പാര്‍ട്ടി കോണ്‍ഗ്രസ്സിനിടെ ഹൃദയാഘാതം; എം എം മണിയുടെ വെന്റിലേറ്റര്‍ നീക്കി

മധുര | സി പി എം പാര്‍ട്ടി കോണ്‍ഗ്രസ്സിനിടെ ഹൃദയാഘാതത്തെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെട്ട മുന്‍ മന്ത്രി എം എം മണിയുടെ ആരോഗ്യനില തൃപ്തികരം. വെന്റിലേറ്റര്‍ സഹായം നീക്കിയ അദ്ദേഹം തീവ്രപരിചരണ വിഭാഗത്തില്‍ തുടരുകയാണ്. ഇന്നോ നാളെയോ മുറിയിലേക്കു മാറ്റും.

മുഖ്യമന്ത്രി പിണറായി വിജയന്‍ ആശുപത്രിയിലെത്തി മണിയെ സന്ദര്‍ശിച്ചു. മധുരയില്‍ നടക്കുന്ന പാര്‍ട്ടി കോണ്‍ഗ്രസിനിടെ ശ്വാസതടസ്സം അനുഭവപ്പെട്ടതിനെ തുടര്‍ന്നാണ് അദ്ദേഹത്തെ ഉടനെ അപ്പോളോ ആശുപത്രിയില്‍ പ്രവേശിപ്പിച്ചത്. അസുഖ ബാധിതനായി വിശ്രമത്തിലായിരുന്ന എം എം മണി അവിടെ നിന്നാണ് പാര്‍ട്ടി കോണ്‍ഗ്രസില്‍ പങ്കെടുക്കാനായി എത്തിയത്.

യാത്ര ഒഴിവാക്കണമെന്ന് ഡോക്ടര്‍മാര്‍ നിര്‍ദേശിച്ചിരുന്നതാണെങ്കിലും അനാരോഗ്യം അവഗണിച്ച് അദ്ദേഹം പാര്‍ട്ടി കോണ്‍ഗ്രസിനെത്തുകയായിരുന്നു. 2017 ല്‍ ആലപ്പുഴയില്‍ വച്ചും എം എം മണിക്ക് ഹൃദയാഘാതം സംഭവിച്ചിരുന്നു.