പതിമൂന്നുകാരിയെ ലൈംഗികമായി പീഡിപ്പിച്ചു; പതിനെട്ടുകാരന്‍ പിടിയില്‍

കോന്നി | പതിമൂന്നുകാരിയെ ലൈംഗികമായി പീഡിപ്പിച്ച കേസില്‍ പതിനെട്ടുകാരന്‍ തണ്ണിത്തോട് പോലീസിന്റെ പിടിയിലായി. തണ്ണിത്തോട് തേക്കുതോട് മേലേ പറക്കുളം ഓലിക്കല്‍ വീട്ടില്‍ അഖിലാണ് അറസ്റ്റിലായത്.

വ്യാഴാഴ്ച രാവിലെ 10ന് പെണ്‍കുട്ടിയെ വീട്ടില്‍ നിന്നും കാണാതായിരുന്നു. അമ്മൂമ്മയുടെ പരാതിയില്‍ കേസെടുത്ത പോലീസ് പെണ്‍കുട്ടിയുടെ മൊബൈല്‍ ഫോണ്‍ വിളികളുടെ വിശദവിവരങ്ങള്‍ അറിയുന്നതിന് സൈബര്‍ സെല്ലിന്റെ സഹായം തേടി. തുടര്‍ന്നാണ് പെണ്‍കുട്ടി പഠിക്കുന്ന സ്‌കൂളില്‍ പ്ലസ് ടുവിന് പഠിക്കുന്ന അഖിലിനൊപ്പമുണ്ടെന്ന് അറിഞ്ഞത്. വൈകിട്ട് തിരിച്ചുപോകാമെന്ന് വാക്കുകൊടുത്ത ശേഷം സ്വന്തം വീട്ടിലേക്ക് വിളിച്ചുവരുത്തിയ ഇയാള്‍, പെണ്‍കുട്ടിയെ അവിടെവച്ച് പീഡിപ്പിക്കുകയായിരുന്നു.

ആറുമാസമായി തങ്ങള്‍ അടുപ്പത്തിലാണെന്നും, ദിവസവും വിളിക്കാറുണ്ടെന്നും പെണ്‍കുട്ടി പോലീസിന് മൊഴി നല്‍കി. ആദ്യം തിരോധാനത്തിന് രജിസ്റ്റര്‍ ചെയ്ത കേസില്‍, പിന്നീട് ബലാത്സംഗം, പോക്സോ എന്നീ വകുപ്പുകള്‍ ചേര്‍ത്ത് അന്വേഷണം തുടരുകയായിരുന്നു.

ഇരുവരുടെയും വൈദ്യപരിശോധന നടത്തുകയും, കോടതിയില്‍ പെണ്‍കുട്ടിയുടെ മൊഴി രേഖപ്പെടുത്തുകയും ചെയ്തു. പ്രതിയെ ഇയാളുടെ വീട്ടില്‍ നിന്നാണ് കസ്റ്റഡിയിലെടുത്തത്. പിന്നീട് അറസ്റ്റ് രേഖപ്പെടുത്തിയ പോലീസ് പ്രതിയെ കോടതിയില്‍ ഹാജരാക്കി. ഇയാളെ കോടതി റിമാന്‍ഡ് ചെയ്തു. എസ് ഐ. രാകേഷ്, എ എസ് ഐമാരായ ദിലീപ്ഖാന്‍, സണ്ണി, എസ് സി പി ഒമാരായ അഷ്‌റഫ്, ലിജോ, ഷബീര്‍, സി പി ഒ. ചിഞ്ചു ബോസ് എന്നിവരുടെ സംഘമാണ് അന്വേഷണം നടത്തി പ്രതിയെ അറസ്റ്റ് ചെയ്തത്.