സിമ്പിള്‍ വണ്‍ ഇലക്ട്രിക് സ്‌കൂട്ടര്‍ ഉടന്‍ അവതരിപ്പിക്കും

ബെംഗളുരു| സിമ്പിള്‍ വണ്‍ ഇലക്ട്രിക് സ്‌കൂട്ടര്‍ അവതരണം മെയ് 23ന്  നടക്കുമെന്ന് സിമ്പിള്‍ എനര്‍ജി അറിയിച്ചു. സ്‌കൂട്ടറിന്റെ വില മെയ് 23ന് പ്രഖ്യാപിക്കുമെന്ന് കമ്പനി സ്ഥിരീകരിച്ചു. സ്‌കൂട്ടറിന്റെ അവതരണം ബെംഗളുരുവില്‍ നടക്കും. കഴിഞ്ഞ രണ്ട് വര്‍ഷമായി കമ്പനി ഇലക്ട്രിക് സ്‌കൂട്ടര്‍ വിപുലമായി പരീക്ഷിച്ചു വരികയാണെന്ന് സിമ്പിള്‍ എനര്‍ജി സ്ഥാപകനും സിഇഒയുമായ സുഹാസ് രാജ്കുമാര്‍ പറഞ്ഞു.

സിമ്പിള്‍ വണ്‍ ഇലക്ട്രിക് സ്‌കൂട്ടറില്‍ പവറിനായി, നീക്കം ചെയ്യാവുന്ന 4.8കെഡബ്ല്യുഎച്ച് ബാറ്ററി പാക്കും 8.5കെഡബ്ല്യു ഇലക്ട്രിക് മോട്ടോറും ഉപയോഗിക്കുന്നു. ഇത് സെഗ്മെന്റിലെ ഏറ്റവും ഉയര്‍ന്ന 72 എന്‍എം ടോര്‍ക്ക് നല്‍കുന്നു. ഇലക്ട്രിക് സ്‌കൂട്ടര്‍ ഒറ്റ ചാര്‍ജില്‍ 300 കിലോമീറ്റര്‍ പരിധി വാഗ്ദാനം ചെയ്യുന്നു.

സിമ്പിള്‍ വണ്‍ ഇലക്ട്രിക് സ്‌കൂട്ടറിന്റെ ബ്രേക്കിംഗ് സിസ്റ്റത്തില്‍ സിബിഎസ് (കംബൈന്‍ഡ് ബ്രേക്കിംഗ് സിസ്റ്റം) സഹിതം മുന്നിലും പിന്നിലും ഡിസ്‌ക് ബ്രേക്കുകള്‍ ഉള്‍പ്പെടുന്നു. നാല് നിറങ്ങളിലാണ് സിമ്പിള്‍ വണ്‍ ഇലക്ട്രിക് സ്‌കൂട്ടര്‍ എത്തുന്നത്. ചുവപ്പ്, ബ്രേസന്‍ കറുപ്പ്, ഗ്രേസ് വൈറ്റ്, അസൂര്‍ ബ്ലൂ.

2022ന്റെ തുടക്കത്തിലാണ് സിമ്പിള്‍ വണ്‍ ഇലക്ട്രിക് സ്‌കൂട്ടര്‍ പ്രഖ്യാപിച്ചത്. അന്ന് സ്റ്റാന്‍ഡേര്‍ഡ് മോഡലിന് 1.10 ലക്ഷം രൂപയും എക്സ്ട്രാ റേഞ്ച് മോഡലിന് 1.45 ലക്ഷം രൂപയുമായിരുന്നു വില. ഇപ്പോള്‍ ഇലക്ട്രിക് സ്‌കൂട്ടറിന് ചെറിയ വില വര്‍ധന ഉണ്ടാകാന്‍ സാധ്യതയുണ്ട്.