ഷെയ്ഖ് സായിദ് ബുക്ക് അവാർഡ് ഷോർട്ട് ലിസ്റ്റ് പ്രഖ്യാപിച്ചു; ഇരുപതാം പതിപ്പിൽ റെക്കോർഡ് പങ്കാളിത്തം

അബൂദബി|ലോകത്തിലെ ഏറ്റവും പ്രശസ്തമായ സാഹിത്യ പുരസ്കാരങ്ങളിലൊന്നായ ഷെയ്ഖ് സായിദ് ബുക്ക് അവാർഡിന്റെ (SZBA) ഇരുപതാം പതിപ്പിന്റെ (2025–2026) അവസാന പട്ടിക (ഷോർട്ട്ലിസ്റ്റ്) പ്രഖ്യാപിച്ചു. അബൂദബി അറബിക് ലാംഗ്വേജ് സെന്ററാണ് (ALC) അവാർഡിന് പരിഗണിക്കപ്പെടുന്ന മികച്ച കൃതികളുടെ വിവരം പുറത്തുവിട്ടത്. വിവിധ മേഖലകളിലെ മികച്ച സർഗ്ഗാത്മകവും ഗവേഷണാത്മകവുമായ പ്രവർത്തനങ്ങളെ അംഗീകരിക്കുന്നതിനായി എട്ട് വിഭാഗങ്ങളിലായാണ് പട്ടിക തയ്യാറാക്കിയിരിക്കുന്നത്.

പ്രധാന വിഭാഗങ്ങളിലെ ചുരുക്കപ്പട്ടിക:

1. സാഹിത്യം
* അഷ്റഫ് ഇലാഷ്മാവി (ഈജിപ്ത്): ‘ബിർത്ത്സ് ഇൻ ദി സൂ’ (മൃഗശാലയിലെ ജനനങ്ങൾ)
* നിസാർ അബ്ദുൽ സത്താർ (ഇറാഖ്): ‘ഫൂറർ’ (രോമക്കുപ്പായം)
* ബദ്രിയ അൽ ബിഷർ (സഊദി അറേബ്യ): ‘സീക്രട്ട് ഓഫ് അൽ സഫറാന’ (അൽ സഫറാനയുടെ രഹസ്യം)

2. യുവ രചയിതാവ്

മൊറോക്കോയിൽ നിന്നുള്ള മുസ്തഫ രജൗനെ, ജോർദാനിൽ നിന്നുള്ള ഒമർ സക്കറിയ, ഫലസ്തീനിൽ നിന്നുള്ള അല അൽഖത്രവി എന്നിവരുടെ കൃതികളാണ് ഈ വിഭാഗത്തിൽ മാറ്റുരയ്ക്കുന്നത്.

3. വിവർത്തനം:

അറബിക്, ഇംഗ്ലീഷ്, ഫ്രഞ്ച് ഭാഷകൾക്കിടയിലുള്ള സാംസ്കാരിക വിനിമയം പ്രകടമാക്കുന്ന നാല് വിവർത്തന കൃതികൾ പട്ടികയിലുണ്ട്. ഇതിൽ ഗീർട്ട് ജാൻ വാൻ ഗെൽഡർ (നെതർലാൻഡ്‌സ്), ഡോ. മുഹമ്മദ് അൽ ഒവാലി (മൊറോക്കോ), നവാൽ നസ്രള്ള (ഇറാഖ്/യുഎസ്എ), ജെയിംസ് ഇ. മോണ്ട്ഗോമറി (യുകെ) എന്നിവരുടെ വിവർത്തനങ്ങൾ ഉൾപ്പെടുന്നു.

4. ഇതര ഭാഷകളിലെ അറബ് സംസ്കാരം:

ഇംഗ്ലീഷ്, ജർമ്മൻ, ഫ്രഞ്ച്, ഇറ്റാലിയൻ ഭാഷകളിൽ നിന്നുള്ള ഗവേഷണ ഗ്രന്ഥങ്ങൾ ഇതിലുണ്ട്. പുരാതന അറബിക് കവിതകൾ മുതൽ മഷി നിർമ്മാണത്തെക്കുറിച്ചുള്ള പഠനങ്ങൾ വരെ ഇതിൽ ഉൾപ്പെടുന്നു.

5. പ്രസാധനവും സാങ്കേതികവിദ്യയും:

* എമിറേറ്റ്‌സ് ലിറ്ററേച്ചർ ഫൗണ്ടേഷൻ (യു.എ.ഇ)
* ഇഖ്‌രാലി – അറബിക് ഓഡിയോ ബുക്സ് (ഈജിപ്ത്)
* ദാർ അൽ അദബ് (ലെബനൻ)

തിരഞ്ഞെടുപ്പ് രീതി

അബൂദബി അറബിക് ലാംഗ്വേജ് സെന്റർ ചെയർമാനും അവാർഡ് സെക്രട്ടറി ജനറലുമായ ഡോ. അലി ബിൻ തമീമിന്റെ നേതൃത്വത്തിലുള്ള സയന്റിഫിക് കമ്മിറ്റിയാണ് പട്ടികയ്ക്ക് അംഗീകാരം നൽകിയത്. ജർമ്മനി, ലെബനൻ, ജോർദാൻ, ഈജിപ്ത്, സഊദി അറേബ്യ, തുർക്കി എന്നിവിടങ്ങളിൽ നിന്നുള്ള പ്രമുഖ പണ്ഡിതർ ഉൾപ്പെട്ട ജൂറി പാനലാണ് കൃതികൾ പരിശോധിച്ചത്. അക്കാദമിക് നിലവാരവും സുതാര്യതയും ഉറപ്പുവരുത്തിയാണ് ഈ തിരഞ്ഞെടുപ്പ് നടത്തിയതെന്ന് സമിതി അറിയിച്ചു. എന്നാൽ ‘കുട്ടികളുടെ സാഹിത്യം’, ‘രാഷ്ട്ര പുരോഗതിക്കുള്ള സംഭാവന’ എന്നീ വിഭാഗങ്ങളിൽ ഇത്തവണ കൃതികളൊന്നും തിരഞ്ഞെടുത്തിട്ടില്ല.

ആഗോള ശ്രദ്ധയാകർഷിച്ച പുരസ്കാരം

74 രാജ്യങ്ങളിൽ നിന്നായി നാലായിരത്തിലധികം അപേക്ഷകളാണ് ഇത്തവണ ലഭിച്ചത്. ചിലി, ഐസ്‌ലൻഡ്, ലക്സംബർഗ് എന്നീ രാജ്യങ്ങൾ ആദ്യമായി ഈ പുരസ്കാര പ്രക്രിയയിൽ പങ്കാളികളായി. അറബ് സംസ്കാരത്തെയും വിജ്ഞാനത്തെയും ലോകത്തിന് മുന്നിൽ എത്തിക്കുന്നതിൽ ഈ അവാർഡ് ഒരു വലിയ സാംസ്കാരിക വേദിയായി മാറിയെന്ന് ഡോ. അലി ബിൻ തമീം പറഞ്ഞു.
വരും ആഴ്ചകളിൽ തന്നെ വിവിധ വിഭാഗങ്ങളിലെ വിജയികളെ ഔദ്യോഗികമായി പ്രഖ്യാപിക്കുന്നതാണ്.