വിമാന അപകട സ്ഥലത്ത് നിന്ന് രാജു പട്ടേലിന് ലഭിച്ചത് 70 പവൻ സ്വർണാഭരണങ്ങൾ; 80,000 രൂപ; കുറേ രേഖകൾ

ഗാന്ധിനഗർ | അഹമ്മദാബാദ് ബി ജെ മെഡിക്കൽ കോളേജിന് സമീപം വിമാന അപകടം നടന്ന വാർത്തയറിഞ്ഞപ്പോൾ, 56 വയസ്സുകാരനായ നിർമ്മാണ വ്യവസായി രാജു പട്ടേൽ ഒരു നിമിഷം പോലും വൈകിയില്ല. അപകടസ്ഥലത്തിന് മീറ്ററുകൾ മാത്രം അകലെ താമസിക്കുന്ന അദ്ദേഹം, തന്റെ സഹായികളോടൊപ്പം സംഭവസ്ഥലത്ത് ഓടിയെത്തി. കനത്ത പുകയും, ആളിപ്പടരുന്ന തീയും, സഹായത്തിനായുള്ള നിലവിളികളും നിറഞ്ഞ ഒരു ഭീകരാവസ്ഥയാണ് അവരെ വരവേറ്റത്. പക്ഷേ, പതറിയില്ല. തീയും നാശനഷ്ടങ്ങളും വകവയ്ക്കാതെ, പരിക്കേറ്റവരെ രക്ഷിക്കാൻ അദ്ദേഹം മുന്നിട്ടിറങ്ങി. പിന്നീട്, തകർന്ന അവശിഷ്ടങ്ങൾക്കിടയിൽ നിന്ന് സ്വർണ്ണാഭരണങ്ങൾ, പണം, രേഖകൾ എന്നിവ കണ്ടെത്തുകയും അവയെല്ലാം അന്വേഷണ ഉദ്യോഗസ്ഥർക്ക് കൈമാറുകയും ചെയ്തു.

“ആദ്യത്തെ 15-20 മിനിറ്റ് തീയുടെ തീവ്രത കാരണം ഞങ്ങൾക്ക് അടുക്കാൻ പോലും കഴിഞ്ഞില്ല. എന്നാൽ, അഗ്നിശമന സേനയും പിന്നാലെ ‘108 ആംബുലൻസു’കളും എത്തിയതോടെ ഞങ്ങൾ സഹായത്തിനായി ഓടിയിറങ്ങി” 56-കാരനായ രാജു പട്ടേൽ ആ നിമിഷം ഓർത്തെടുത്തു. സ്ട്രെച്ചറുകളൊന്നും ലഭ്യമല്ലാത്തതിനാൽ, സാരികളും ബെഡ്ഷീറ്റുകളും ഉപയോഗിച്ചാണ് പരിക്കേറ്റവരെ ആംബുലൻസുകളിലേക്ക് മാറ്റിയതെന്നും അദ്ദേഹം കൂട്ടിച്ചേർത്തു.

വൈകുന്നേരം നാല് മണിയോടെ അടിയന്തര രക്ഷാപ്രവർത്തനങ്ങൾ ഏതാണ്ട് പൂർത്തിയായപ്പോൾ, പട്ടേലും സംഘവും മറ്റൊരു പ്രധാന ദൗത്യത്തിലേക്ക് തിരിഞ്ഞു. അപകടസ്ഥലത്ത് ചിതറിക്കിടന്നിരുന്ന കത്തിക്കരിഞ്ഞ ബാഗുകൾ അരിച്ചുപെറുക്കാൻ അവർ തുടങ്ങി. ബാഗുകളിൽ നിന്ന് 70 പവൻ സ്വർണ്ണാഭരണങ്ങളും വളകളും മറ്റ് ആഭരണങ്ങളും കണ്ടെത്തി. 80,000 രൂപയും ഭഗവദ്ഗീതയുടെ ഒരു പതിപ്പും പാസ്പോർട്ടുകളും ലഭിച്ചു – അദ്ദേഹം പറഞ്ഞു.

കണ്ടെത്തിയ ഈ സാധനങ്ങളെല്ലാം ശേഖരിച്ച് അധികാരികൾക്ക് കൈമാറി. അന്ന് വൈകുന്നേരം ഒമ്പത് മണിവരെ അപകടസ്ഥലത്ത് തുടർന്ന് പ്രവർത്തിക്കാൻ അധികാരികൾ അവർക്ക് അനുവാദം നൽകിയിരുന്നു.

2008-ലെ അഹമ്മദാബാദ് സ്ഫോടന പരമ്പരയിൽ സന്നദ്ധപ്രവർത്തനം നടത്തിയിട്ടുള്ള രാജു പട്ടേൽ, താൻ കണ്ടിട്ടുള്ളതിൽ വെച്ച് ഏറ്റവും ഭീകരമായ ദുരന്തമാണിതെന്ന് മാധ്യമങ്ങളോട് പറഞ്ഞു.

“ബോംബ് പൊട്ടി നിരവധി പേർ മരിച്ചപ്പോൾ ഞാൻ സിവിൽ ആശുപത്രിയിൽ നിന്ന് 100 മീറ്റർ മാത്രം അകലെയായിരുന്നു. എങ്കിലും, ഈ അപകടം വരുത്തിയ നാശനഷ്ടങ്ങളും, തീയും, നഷ്ടവും എനിക്ക് ഒരിക്കലും മറക്കാൻ കഴിയില്ല” – വികാരദീനനായി അദ്ദേഹം പറഞ്ഞു.