൂടെ പോഷകസമൃദ്ധമായ ഭക്ഷണത്തിലേക്കുള്ള ആകർഷണം വർധിപ്പിക്കുക.

5) കുടുംബങ്ങളെ ഉൾപ്പെടുത്തുക: ഭക്ഷണം ആസൂത്രണം ചെയ്യുക, ഒരുമിച്ച് പാചകം ചെയ്യുക, സ്‌ക്രീൻ സമയത്തിന് പരിധി നിശ്ചയിക്കൽ എന്നിവയുൾപ്പെടെ വീട്ടിൽ ആരോഗ്യകരമായ പെരുമാറ്റങ്ങൾ പ്രോത്സാഹിപ്പിക്കുന്നതിനുള്ള ശ്രമങ്ങളിൽ മാതാപിതാക്കളെയും പരിചരിക്കുന്നവരെയും ഉൾപ്പെടുത്തുക.

• ആരോഗ്യകരമായ ലഘുഭക്ഷണങ്ങൾ
• റാഗി ലഡു
• മുളപ്പിച്ച സാലഡ്
• മുട്ട സാൻഡ്്വിച്ച്
• പാൻകേക്ക്
• മുട്ട/ചിക്കൻ റോൾ
• ഫ്രഞ്ച് ടോസ്റ്റ്
• മില്ലറ്റ് കുക്കി
• കട്ട്ഫ്രൂട്ട്‌സ്
• ഫ്രഷ്ജ്യൂസുകൾ, കരിക്കിൻ വെള്ളം
• പച്ചക്കറി സാലഡ്
• കപ്പലണ്ടി മിഠായി, എള്ള് മിഠായി