ഇറാനിലെ ആണവ കേന്ദ്രങ്ങൾക്ക് കൂടുതൽ നാശനഷ്ടങ്ങളില്ലെന്ന് യുഎൻ ആണവ നിരീക്ഷണ സമിതി

യുഎൻ | ഇസ്റാഈൽ വെള്ളിയാഴ്ച നടത്തിയ ആക്രമണത്തിന് ശേഷം ഇറാനിലെ നതാൻസ്, ഫോർഡോ ആണവ കേന്ദ്രങ്ങൾക്ക് കൂടുതൽ നാശനഷ്ടങ്ങളൊന്നും സംഭവിച്ചിട്ടില്ലെന്ന് യുഎന്നിന്റെ ആണവ നിരീക്ഷണ സമിതി തലവൻ റാഫേൽ ഗ്രോസി അറിയിച്ചു. എല്ലാ കക്ഷികളും പരമാവധി സംയമനം പാലിക്കണമെന്നും അദ്ദേഹം അഭ്യർത്ഥിച്ചു.

നതാൻസിനും ഫോർഡോയ്ക്കും പുറത്തുള്ള റേഡിയേഷൻ അളവ് സാധാരണ നിലയിലാണെന്ന് ഐഎഇഎയുടെ ബോർഡ് ഓഫ് ഗവർണർമാരോട് ഗ്രോസി പറഞ്ഞു. നതാൻസിലെ ഉപരിതല പൈലറ്റ് സൈറ്റ് നശിപ്പിക്കപ്പെട്ടെങ്കിലും, സംവിധാനത്തിന്റെ ഭൂഗർഭ ഭാഗങ്ങളിൽ ആക്രമണം നടന്നതിന് സൂചനകളൊന്നും ലഭ്യമല്ലെന്നും അദ്ദേഹം കൂട്ടിച്ചേർത്തു.

എന്നാൽ അവിടുത്തെ വൈദ്യുതി വിതരണം നശിപ്പിക്കപ്പെട്ടുവെന്നും, ഇത് യുറേനിയം സമ്പുഷ്ടമാക്കുന്ന സെൻട്രിഫ്യൂജ് മെഷീനുകൾക്ക് കേടുപാടുകൾ വരുത്തിയിരിക്കാമെന്നും അദ്ദേഹം സൂചിപ്പിച്ചു.

ഇസ്ഫഹാനിലെ ഒരു ആണവ കേന്ദ്രത്തിൽ നാല് കെട്ടിടങ്ങൾക്ക് കേടുപാടുകൾ സംഭവിച്ചതായും, എന്നാൽ ഒരു മലയിടുക്കിൽ നിർമ്മിച്ച ഫോർഡോ സൈറ്റിൽ നാശനഷ്ടങ്ങളൊന്നും രേഖപ്പെടുത്തിയിട്ടില്ലെന്നും അദ്ദേഹം പറഞ്ഞു.

സൈനികപരമായ സംഘർഷം ജീവനുകൾക്ക് ഭീഷണിയാണെന്നും റേഡിയോളജിക്കൽ ചോർച്ചയ്ക്കുള്ള സാധ്യത വർദ്ധിപ്പിക്കുമെന്നും ഗ്രോസി മുന്നറിയിപ്പ് നൽകി.