കിരീടം കൈവിട്ടില്ല; മലപ്പുറം വെസ്റ്റ് വീണ്ടും കേരള സാഹിത്യോത്സവ് ജേതാക്കൾ

കായംകുളം | കിഴക്കിന്റെ വെനീസ് ആയ ആലപ്പുഴയുടെ മണ്ണിനെ ആവേശക്കടലാക്കി മാറ്റിയ എസ് എസ് എഫ് കേരള സംസ്ഥാന സാഹിത്യോത്സവിൽ മലപ്പുറം വെസ്റ്റ് ജില്ലാ ടീം വീണ്ടും ജേതാക്കളായി. കായംകുളത്ത് സമാപിച്ച ആവേശകരമായ പോരാട്ടങ്ങൾക്കൊടുവിലാണ് എതിരാളികളെ ബഹുദൂരം പിന്നിലാക്കി മലപ്പുറം വെസ്റ്റ് കലാകിരീടത്തിൽ ഒരിക്കൽ കൂടി മുത്തമിട്ടത്. മലപ്പുറം ഈസ്റ്റ് രണ്ടാം സ്ഥാനവും കോഴിക്കോട് സൗത്ത് മൂന്നാം സ്ഥാനവും നേടി.

കഴിഞ്ഞ തവണത്തെ കിരീട നേട്ടം അതേപടി നിലനിർത്തിയാണ് മലപ്പുറം വെസ്റ്റ് ഇത്തവണയും ചാമ്പ്യന്മാരായത്. സാഹിത്യോത്സവ് നഗരിയിൽ പ്രതിഭകളുടെ മാസ്മരിക പ്രകടനം പുറത്തെടുത്താണ് മലപ്പുറം വെസ്റ്റ് തങ്ങളുടെ ആധിപത്യം തുടർന്നത്. പോരാട്ടത്തിന്റെ അവസാന ഘട്ടം വരെ വാശിയേറിയ മത്സരമാണ് വിവിധ ജില്ലകൾ തമ്മിൽ നടന്നത്.

833 പോയിൻ്റുകളോടെയാണ് മലപ്പുറം വെസ്റ്റ് ജില്ല ചമ്യന്മാരായത്. രണ്ടാം സ്ഥാനത്തുള്ള മലപ്പുറം ഈസ്റ്റ് 812 പോയിന്റുകളും മൂന്നാം സ്ഥാനം നേടിയ കോഴിക്കോട് സൗത്ത് 803 പോയിന്റുകളും നേടി. ആലപ്പുഴ ജില്ലയിൽ നിന്നുള്ള യാസീൻ നൗഷാദ് കലാപ്രതിഭയും, കോഴിക്കോട് സൗത്ത് ജില്ലയിൽ നിന്നുള്ള സയ്യിദത്ത് ഫാത്തിമ സഹ്റ സർഗപ്രതിഭയായും തിരഞ്ഞെടുക്കപ്പെട്ടു.

സാഹിത്യോത്സവ് സമാപന സംഗമത്തിൽ സമസ്ത കേരള ജംഇയ്യത്തുൽ ഉലമ വൈസ് പ്രസിഡന്റ്‌ ഹൈദ്രൂസ് മുസ്‌ലിയാർ കൊല്ലം ഉദ്ഘാടനം ചെയ്തു. ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാർ ഓൺലൈൻ വഴി അനുഗ്രഹ ഭാഷണം നടത്തി. എക്സൈസ് മന്ത്രി എം ലിജു മുഖ്യാതിഥിയായി. എസ് വൈ എസ് സംസ്ഥാന ഫിനാൻസ് സെക്രട്ടറി എം മുഹമ്മദ് സ്വാദിഖ്, എസ് എസ് എഫ് ഇന്ത്യ പ്രസിഡന്റ് സി പി ഉബൈദുള്ള സഖാഫി അനുമോദന പ്രഭാഷണവും ജന.സെക്രട്ടറി ദിൽഷാദ് അഹ്മദ് കാശ്മീർ ഫൈനൽ റിസൾട്ട് പ്രഖ്യാപനവും നിർവഹിച്ചു. ആർ എസ് സി ഗ്ലോബൽ ചെയർമാൻ ഫൈസൽ ബുഖാരി അഭിവാദ്യം ചെയ്തു.

എസ് എസ് എഫ് സംസ്ഥാന പ്രസിഡന്റ് സയ്യിദ് മുനീറുൽ അഹ്ദൽ അധ്യക്ഷത വഹിച്ചു.ജേതാക്കൾക്ക് ത്വാഹ മുസ്‌ലിയാർ കായംകുളം, സയ്യിദ് ഹാമിദ്കോയ ബാഫഖി അവാർഡുകൾ വിതരണം ചെയ്തു. പി എ മുഹമ്മദ്‌ കുഞ്ഞ് സഖാഫി, പി എ ഫാറൂഖ് നഈമി, സയ്യിദ് അബ്ദുർറഹ്മാൻ ബാഫഖി, അബ്ദുർറഹീം സഖാഫി, സയ്യിദ് അബ്ദുന്നാസിർ തങ്ങൾ, അബ്ദുർറഷീദ് കരുമാടി, എ കെ എം ഹാഷിർ സഖാഫി, എം എസ് ജുനൈദ്, സൂര്യ ശംസുദ്ധീൻ എന്നിവർ സംബന്ധിച്ചു. കെ പി മുഹമ്മദ് അനസ് സ്വാഗതവും അജ്മൽ ജൗഹരി നന്ദിയും പറഞ്ഞു. 2027 കേരള സാഹിത്യോത്സവിന് ആദിത്യമരുളുന്ന കണ്ണൂർ ജില്ലക്കുള്ള പതാക കൈമാറ്റവും നടന്നു.