കഴക്കൂട്ടത്ത് കൊഴുപ്പ് നീക്കല്‍ ശസ്ത്രക്രിയയില്‍ ഗുരുതര പിഴവെന്ന് പരാതി; യുവതിയുടെ ഒമ്പത് വിരലുകള്‍ മുറിച്ചുമാറ്റി

തിരുവനന്തപുരം| തിരുവനന്തപുരത്തെ കഴക്കൂട്ടത്ത് കൊഴുപ്പ് നീക്കല്‍ ശസ്ത്രക്രിയയില്‍ പിഴവ് സംഭവിച്ചതായി പരാതി. ചികിത്സാ പിഴവിനെ തുടര്‍ന്ന് 31കാരി നീതുവിന്റെ ഒമ്പത് വിരലുകള്‍ മുറിച്ചുമാറ്റേണ്ടി വന്നുവെന്നാണ് ആരോപണം. യുവതിയുടെ കുടുംബത്തിന്റെ പരാതിയില്‍ തുമ്പ പോലീസ് കേസെടുത്ത് അന്വേഷണം ആരംഭിച്ചു. കഴക്കൂട്ടം കുളത്തൂരിലെ കോസ്മറ്റിക് ആശുപത്രിയിലാണ് നീതു ചികിത്സ തേടിയിരുന്നത്. പ്രസവശേഷമുള്ള വയറിലെ കൊഴുപ്പ് കുറയ്ക്കാന്‍, പരസ്യം കണ്ടാണ് കോസ്മറ്റിക് ആശുപത്രിയുമായി നീതു ബന്ധപ്പെടുന്നത്. അഞ്ച് ലക്ഷം രൂപയാണ് ശസ്ത്രക്രിയക്കായി ആശുപത്രി അധികൃതര്‍ ആവശ്യപ്പെട്ടത്. ആദ്യം യുവതി പിന്‍മാറിയെങ്കിലും പിന്നീട് മൂന്ന് ലക്ഷം രൂപയ്ക്ക് ചെയ്തുതാരാമെന്ന് പറഞ്ഞ് ആശുപത്രിയില്‍ നിന്നും ബന്ധപ്പെട്ടു.

യുവതി അഡ്മിറ്റായി തൊട്ടടുത്ത ദിവസം തന്നെ ശസ്ത്രക്രിയ നടത്തി. പിറ്റേന്ന് രാവിലെ ഡിസ്ചാര്‍ജും ചെയ്തു. പിന്നാലെ യുവതിയ്ക്ക് അസ്വസ്ഥതകള്‍ അനുഭവപ്പെട്ടു. ഛര്‍ദ്ദിയും ക്ഷീണവുമാണ് ഉണ്ടായത്. ഓപ്പറേഷന്‍ നടത്തിയ ഡോക്ടറെ ബന്ധപ്പെട്ടെങ്കിലും ആശുപത്രി അത് ഗൗരവമായി എടുത്തില്ലെന്നാണ് യുവതിയുടെ കുടുംബം പറയുന്നത്. അടുത്ത ദിവസം ആശുപത്രിയില്‍ എത്തിച്ചു. അവിടെ നിന്ന് ആരോഗ്യ നില മോശമായതോടെ മറ്റൊരു ആശുപത്രിയിലേക്ക് മാറ്റുകയായിരുന്നു. നീതുവിന് അറ്റാക്ക് വന്നെന്നും വൈകിയാണ് ആശുപത്രിയിലെത്തിച്ചതെന്നും ആംബുലന്‍സ് വിളിച്ചില്ലെന്നും കുടുംബം ആരോപിക്കുന്നുണ്ട്.

22 ദിവസത്തോളം തിരുവനന്തപുരത്തെ സ്വകാര്യ ആശുപത്രിയില്‍ വെന്റിലേറ്ററിലായിരുന്നു യുവതി. പിന്നീട് കൈകളിലെയും കാലുകളിലെയുമായി ഒമ്പത് വിരലുകള്‍ മുറിച്ചുമാറ്റേണ്ടതായി വന്നു. നിലവില്‍ തീവ്രപരിചരണ വിഭാഗത്തില്‍ ചികിത്സയിലാണ് യുവതി. വിഷയത്തില്‍ പ്രതികരിക്കാന്‍ കോസ്മറ്റിക് ആശുപത്രി അധികൃതര്‍ തയാറായിട്ടില്ല. സംഭവത്തില്‍ മുഖ്യമന്ത്രിക്കും ആരോഗ്യമന്ത്രിക്കും ജില്ലാ പോലീസ് മേധാവിക്കുമുള്‍പ്പെടെ നല്‍കിയ പരാതിയുടെ അടിസ്ഥാനത്തില്‍ തുമ്പ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഇതേ ആശുപത്രിക്കെതിരെ മറ്റൊരു ഗുരുതര ആരോപണവും ഉണ്ടെന്നാണ് നീതുവിന്റെ ഭര്‍ത്താവ് പത്മജിത് പറയുന്നത്. 2024ല്‍ ഈ ആശുപത്രിയില്‍വെച്ച് കൊഴുപ്പ് നീക്കല്‍ ശസ്ത്രക്രിയ നടത്തിയ ഒരാള്‍ മരിച്ചിരുന്നുവെന്നാണ് ആരോപണം.