കശ്മീരില്‍ ആറ് ഭീകരരെ ഏറ്റുമുട്ടലില്‍ വധിച്ചു

ശ്രീനഗര്‍ | ജമ്മു കശ്മീരിലെ കുല്‍ഗാം, അനന്ത്‌നാഗ് ജില്ലകളിലെ വ്യത്യസ്ത ഏറ്റുമുട്ടലുകളില്‍ ആറ് തീവ്രവാദികളെ വധിച്ചതായി പോലീസ് അറിയിച്ചു. നാല് പേരെയാണ് തിരിച്ചറിഞ്ഞത് കൊല്ലപ്പെട്ടവരിൽ രണ്ട് ഭീകരർ പാക്കിസ്ഥാനിൽ നിന്ന് എത്തിയതാണ്. രണ്ട് പേർ പ്രദേശവാസികളാണ്. എല്ലാവരും ജെയ്ഷെ മുഹമ്മദ് ഭീകര സംഘടനയിലെ അംഗങ്ങളാണെന്ന് കശ്മീർ ഐ ജി വിജയ് കുമാർ പറഞ്ഞു.

ഇന്നലെ വൈകിട്ടാണ് രണ്ടിടങ്ങളിലും ഭീകരവിരുദ്ധ വേട്ട ആരംഭിച്ചത്. ഒരു പോലീസുകാരന് പരുക്കേറ്റു. അനന്ത്‌നാഗിലെ നൗഗാമിലുണ്ടായ ഏറ്റുമുട്ടലിലാണ് പോലീസുകാരന് പരുക്കേറ്റത്. അനന്ത്‌നാഗിലെ ഏറ്റുമുട്ടല്‍ അവസാനിച്ചയുടനെ കുല്‍ഗാമിലെ മിര്‍ഹാമ ഗ്രാമത്തില്‍ ഏറ്റുമുട്ടല്‍ ആരംഭിച്ചു.