പൊട്ടിവീണ വൈദ്യുത കമ്പിയില്‍ നിന്ന് ഷോക്കേറ്റ് 19 കാരന്‍ മരിച്ചു

തിരുവനന്തപുരം | പൊട്ടിവീണ വൈദ്യുത കമ്പിയില്‍ നിന്ന് ഷോക്കേറ്റ് യുവാവ് മരിച്ചു. തിരുവനന്തപുരം നെടുമങ്ങാട് പനയമുട്ടം സ്വദേശി അക്ഷയ് (19) ആണ് മരിച്ചത്. കാറ്ററിംഗ് ജോലി കഴിഞ്ഞ് മടങ്ങവേ പുലര്‍ച്ചെ രണ്ടുമണിയോടെയാണ് അപകടം.

മരം ഒടിഞ്ഞ് പോസ്റ്റില്‍ വീണതിനെ തുടര്‍ന്ന് റോഡില്‍ പൊട്ടിവീണു കിടക്കുകയായിരുന്ന വൈദ്യുതി കമ്പിയില്‍ നിന്നാണ് യുവാവിന് വൈദ്യുതാഘാതമേറ്റത്. മൂന്ന് പേര്‍ സഞ്ചരിച്ച ബൈക്കാണ് വൈദ്യുത കമ്പിയില്‍ തട്ടി അപകടമുണ്ടായത്. അക്ഷയ് ആണ് വാഹനമോടിച്ചിരുന്നത്.

മരം കടപുഴകി പോസ്റ്റിലേക്ക് വീണതിനെ തുടര്‍ന്ന് മരവും പോസ്റ്റും റോഡിലേക്ക് വീണു. പുലര്‍ച്ചെ ജോലി കഴിഞ്ഞു മടങ്ങുകയായിരുന്ന സംഘം ഇത് ശ്രദ്ധിക്കാതെ ബൈക്കുമായി കടന്നുപോകാന്‍ ശ്രമിക്കുകയായിരുന്നുവെന്നാണ് പ്രാഥമിക വിവരം. അക്ഷയിന്റെ മൃതദേഹം നെടുമങ്ങാട് ജില്ലാ ആശുപത്രിയില്‍ സൂക്ഷിച്ചിരിക്കുകയാണ്. പോലീസെത്തി തുടര്‍നടപടികള്‍ സ്വീകരിച്ചു.